A Xunta de Galicia estreará este mes un novo programa de voluntariado ambiental que, a día de hoxe, xa esgotou as 228 prazas ofertadas para poder participar nalgunha das 20 actuacións proxectadas nos próximos meses en diversos espazos naturais. A conselleira de Medio Ambiente, Territorio e Vivenda, Ángeles Vázquez, e a conselleira de Política Social, Fabiola García, acompañadas polo alcalde de Tui, Enrique Cabaleiro, presentaron onte o programa no Parque Natural Monte Aloia, un dos lugares que acollerá esta iniciativa, impulsada por ambos departamentos.
Ángeles Vázquez adiantou que están programadas accións nos seis parques naturais da Comunidade; no Parque Nacional das Illas Atlánticas; nas reservas da biosfera Terras do Miño, na do Eo, Oscos e Terras do Burón, na das Mariñas Coruñesas e Terras do Mandeo e na do Xurés-Gêres; así como noutros espazos protexidos polo seu valor medioambiental, como os ZEC Ancares-Courel e Canón do Sil ou o Xeoparque Montañas do Courel.
En cada unha delas, o traballo dos participantes consistirá, basicamente, na realización de tarefas de limpeza, sinalización, eliminación de especies exóticas invasoras ou catalogación de fauna e flora. Precisamente, o novo programa comezará esta fin de semana no Xeoparque —o único declarado pola Unesco no noroeste de España— e prolongaranse ata o mes de setembro. No caso concreto do Monte Aloia as accións de voluntariado están programadas para os días 13, 14 e 15 de agosto.
Respecto e coidado pola natureza
Pola súa banda, a conselleira de Política Social destacou que a finalidade deste programa é fomentar a cooperación e o traballo desinteresado desde unha perspectiva interxeracional, á par que se impulsa o respecto e o coidado por un dos grandes tesouros de Galicia, o seu patrimonio natural.
[su_image_carousel source=”media: 35982,35984,35985,35986″ crop=”5:4″ link=”lightbox” autoplay=”0″]
Neste sentido, Fabiola García resaltou a xenerosidade e entrega que caracteriza aos galegos, un feito que se reflicte en que Galicia é un dos referentes no ámbito do voluntariado en España, pois conta con máis de 1.000 entidades inscritas no Rexistro de Acción Voluntaria e máis de 9000 voluntarios activos nos programas da Xunta.
Conservación da biodiversidade
Con esta nova acción dáselle continuidade ao proxecto LEWO, o programa de voluntariado ambiental para mozos impulsado por ambas consellerías e a través do cal se acometeron 60 actuacións entre 2018 e 2020. Vázquez Mejuto amosou a súa confianza na resposta que darán os voluntarios galegos ante a oportunidade de volver traballar no mantemento e conservación dalgunha das principais xoias naturais da Comunidade.
De feito, no acto de presentación tamén participou Noelia Rodríguez, unha das rapazas que hai ano e medio formou parte do proxecto LEWO colaborando na reconstrución da Muralla Ciclópea, no Monte Aloia, un espazo do que, dixo, quedou namorada. “A verdade é que non coñecía este parque natural e ter a posibilidade de ir cuns grandes profesionais que nos ían explicando todo é un privilexio. Tiven a sorte de aprender moito”, declarou.
Este tipo de programas son de grande importancia para unha Comunidade que aspira a que o 42 % do seu territorio estea amparada baixo algunha figura de protección. Así, a Xunta opta aos fondos europeos do plan de recuperación estatal cun ambicioso proxecto para a conservación da biodiversidade e do patrimonio na Rede de parques naturais de Galicia. O orzamento total das medidas a executar é de 16 millóns de euros, contía que permitiría actuar sobre máis de 800 hectáreas, apostando pola mellor adaptación ao cambio climático destes espazos protexidos.