O voceiro municipal do PP da Cañiza, Miguel Domínguez, emprendeu xestións coa Xunta de Galicia para que acceda á dotación dun camión de emerxencias de última xeración ao Concello ante a próxima posta en marcha do Grupo de Emerxencias Supramunicipal (GES), concedido polo Goberno galego ao municipio para a axeitada atención das incidencias na bisbarra da Paradanta.
O concelleiro popular trasladoulle esta petición ao delegado territorial da Xunta en Pontevedra, Luis López, nun encontro que foi solicitado fai varias semanas e que tivo lugar a primeira hora desta mañá no edificio administrativo do executivo autonómico en Pontevedra.
Nesta xuntanza, Miguel Domínguez informou ao representante rexional de que o pleno da Cañiza aprobou a semana pasada por unanimidade o convenio de adhesión ao GES e que, para a súa óptima actuación, é preciso dotar ao servizo dun camión de atención de emerxencias, orzamentado nuns 200.000 euros, cos sistemas operativos de vangarda.
“Hai algunhas semanas, tras comprobar como os demais municipios da provincia aos que se lle concedeu o GES se poñían a traballar na súa implantación e A Cañiza ía con retraso, pedín unha entrevista co delegado territorial, xa que quería trasladarlle as necesidades que temos á vista de que o goberno local incurre nun pasotismo absoluto nos temas de importancia para os veciños”, detallou Domínguez, que agradeceu a celebración desta reunión e a “sensibilidade” do delegado e da Xunta co municipio.
O voceiro popular, que saíu con “boas sensacións” sobre a aceptación por parte do Goberno galego desta importante demanda loxística para o GES, agarda que nas vindeiras semanas haxa unha resposta sobre a mesma e instou ao goberno socialista da Cañiza “a poñerse a traballar dunha vez porque xa van case dous anos de lexislatura e nin están e, o peor de todo, nin se lles espera”.
“Dixen que traballaría polos veciños, que defendería o seu benestar e que actuaría en base ao interese xeral da Cañiza durante toda a lexislatura fora cal fora o resultado electoral e dende o cargo que me tocara desempeñar e é o que estou facendo ante a absoluta inacción, parálise e incapacidade do goberno de Luís Piña”, aseverou Domínguez, que engadiu que “pensaba que na oposición tería que facer máis ben unha labor de fiscalización, control e propostas, pero a verdade é que non nos queda máis remedio que xestionar, intermediar e pedir porque o goberno local non o fai e temos que tentar paliar o abandono que sofren os veciños”.
“Os veciños da Cañiza teñen que saber que poden acudir a nós e que imos traballar arreo por eles porque para o PP o que máis importa é A Cañiza”, apostillou Domínguez, que agarda que as negociacións coa Xunta cheguen a bo porto e que, en breve prazo, se aprobe a necesaria dotación do camión de emerxencias.
