A CAÑIZA CONTARÁ CON PUNTOS DE CARGA PARA VEHÍCULOS ELÉCTRICOS EN 3 LOCALIZACIÓNS DIFERENTES
A Cañiza contará nos próximos meses con puntos de recarga para vehículos eléctricos, un novo servizo á cidadanía no que o Concello presta o uso privativo durante 10 anos de espazos públicos á empresa Acciona Recarga, S.L. (anteriormente denominada Cargacoches SL) para o uso, mantemento e explotación de 4 cargadores eléctricos neses bens de titularidade municipal.
O 27 de outubro de 2021 mediante unha resolución da alcaldía deu inicio ao procedemento para adxudicar o uso dos bens de espazo público para a instalación de 4 puntos de recarga de vehículos eléctricos. Cada un destes puntos pode recargar dous vehículos de forma simultánea quedando distribuídos do seguinte xeito:
- 2 puntos de recarga (4 prazas) de 50 kW na rúa Regueiro 13B
- 1 punto de recarga (2 prazas) de 22 kW na rúa Progreso 104 ( Casa da cultura)
- 1 punto de recarga (2 prazas) de 22 kW na rúa Carballo do Marco s/n (pavillón de deportes)
O procedemento contou co correspondente prego de cláusulas administrativas que foi publicado durante 30 días no boletín oficial e posteriormente no perfil do contratante con toda a documentación necesaria. Finalmente produciuse a adxudicación mediante o decreto da alcaldía do 14 de xuño de 2022 á empresa Acciona Recarga SL. que foi a que presentou a mellor oferta económica.
- 2.500 €/ano durante os 3 primeiros anos
- 12 % de facturación cun mínimo de 1.937,40 €/ano a partir do terceiro ano.
Con este procedemento a empresa adxudicataria comprométese a utilizar os espazos adxudicados exclusivamente para os fins recollidos nos pregos, así como a solicitar e tramitar as licencias e permisos necesarios para executar as obras que permitan por en funcionamento o servizo.
Os novos puntos de recarga, segundo o rexedor local, Luis Piña, “teñen un importante impacto medioambiental e presta un servizo necesario e demandado pola cidadanía”
Un dos compromisos da alcaldía de Luís Piña e cumprir cos compromisos do Pacto dos Alcaldes para o Clima e a Enerxía para a redución de CO2 , e esta adxudicación é un paso mais. Ademais permitirá ofrecer a cidadanía e posibles turistas que o precisen un servizo máis, sen supor isto ningún coste para o Concello, ao contrario o Concello recibirá unha compensación económica polo uso destes espazos públicos.
Neste momento o punto da rúa Carballo do Marco atópase xa instalado, pero entrará en funcionamento cando teñan todos os puntos preparados. Os outros 2 puntos atópanse na fase de instalación, na que a empresa solicitou os permisos e está pendente deles para poder realizar as obras necesarias para esas instalacións.
