O Concello da Guarda vén de pedir a colaboración cidadá para que, con motivo das Festas do monte, veciñanza e visitantes “respecten as sinalizacións que delimitan os espazos protexidos dun elemento patrimonial tan importante para a nosa vila como o é o Monte Santa Trega, evitando o uso da zona arqueolóxica para o xantar, de xeito que non se produzan agresións que provoquen danos nas estruturas”.
Como ven sendo habitual desde xa hai uns anos, tanto o domingo do monte como na romaría de Santa Trega do 23 de setembro, o xacemento arqueolóxico delimitase co fin de disuadir aos romeiros e visitantes de comer nesa zona.
Unha ocupación da zona delimitada pode provocar agresións que resulten en danos nas estruturas deste espazo protexido, un dos lugares máis visitados de Galicia e cun valor patrimonial e arqueolóxico único.
A maioría da poboación “é consciente de que o xacemento castrexo do monte Santa Trega é un tesouro para A Guarda e para Galicia, e de que debemos dar unha imaxe acorde coa súa importancia e valor”. Por parte do Concello e do Padroado do monte Santa Trega, engade o Concello guardés, “seguiremos traballando para concienciar a poboación no respecto polo patrimonio, lembrando que é tarefa de todos mantelo en boas condicións”.
“As Festas do Monte e o Monte Santa Trega conviviron ao longo de máis de cen anos, o fan na actualidade e o continuarán facendo sempre que exista un respecto polo noso patrimonio”, conclúe o Goberno local que preside Antonio Lomba.
