Martes, 6 Maio de 2025

A Guarda retira da costa 75 sacos de plásticos

Redacción
-
0
A Guarda retira da costa 75 sacos de plásticos

O pasado domingo día 21 de xullo a Agrupación Guardesa de Pescadores, Mariñeiros e Mariscadores non profesionais «O Buxeiro» organizou unha gran recollida de plásticos na costa da Guarda. Esta actividade, que contou coa colaboración da Concellería de Medio Ambiente do Concello da Guarda, realizouse por diferentes puntos da costa da Guarda, O Rosal e Oia, participando máis dunha trintena de persoas.

O grupo de voluntarios reuniuse previamente ás 8:00h da mañá na Alameda da Guarda, onde atenderon as explicacións do funcionamento desta actividade e se repartiron os sacos e luvas para poder recoller os plásticos da costa.

De seguido, e repartidos en grupos, os voluntarios desprazáronse a diferentes puntos da costa entre a desembocadura do Río Miño na Guarda e ata a zona das Orelludas en Oia, recuperándose un total de 73 sacos de plásticos, 32 sacos na Guarda, 21 sacos no Rosal e 20 sacos en Oia.

[su_slider source=”media: 2508,2507,2505,2504,2503,2502,2501,2500,2499,2498,2497,2496″ link=”lightbox” title=”no”]

Destacan coma curiosidades que se retiraron da costa numerosos aparellos de pesca, cordas, cordeis, boias, caixas de plástico, pezas de poliéster, mangueiras, así como tamén unha roda dun turismo e varias tubaxes de PVC.

O concelleiro de Medio Ambiente do Concello de Guarda, Xan Lois Lomba, destacou a boa acollida desta actividade, agradecendo a implicación de «O Buxeiro» e a participación dos voluntarios, destacando que este tipo de iniciativas son moi importantes para concienciar aos veciños e veciñas sobre o grave problema da contaminación con plásticos nos nosos mares, á vez que se contribúe á mellora medioambiental do noso entorno.

O Porriño concéntrase en repulsa polo crime machista de Villalba

Redacción
-
0
O Porriño concéntrase en repulsa polo crime machista de Villalba

Eva García, alcaldesa do Porriño presidiu este mediodía a concentración de repulsa polo crime machista acontecido onte en Vilalba. O acto celebrouse diante do Concello, na praza Arquitecto Antonio Palacios coa presenza de veciñas, veciños e representantes dos grupos políticos da corporación municipal do Porriño.

Gardouse un minuto de silencio para repudiar este segundo asasinato por violencia machista ocurrido no que vai de ano en Galicia. A vítima, tiña 48 anos e estaba en trámites de divorcio do seu home que a acoitelou e logo aforcouse, a pesares de terse decretada polo xulgado unha orde de afastamento.

Ao longo deste ano 2019, 33 mulleres foron asasinadas, vítimas de violencia machista. Dende que hai datos rexistrados, concretamente dende 2003, un total 1.008 mulleres morreron a mans das súas parellas ou exparellas.

Baiona acolle «Bailar Agora» no marco de «Mulleres en Acción. Violencia Zero»

Redacción
-
0
Baiona acolle «Bailar Agora» no marco de «Mulleres en Acción. Violencia Zero»

A bailarina e coreógrafa ourensá Marta Alonso Tejada ofrecerá o seu espectáculo «Bailar agora» o vindeiro día 23 de xullo, unha actuación que se enmarca no programa «Mulleres en Acción. Violencia Zero» da Deputación de Pontevedra. A representación terá lugar ás 21.00 horas nos Xardíns da Casa de Navegación de Baiona e ata a vila desprazarase a deputada provincial Iria Lamas.

En «Bailar agora», a artista propón unha parada no corpo para detectar como se instala nel o paso do tempo e situar como se ve afectado polas experiencias, as presións sociais e o contexto. Trátase dunha revisión do vivido e o presente, o aquí e agora do corpo dunha muller de 35 anos que se recoñece e baila. Marta Alonso é bailarina e profesora de ballet clásico, titulada pola Royal Academy of Dance de Londres. Tamén é licenciada en Psicoloxía e está formada en Danza Terapia pola madrileña Fundación Maite de León. O seu traballo como bailarina e creadora está moi ligado á plataforma de creación galega trasPediante, coa que asina e participa en numerosas pezas, e tamén desenvolve unha intensa labor pedagóxica na Escola de Danza Alfaia de Santiago.

A cuarta edición do Programa «Mulleres en Acción. Violencia Zero» reúne o traballo de 25 artistas especializadas en diferentes disciplinas, como a pintura, a música, a poesía, a danza, o teatro, o grafiti e a performance, que levarán ás súas obras por outros tantos concellos da provincia pontevedresa, co obxectivo de dar visibilidade á loita pola igualdade e contra as violencias machistas, ao tempo que serve de escaparate para recoñecer o traballo das mulleres artistas galegas.

AporM acusa ao goberno de Mondariz de “falta de transparencia”

Redacción
-
0
AporM acusa ao goberno de Mondariz de “falta de transparencia”

Alternativa por Mondariz, a forza máis votada nas pasadas eleccións municipais e que quedou fóra do Goberno “por unha non explicada aínda manobra política pola que o PP lle deu á alcaldía ao BNG”, considera que a cidadanía “ten dereito a coñecer o contido do pacto entre os nacionalistas e o PSOE, a que compromisos chegaron ámbalas dúas forzas política”s e de que xeito, estes compromisos, “van repercutir na xestión do Concello e, polo tanto, na vida dos veciños e veciñas do municipio”.

“É triste que a teima que durante o pasado mandato tiñan, tanto BNG como PSOE, coa transparencia, só lles durara unhas semanas. Débenlle á veciñanza unha explicación do seu pacto de goberno” sinala o portavoz de AporM, Xoán Carlos Montes Bugarín.

Aqueles que durante catro anos aseguraban que “a obriga dunha oposición é a de fiscalizar e controlar as accións do Goberno como salvagarda dos intereses da veciñanza”, cambian de discurso “e non consideran, agora que están no goberno, que a oposición teña a lexitimidade para realizar esa labor de control e fiscalización da que tanto alardeaban”.

Para AporM “estamos fronte a un caso claro de dobre moral e de predicar cousas distintas segundo se estea na oposición ou no Goberno. En AporM, por contra, “sempre tivemos unha soa maneira de actuar, fomos coherentes tanto na oposición coma no goberno. Este novo goberno, xa demostrou ser o goberno das contradicións, e lamentablemente seguirao sendo”, conclúe o edil de Alternativa por Mondariz.

Ponteareas publica as bases para participar na XIII Feira dos Remedios

Redacción
-
0
Ponteareas publica as bases para participar na XIII Feira dos Remedios

Cristina Fernández, concelleira responsable da organización de espectáculos e eventos do Concello de Ponteareas, informou da publicación, na web do Concello, das bases que rexerán a participación na XIII Feira Tradicional dos Remedios que terá lugar o 7 de setembro. Como cada ano a Praza Bugallal, así como a súa contorna, acollerá entre as 10 h e as 20 horas os postos dos artesáns e expositores participantes. Este ano a Feira ampliarase e chegará tamén ao parque da Feira Vella.

Todos os e as interesadas en participar deberán inscribirse clikando nesta ligazón. A data límite para inscribirse será o martes 16 de agosto.

A organización da feira valorará tódalas solicitudes recibidas, comunicando o día 21 de agosto a participación ou non a cada expositor na XIII Feira dos Remedios, dándolle preferencia a expositores/as inscritos/as no rexistro de Artesáns de Galicia e a produtores/as locais que cumpran os requisitos de dispoñer da documentación necesaria para o desenvolvemento da súa actividade, así como a aqueles/as que fagan demostración do seu oficio

É requisito imprescindible para os expositores vir ataviado con vestimenta de principios do século XX, sendo cada ano máis numeroso o público que ven caracterizado con roupa desta época.

As persoas interesadas poderán contactar coa organización no seguinte enderezo electrónico: [email protected] ou chamando aos números de teléfono 600 685 573 / 673 080 865

As bases poderán ser consultadas na pestaña ‘Cultura’ ‘bases cultura’ da páxina web do concello ou clikando directamente nesta ligazón.

Esta feira que recreará o ambiente comercial de principios do século XX congregará a artesás de produtos de alimentación, de tecidos, de complementos, de cosméticos ou de gando, entre outros produtos e servizos.

O «Fleur de Passion» amarra no Monte Real

Redacción
-
0
O «Fleur de Passion» amarra no Monte Real

O Monte Real Club de Iates acolle estes días nos seus pantaláns ao Fleur de Passión, o veleiro suízo de 33 metros de eslora que durante o últimos catro anos e medio navegou ao redor do planeta replicando a primeira volta ao mundo de Magallanes e Elcano. O club baionés foi elixido pola Fondation Pacifique (a organización sen ánimo de lucro con sede en Xenebra que lidera a Ocean Mapping Expedition), como escala nas últimas etapas da navegación do veleiro.

Mañá martes continuará rumbo a Lisboa, Faro e Cádiz. Durante a súa estancia no Monte Real, a embarcación permaneceu aberta ao público que desexase visitalo e os alumnos da Escola de Vela do club puideron coñecer máis ao detalle as súas características, subíndose a bordo e escoitando as explicacións da tripulación.

O principal obxectivo do Fleur de Passion na súa travesía ao redor do mundo é ofrecer datos sobre o impacto do home nos océanos, tratando ao mesmo tempo de concienciar sobre a necesidade de poñer en marcha actuacións para evitar a súa deterioración. Os microplásticos, a contaminación sonora, os gases efecto invernadoiro ou o estado de saúde dos arrecifes de coral son algúns das problemáticas que se abordaron nas diferentes escalas do veleiro.

O Fleur de Passion é o veleiro suízo de maior tamaño, un antigo buque dragaminas da armada alemá, construído en 1941 e transformado en veleiro nos anos setenta.

Carmela Silva enxalza o “compromiso do SinSal cos novos valores do século XXI”

Redacción
-
0
Carmela Silva enxalza o “compromiso do SinSal cos novos valores do século XXI”

Os vindeiros días 25, 26, 27 e 28 de xullo a Illa de San Simón acollerá unha nova edición do «Sinsal Son Estrella Galicia», unha das citas dos #FestivaisRíasBaixas que promove a Deputación de Pontevedra e un evento “comprometido cos novos valores do S.XXI: a sustentabilidade do entorno, o compromiso co medio ambiente na loita contra os plásticos e o compromiso coa igualdade, ao ter moitas artistas mulleres tanto no cartel coma na organización”.

Así o puxo en valor esta mañá a presidenta provincial na presentación do festival na lonxa de Cesantes, na que tamén participou a alcaldesa de Redondela, Digna Rivas; o concelleiro de Cultura e Turismo, Daniel Boullosa, e o codirector do festival, Luis Campos. “Amais, como novidade, este ano o festival contará cunha artista trans, o que engade a diversidade como un valor máis do Sinsal”, salientou Silva.

Neste eido, a presidenta da Deputación resaltou que “dende a institución provincial imos traer o noso vídeo Sorrisos transformadores, realizado coa Asociación Arelas, no que o colectivo trans conta o seu desexo de ser feliz cada día”. Durante a súa intervención, Carmela Silva tamén enxalzou a posta en valor no festival “do produto local e ligado a ecoloxía, esta é outra das cuestións que temos que promover”. Un ano máis, a principal característica do Sinsal Son Estrella Galicia é o carácter secreto do seu cartel, “pero malia que aínda se descoñecen, as súas e os seus artistas sempre teñen unha enorme calidade musical”, apuntou Silva e engadiu que “este festival é moi especial porque ten todos os ingredientes para converterse en único”. Pola súa banda, a alcaldesa de Redondela sinalou que “de cara ao ano que vén queremos que toda a veciñanza de Redondela estea implicada neste festival que, tanto a nivel nacional como internacional, ten moitísimo impulso. Estou encantada de que se celebre aquí”.

Tal e como sinalou Carmela Silva, este ano a Deputación de Pontevedra, ao igual que no resto dos festivais, terá no “Sinsal Son Estrella Galicia” unha carpa propia de igualdade para previr o acoso e as agresións sexuais coa campaña «Eu decido, ti respectas». De feito, esta mesma mañá, co obxectivo de amosar as novidades desta terceira edición e o plan de traballo, así como para presentar o balance da pasada edición da campaña neste festival, persoal da Deputación mantivo hoxe un encontro no Salón de Plenos do Concello de Redondela coa alcaldesa, Digna Rivas, representantes da corporación municipal, da Policía Local, da Corporación Nacional de Policía, a psicóloga e a avogada do CIM.

Deste xeito, a Deputación de Pontevedra instalará un punto de información, con cinco axentes de igualdade que entregarán os folletos dirixidos a mozas e a mozos con contidos diferenciados para mulleres e para homes e outros materiais promocionais que van complementar a campaña, adhesivos, sombreiros, tarxetas, pulseiras. Amais, en sintonía coa axenda de sustentabilidade da institución provincial, tamén se instalará un stand informativo pertencentes á campaña «Experiencias Sostibles», que este ano está a concienciar na loita contra os plásticos e nos seus efectos no medio ambiente e na saúde das persoas. En concreto, a campaña de igualdade estará presente o día 28, e a campaña de sustentabilidade desenvolverase durante a xornada do 25 de xullo.

Máis polo miúdo, durante estes catro días de festival, a illa de San Simón vaise encher de música, gastronomía, lecer e moitas outras actividades. Así, nos últimos anos pasaron pola illa artistas coma Alt- J, Maika Makovski, Camila Moreno, Anna Meredith ou Malándromeda, entre outras e outros artistas. Na última edición, o «Sinsal Son Estrella Galicia» recibiu a preto de 3.000 visitantes durante as dúas xornadas, das cales 650 pasaron polo stand de Igualdade da Deputación onde se prestou asesoramento e, amais, no marco da campaña de Turismo Sustentable repartíronse preto de 700 ecocabichas.

A Xunta financia un programa de proximidade no rural para persoas con enfermidade mental

Redacción
-
0
A Xunta financia un programa de proximidade no rural para persoas con enfermidade mental

A conselleira de Política Social, Fabiola García, salientou os bos resultados do servizo de atención comunitaria e de proximidade no rural para persoas con enfermidade mental, financiado pola Xunta de Galicia e xestionado pola Asociación Avelaíña e a Federación de Asociacións de Familiares e Persoas con Enfermidade Mental (Feafes-Galicia). Fíxoo esta mañá durante a visita a unha das instalacións nas que se realizou este proxecto.

Fabiola García indicou que esta iniciativa, que se desenvolveu durante o ano pasado, foi “un éxito”. Con ela atendeuse a 160 persoas de 34 municipios diferentes. En concreto, os ámbitos de actuación das accións levadas a cabo foron as provincias de Pontevedra, A Coruña e Lugo.

A Xunta de Galicia destinou 100.000 euros a través dun convenio de colaboración con Feafes para financiar este proxecto co que se realizaron actividades como apoio emocional, a mediación da situación familiar e o acompañamento en actividades de ocio e culturais, en trámites e asesoramentos de servizos sociais.

Neste sentido, a conselleira de Política Social gabou o traballo da Asociación Avelaíña, así como o das 14 entidades que integran a federación, centrado en mellorar a calidade de vida das persoas que sofren esta doenza e tamén das súas familias. Ademais, destacou a importancia de seguir a achegar servizos ao rural para apoiar a permanencia das persoas na súa contorna habitual.

Así mesmo, Fabiola García salientou que a Xunta de Galicia continuará a traballar da man de asociacións que comparten o obxectivo do Goberno galego de romper barreiras e tabús, para ofrecer cada día máis oportunidades ás persoas con enfermidades mentais. Nesta liña, recordou que a Administración autonómica destina 1,4 millóns de euros a Feafes, isto é, un millón máis do que se lle achegaba hai un década.

O «XXVI Encontro dos Pobos» achega á Guarda a música e floclore de Polonia, Austria e Galicia

Redacción
-
0
O «XXVI Encontro dos Pobos» achega á Guarda a música e floclore de Polonia, Austria e Galicia

«Encontro entre pobos», o festival folclórico internacional máis veterano da Comarca do Baixo Miño chega un ano mais, e xa van 26 edicións, percorrendo diferentes concellos, sendo no Rosal o xoves 25 de Xullo; en Tomiño o venres 26 de Xullo; na Guarda o sábado 27 de Xullo e en Oia o domingo 28 de Xullo.

Este Encontro dos Pobos, que nace cunha finalidade de intercambio cultural, achegará á nosa comarca, aparte de grupos locais, un grupo procedente de Polonia e outro grupo de Austria.

Dende Polonia contarase co grupo Poligrodzianie, procedentes de Poznan, un grupo devolve o intercambio ao grupo guardés Do Lusco ó Fusco, que estivo na súa cidade o pasado ano no mes de agosto.
É a institución folclórica máis antiga do entorno académico de Poznan, pertence á Universidade de Tecnoloxía. Considerado como un dos grandes embaixadores da cultura polaca, teñen percorrido millóns de quilómetros nas máis de 100 xiras que teñen realizado percorrendo todo o mundo. Malta, Malasia, Corea do Sur, China, Irlanda, México, Italia, USA, Suecia, Canadá, Croacia e un longo etc.

Por outra banda, contarase co grupo austríaco, Steirischer Schwung, que veñen dende Stiwoll, unha localidade ao sur de Austria.

Nas súas actuacións realizan bailes de toda Austria, sendo un ben representativo o Schuhplattler, bailado só polos homes que acompañan á melodía. Teñen participado en festivais en Alemaña, Dinamarca, Francia, Suecia, Croacia, etc.

Coa súa visita a nosa comarca, comeza o intercambio que o grupo Do Lusco ó Fusco vai a realizar, acollendo esta semana na nosa comarca e repetíndoo o vindeiro ano no mes de agosto.

No concerto do sábado na Guarda, que terá lugar ás 22:00 h na carpa da Festa do Peixe Espada no Porto da Guarda, contarase coas actuacións de Xamaraina, Vento Mareiso, Do Lusco ó Fusco, Steirischer Schwung e Poligrodzianie.

Ponteareas concede 150.000 euros de axudas ás traídas veciñais de auga

Redacción
-
0
Ponteareas concede 150.000 euros de axudas ás traídas veciñais de auga

O Concello de Ponteareas vén de conceder 150.000 euros en axudas ás traídas veciñais da localidade. Así o anunciou o alcalde Xosé Represas quen salientou a importancia destes colectivos “que se encargan desinteresadamente de asegurar un servizo básico e de calidade para a poboación como é o abastecemento de auga”. Represas lembrou que “con esta concesión dase continuidade a un apoio que iniciamos o ano pasado e que se manterá durante todo este mandato”.

O alcalde ponteareán explicou que “deste xeito consolidamos unha convocatoria de subvencións transparente e equitativa para as traidas veciñais e deixamos atrás os tempos de mendigar axudas no despacho do alcalde. Temos un compromiso absoluto coa xente que presta un servizo tan importante para a veciñanza”.

Un total de 13 comunidades de 11 parroquias son as beneficiarias deste reparto co cal se cubre até o 80% do investimento e até un máximo de 18.000 euros en obras a realizar polas traídas nas súas parroquias durante este ano. Na convocatoria deste ano presentáronse 34 solicitudes e, segundo Represas, “as peticións que non puideron ser atendidas terán prioridade na convocatoria que se abrirá en xaneiro de 2020”.

O alcalde amosouse satisfeito pola actual etapa de colaboración e traballo conxunto coas traidas veciñais. “O noso obxectivo é que nestes catro anos non haxa nin unha soa vivenda sen abastecemento de auga en Ponteareas e para logralo é fundamental apoiar ás traidas veciñais”, recalcou Represas.

Redacción
-
0

O Concello de Nigrán vén de dar por rematada a instalación dos cabicheiros ou “dispensadores” de cabichas nas praias de Patos, Area Fofa, A Madroa, Panxón e Lourido. O obxectivo desta campaña é que as persoas fumadoras “sexan máis conscientes do daño que sufren os nosos areais e noso medio Ambiente si deixamos as “cabichas” soterradas na praia”, explican dende o Concello que preside Juan González.

A construcción dos máis de 20 “dispensadores de cabichas” foi levada a cabo polos alumnos do taller de carpintería do Centro de a educación especial Juan María o que fai que a campaña non só teña un un obxectivo medioambiental senón tamén de integración. Dende o concello de Nigràn, e despois do éxito da campaña #SanXoanSenLixo, aseguran estar convencidos que “a concienciación social eva implicación dos ciudadanos no respeto á natureza é moito máis efectiva que a prohibición”.

O Rosal acolle, o 24 de xullo, o terceiro festival «Xente Xida»

Redacción
-
0
O Rosal acolle, o 24 de xullo, o terceiro festival «Xente Xida»

A Asociación Cultural Xida, en colaboración co Concello do Rosal e a súa Concellería de Cultura, vén de presentar a terceira edición do festival  presentamos este ano 2019 a terceira edición do festival «Xente Xida», actividade que se desenvolverá o vindeiro 24 de xullo da Praza do Calvario, a partir das 20:30 horas, con entrada totalmente libre e gratuíta. Serán preto de trinta artistas os que pasarán polo escenario, profesionais de primeiro nivel que, asegura a organización “farán bailar e cantar a todos os presentes”.

O programa prevé a actuación de Nadia Vázquez Trío, unha formación que une a tres músicos galegos: Fernando Estévez (Clarinete e Percusión),Martiño Malleiro (Acordeón) e Nadia Vázquez (Gaita) artista local que conta con inumerables títulos e premios no eido da gaita. Un formato que explora tanto repertorio de ámbito rural, como música de autor.

Xabier Díaz e Adufeiras de Salitre: 15 músicos en escena para un directo poderoso coa clara intención de revisar ao vivo o repertorio da grabación que Xabier e este grupo de 12 cantoras e percusionistas están presentando acompañadas de Gutier Álvarez (violín e zanfona) e Javier Álvarez (acordeón diatónico). Humildes e poderosos a un tempo, adufes, pandeiretas, cunchas, pandeiras. Todo un exército de parches para montar unha foliada de dimensións ciclópeas.

Zurrumalla: formación con máis de doce anos estudando e tocando por toda Galicia a música tradicional, conseguen de cada actuación unha festa; cun estilo musical baseado no tradicional e achegándose a un folk propio, aportan composicións e arranxos que farán as ledicias do público. Unha sorpresa de vitalidade, e novos aires na nosa música.

O festival non só permite gozar da mellor música do país, senón tamén coa gastronomía con porco o espeto e pratos tradicionais, amais de atraccións para os máis pequenos, O Trebón dos Xidos, sorteos e agasallos para os presentes… todos os complementos para facer deste festival «Xente Xida» unha festa grande, con raíces, para tódolos públicos e para tódalas idades.

A Deputación pon a disposición dos concellos «D’Pedra», exposición da escola de cantería

Redacción
-
0
A Deputación pon a disposición dos concellos «D’Pedra», exposición da escola de cantería

A Deputación de Pontevedra pon a disposición dos concellos da provincia unha nova exposición do traballo en pedra da Escola de Cantería. Trátase da mostra «D’Pedra», composta por unha vintena de pezas de diversa temática elaboradas polas alumnas e alumnos da Escola. Son pezas exteriores de granito que na súa meirande parte representan oficios, animais, sentimentos ou escenas da vida cotiá.

«D’Pedra» é unha exposición que non só fai fincapé na actividade que mozas e mozos desenvolven neste centro de formación, senón que tamén serve como elemento dinamizador da cultura e a idiosincrasia galega. Entre os seus obxectivos figura a achega da arte do traballo en pedra ás xeracións máis novas, para que poidan descubrir este oficio tradicional. As pezas que se exhiben son obra de Patricia Pazó Vázquez, Alejandro García Álvarez, Marcos Lareo García, Álvaro Somoza López, Rubén Gil Rodríguez, Santiago Rey López, Marcel Kahlbrandt, José Sampedro Caamaño, Jonathan Mariñas García, José Gómez de Bernardo, Lorenzo Lede Mouriño, Jonathan López Otero e Jason Pérez.

Os concellos xa poden informarse e solicitar esta mostra a través do formulario dispoñible na sede electrónica da Deputación de Pontevedra. Ao igual que sucedeu o ano pasado coa exposición «Nado en Pedra», esta nova mostra poderá solicitarse por un prazo máximo dun mes e cada concello asumirá o traslado e a instalación das esculturas, ademais de encargarse da súa protección.

A Escola de Cantería naceu no ano 1979 coa finalidade de poñer en valor un dos oficios máis antigos de Galicia e ao longo da súa traxectoria, numerosos mestres e mestras canteiros formados na Escola teñen deixado a súa pegada no patrimonio arquitectónico de Galicia e diversos lugares do mundo. Así, os seus traballos están presentes en Fortaleza (Brasil), Maracaibo (Venezuela), Manila (Filipinas), La Paz (Bolivia), Nova York (Estados Unidos), Querétaro (México), Buenos Aires (Arxentina) o Montevideo (Uruguai) entre outros países.

Ademais, o alumnado ten participado nas obras de restauración de emblemáticos monumentos, como a A Sagrada Familia de Barcelona, a catedral de Santiago, a catedral de Westminster de Londres ou mesmo as obras de recuperación do edificio do Capitolio de Washington.

Marta Valcárcel presenta o programa de actividades «Vive agosto en Salvaterra»

Redacción
-
0
Marta Valcárcel presenta o programa de actividades «Vive agosto en Salvaterra»

A alcaldesa de Salvaterra de Miño, Marta Valcárcel Gómez, vén de presentar a programación que, durante o mes de agosto, ofrecerá o Concello e que se desenvolverá baixo o lema «Vive agosto en Salvaterra». A programación cultural presentada, como xa é habitual no concello fronteirizo, é “variada, para todos os gustos e idades, un programa feito e pensado para desfrutar en familia”, sinala a rexedora local. Valcárcel subliña o feito de que é unha “programación cultural de calidade, con propostas diversas e cargada de actividades e festas”.

Cine, concertos, folclore internacional, folk, música, humor, Bandas de Música e gastronomía terán o seu espacio neste «Vive agosto en Salvaterra» que como Marta Valcárcel asegura “acada unha dimensión transfronteiriza a través da Eurocidade Monção–Salvaterra”.

A programación deste amplo programa cultural iníciase, un ano máis co Festival de Bandas que terá lugar o día 27 de xullo. O luns 29 de xullo, no Recinto Amurallado, veciñanza e visitantes poderán gozar doutro clásico dentro da programación cultural estival de Salvaterra de Miño: o festival O Mundo A Danzar.

Xa o xoves 1 de agosto, será a quenda dos grupos de Baile Moderno do Casal, Baile Hip–Hop Casal e grupo Vai de Baile de Lira. O venres 2 de agosto, na prazas do Concello, celebrarase o festival da A.C. Pontenova.

O Son da Muralla, outra cita habitual do verán de salvaterra e considerado xa como o maior festival DJ de Galicia ao aire libre, chegará á vila fronteiriza o sábado 3 de agosto no marco excepcional que ofrece o recinto amurallado.

O mércores 7 de agosto os máis cativos poderán desfrutar da Festa da Espuma no Parque Público A Canuda.  O xoves 8 de agosto chega o teatro coa comedia de «Circo Chosco» Riscando o Ceo.

O venres 9 de agosto, será a quenda da música coral e de banda, coa actuación conxunta das corais do municipio acompañadas pola Banda de Música de Salvaterra, actuación que terá lugar na Praza do Concello.

O sábado 10 de agoso, a música dos 60, 70 e 80 será a protagonista con Imos De Guateque, unha iniciativa que cada a no vai a máis e na que, as persoas que acudan caracterizados da época, participarán no sorteo dunha viaxe. O mércores 14 de agosto, os nenos e nenas volverán a ser protagonistas coa actuación de Coliño Bailongo e espectáculo infantil Canta Baila con «A Guagua Animación». O xoves 15 e venres 16 de agosto o cine ao aire libre chega a Salvaterra coas proxeccións, na Muralla, das películas infantís Los Increíbles 2 e Leo Da Vinci, Misión Mona Lisa.

Finalmente, como previa á Festa do Viño do Concado, o luns 19, martes 20 e mércores 21 de agosto terán lugar os cursos de Cata, con prazas limitadas polo que é precisa inscricióin previa. O punto e final a este «Vive agosto en Salvaterra» o poñerá a Festa do Viño do Condado do Tea, que, con esta, chega a súa 60 edición. Viño, música, gastronomía danse a man nunha conxunción perfecta que fan desta celebración, unha das mellores de Galicia. A música correrá a cargo dos concertos de Lys Pardo, La Supersonic, Budiño, Monoulipus Dop, 2con2 e 21 Gramos.

México, Serbia e Guinea Bissau, protagonistas da «XX Noite Internacional do Miño» de Tui

Redacción
-
0
México, Serbia e Guinea Bissau, protagonistas da «XX Noite Internacional do Miño» de Tui

O folclore de México, Guinea Bissau e Serbia protagonizará a vixésima edición da Noite Internacional do Miño. A cita será o próximo martes, 23 de xullo, ás 21:30 h no Parque do Laxal en Rebordáns. Este evento está organizado pola Escola de Baile e Música San Fins de Rebordáns coa colaboración do Concello de Tui, a Comunidade de Montes en Man Común de Rebordáns e a Deputación de Pontevedra.

Dende hai dúas décadas este evento convértese cada ano nun escaparate do folclore máis internacional a través de grupo de Europa, América, África, Asia e Oceanía, que teñen participado en cada edición. O público ateiga anualmente o recinto do Parque do Laxal para gozar dun evento de gran colorido e cheo de diferentes ritmos tradicionais, todo nun escenario presidido por unha lúa tocando a gaita, a imaxe desta Noite Internacional.

Nesta ocasión serán o Grupo Cultural Netos de Bamdin de Guinea Bissau, Folk Ballet Ensemble Simyonov de Serbia e Compañía Nacional de Danza Folclórica de México os que nos acheguen o seu folclore.

O Grupo Cultural Netos de Bamdin de Guinea Bissau naceu no ano 2000 co obxectivo de crear un ambiente de integración sociocultural para os cativos e a mocidade do barrio de Bandim nun contexto de posguerra empregando coma vehículo para conseguilo a música, o teatro e a danza. Ao tempo buscan tamén pór en valor e divulgar o patrimonio cultural de Guinea.

O Folk Ballet Ensemble Simyonov de Serbia foi fundado en 1986 por Dejan Simeonovski. Dende entón nos seus espectáculos presenta a riqueza do folclore serbio mesturando a arte coa vitalidade do pobo serbio. Os seus traxes, bailes e música destacan pola súa autenticidade, beleza e variedade.

A Compañía Nacional de Danza Folclórica de México creouse en 1975 achegando dende entón nos seus espectáculos por Europa e América a riqueza e colorido do folclore mexicano.

Ponteareas mellora o procedemento para autorizar espectáculos públicos

Redacción
-
0
Ponteareas mellora o procedemento para autorizar espectáculos públicos

O concelleiro de Bo Goberno, Transparencia e Participación Cidadá, Roberto Mera, manterá un encontro con colectivos sociais e hosteleiros que promoven a celebración de espectáculos públicos. O obxecto desta reunión –que terá lugar o vindeiro martes ás 20:30 h, na sala multiusos do Auditorio Reveriano Soutullo–, é informar sobre o procedemento de autorización de espectáculos en espazos públicos e presentarlle o formulario deseñado para a solicitude de espazos públicos.

Nas últimas semanas a concellaría realizou unha revisión do procedemento implantando un novo método que permite gañar en eficacia, axilidade e seguridade. O procedemento adaptouse á nova Lei de Espectáculos de Galicia e, segundo Mera, “permite protexer e dar seguridade xurídica aos promotores e organizadores de eventos e ao público que asiste ao mesmo, ao esixirse o seguro de responsabilidade civil así como a certificación de que as estruturas e instalacións que se empreguen, como carpas ou escenarios, cumpren coa normativa en materia de seguridade”. O novo procedemento garante ademais a coordinación de todas as concellarías que interveñan no evento, ao tramitarse desde unha única unidade administrativa municipal.

Para facilitar a tramitación das solicitudes o Concello elaborou un completo formulario no que os interesados deben recoller todos os datos do evento, incluidos os horarios de inicio e finalización, así como as estruturas e instalacións que van empregar. No mesmo formulario os promotores poden concretar a colaboración que solicitan do concello, como iluminación, Protección Civil ou Policía Local, colectores de lixo, etc. O formulario tamén recolle unha serie de pautas ás que deben atender os promotores, entre elas, facer a solicitude con 45 días de antelación, non anunciar o evento mentres non estea autorizado, deixar o espazo en perfecto estado de limpeza e cumprir os horarios nos que se autorice o evento. Roberto Mera revisará cos e coas asistentes este formulario e incorporará as posibles aportacións que se suxiran se así se acorda.

Esta medida enmárcase no obxectivo do Goberno local de mellorar a convivencia cidadá.

As DepoAndainas deste ano amplian as súas rutas e comprométense co medio ambiente

Redacción
-
0
As DepoAndainas deste ano amplian as súas rutas e comprométense co medio ambiente

A presidenta da Deputación de Pontevedra, Carmela Silva, deu a coñecer esta mañá a cuarta edición das DepoAndainas, un programa totalmente gratuíto que arranca a comezos de agosto con novas propostas e unha aposta decidida polo Medio Ambiente. Neste eido, tal e como informou Silva, esta edición amplía as rutas con dúas novas, pasando de cinco a sete, e inclúe os desprazamentos en autobús “na liña do compromiso adquirido en prol da sustentabilidade, fomentando o transporte público para minimizar as emisións de CO2”.

As DepoAndainas están dirixidas a todas as persoas da provincia (independentemente da idade) e teñen por obxectivo fomentar hábitos de vida saudable ao tempo que promover o turismo. Amais, esta iniciativa ten un marcado compromiso co Medio Ambiente e así, amais da inclusión dos desprazamentos en autobús con saídas dende a Praza de Galicia de Pontevedra e da Praza de España de Vigo, tamén se van impulsar charlas de concienciación e sensibilización en cada unha das sete andainas. Xunto ao compromiso medioambiental, a cuarta edición das DepoAndainas tamén vai impulsar o turismo activo, deixando tempo libre adicional ao remate da actividade ás persoas participantes para que poidan afondar nos recursos turísticos da provincia de Pontevedra. Neste mesmo eido, durante as andainas, tamén se achegará información relativa a aspectos do patrimonio cultural e histórico.

Máis polo miúdo, a primeira andaina terá lugar o 4 de agosto polo paseo fluvial das marismas de Catoira e o prazo de inscrición comeza este luns, 22 de xullo. A segunda ruta será pola fervenza do Toxa en Silleda o 11 de agosto (abre o prazo o 29 de xullo) e a terceira o día 18 polo parque forestal da Illa da Toxe e pola ruta das pasarelas de Pedras Negras no Grove (abre o prazo o 6 de agosto). A seguinte ruta terá lugar o 1 de setembro polo parque A Canuda e o paseo fluvial da Illa Fillaboa en Salvaterra de Miño (o prazo de apertura de inscricións abre o 19 de agosto) e o 22 de setembro a quinta andaina polo Bosque encantado en Cangas e polas Illas Cíes en Vigo (abre o prazo o 2 de setembro). Xa en outubro terán lugar as dúas últimas rutas, o día 6 polo monte de Santa Trega na Guarda e os muíños do Folón no Rosal (a inscrición abre o 23 de setembro) e o 12 pola ruta da Pedra e da Auga de Ribadumia (abre o prazo o 30 de setembro).

En total ofértanse 300 prazas por andaina, é dicir, un total de 2.100 prazas. Ademais, e tamén como novidade, este ano os concellos polos que transcorren as andainas poderán ofertar ata 50 prazas adicionais. As persoas interesadas en participar nos percorridos deberán cumprimentar o impreso de solicitude na páxina web www.depo.gal. Ao respecto, a presidenta provincial animou a pechar as inscricións “o máis rápido posible xa que se esgotan en poucas horas as prazas dispoñibles”.

Amais das DepoAndainas a Deputación de Pontevedra ten tamén en marcha outras iniciativas deportivas este verán como o DepoDesafío ou as DepoRutas BTT. En canto á primeira actividade, quedan pendentes a carreira a pé por Vilagarcía (27 de xullo), o trail por Cuntis (8 de setembro) e o triatlón en Vigo (13 de outubro). No que respecta ás DepoRutas BTT comezan a súa andadura o 25 de agosto en Meis (abre o prazo de inscrición o 29 de xullo) e continúan o 15 de setembro en Silleda (o prazo para participar abre o 26 de agosto), o 29 do mesmo mes en Nigrán (inscricións dende o 16 de setembro), o 20 de outubro en Salceda (abre o prazo para participar o 30 de setembro) e rematan o 27 de outubro en Cangas (inscrición a partir do 7 de outubro).

Os libros, en Ponteareas, saen ás rúas

Redacción
-
0
Os libros, en Ponteareas, saen ás rúas

A concellería de Cultura e Lingua do Concello de Ponteareas, que dirixe Fernando Groba, vén de instalar catro puntos de lectura ou catro ‘casiñas’ con libros viaxeiros, en outros tantos puntos da vila e que permitirán, segundo o Concello ponteareán, “encher de creatividade os momentos de lecer”. É un xeito de que a Biblioteca Municipal, saia do seu entorno habitual e, literalmente, saia ás rúas.

As casiñas dos libros viaxeiros están no parque Ferro-Ucha, na Praza Maior, no Parque da Perillana e nos Xardíns da Casa do Concello. Calquera persoa pode achegarse a estas casiñas e gozar da lectura porque, nas casiñas viaxeiras, pódense atopar libros de tódolos xéneros e para todos os públicos.

Todos e todas as que o desexen poden incorporar libros ás casiñas viaxeiras que comezaron a súa andaina pola vila cun lote inicial aportado pola biblioteca municipal. A concellería de Cultura e Lingua supervisa que exista un reparto equitativo nas catro casiñas do centro urbano.

Cayetano Lledó presenta o vindeiro xoves na Guarda o seu espectáculo de maxia

Redacción
-
0
Cayetano Lledó presenta o vindeiro xoves na Guarda o seu espectáculo de maxia

O vindeiro xoves día 25 de xullo o Auditorio de San Bieito da Guarda acolle o espectáculo de Maxia «Lafayette Show» a cargo de Cayetano Lledó, un produtor e distribuidor de teatro, ilusionista e actor de improvisación galego. O evento arrancará ás 20:30h cun espectáculo de maxia teatralizada, con comedia e humor, apto para todos os públicos. Teatro e ilusionismo con maxia musical, manipulación de cartas e obxectos, clown, cambios de vestuario, números de mentalismo, hipnosis, pantomima, danza…

As obras de Cayetano Lledó están baseadas na comedia e na maxia cómica. Ten participado en moitos festivais internacionais de ilusionismo, e ten desenvolvido a súa maxia en diversos países europeos.

Hoxe en día, a súa actividade profesional versa ao longo de dúas liñas de traballo: por unha banda, a investigación e desenvolvemento de efectos máxicos aplicados á escena; e pola outra, a interpretación, produción e distribución de espectáculos de maxia teatralizada.

Chega á Guarda con gañas de dar a coñecer aos veciños e visitantes da Guarda o seu traballo e facelos partícipes do mesmo, cun show que gustará a pequenos e maiores.

A Biblioteca de Chapela ofrece un contacontos para os máis cativos

Redacción
-
0
A Biblioteca de Chapela ofrece un contacontos para os máis cativos

A Biblioteca ‘Xela Arias’ de Chapela acolle, o luns 29 de xullo ás 11:30 horas un contacontos dirixido ás e aos máis cativos da casa. De feito, as Bibliotecas Municipais de Redondela cualifican a esta actividade como un ‘bebecontos’ que ten a finalidade de esperar, entre os máis pequerrechos, o gusto pola palabra e polos libros. 

A actividade correrá a cargo de Trémola Teato que ofrecerá ás e aos mais pequenos o contaconcos titulado Que animaliño é?, dirixido aos nenos e nenas con idades comprendidas entre os 6 meses e 4 anos.

Este bebecontos –que conta do apoio do programa Ler conta moito da Rede de Bibliotecas de Galicia– é totalmente de balde e con capacidade limitada, polo que é preciso realizar inscrición gratuita previa. Dita inscrición pode formalizarse na Biblioteca de Chapela (horario de verán: de luns a venres, de 9:00 h a 14:00 h), por teléfono no 986 454 226 ou no enderezo de correo electrónico [email protected]

O Rosal sairá á rúa en defensa da Sanidade Pública

Redacción
-
0
O Rosal sairá á rúa en defensa da Sanidade Pública

O progresivo empeoramento do sistema de sanidade pública que se en Galicia afecta, especialmente, aos municipios do rural e O Rosal non se escapa a este problema que as autoridades sanitarias non parecen saber, –ou querer– atallar.

O vindeiro martes 23 de xullo está convocada unha concentración na Praza do Calvario do Rosal, ás 20:30 h á que poderá asisitir toda a veciñanza, e na que a alcaldesa, Ánxela Fernández Callís exporá os motivos polos que o Rosal precisa de unha mellor asistencia sanitaria.

Tal e como explica o Concello do Rosal, a Alcaldía tivo coñecemento extraoficial, por notificación oral do responsable do Centro de Saúde do Rosal, o doutor Antonio Tato Fontaíña, de que desde o día 25 de xullo, o Centro de Saúde de San Miguel de Tabagón deixará de contar co seu médico por un permiso concedido á titular ata finais do presente mes.

Por outra parte, o citado facultativo tamén informou ao Concello que nos meses de xullo e agosto “non van ser cubertas as vacacións dos dous médicos titulares do Centro de Saúde do Rosal e que o médico do Centro de Saúde de San Miguel de Tabagón desprazarase para atender tanto aos seus pacientes como aos do outro médico no Centro de Saúde do Rosal, quedando así novamente sen atención médica o citado Centro de San Miguel de Tabagón”.

As consecuencias prácticas de todos estes feitos, de materializarse, serían que durante todo este tempo o municipio contaría tan só con dous profesionais médicos na Atención Primaria, cando habitualmente conta con tres e que os pacientes do Centro de Saúde de San Miguel deixarían de ser atendidos no seu Centro de Saúde para ser atendidos no Centro de Saúde do Rosal. Esta información foi confirmada polo Concello nunha conversa telefónica mantida onte con Félix Ruibal, xerente de estrutura organizativa de xestión integrada do SERGAS.

Segundo explica o Goberno local, esta situación vense repetindo sistematicamente nos últimos anos, dando como resultado “un deterioro inadmisible da calidade da Atención Primaria no noso concello que, por outra parte, non conta xa habitualmente co persoal sanitario que lle correspondería”. Cómpre salientar que O Rosal, é o Concello da Comarca do Baixo Miño cun peor rateo de pacientes por persoal sanitario e persoal médico, superando todos os máximos recomendados polas diferentes organizacións de saúde. Este feito constatouse no acordo plenario aprobado pola unanimidade do pleno o pasado 30 de marzo de 2019 do que, o Concello, ofrece algúns datos que corroboran estas afirmacións.

  • O Concello do Rosal conta, para unha poboación estimada aproximada de 6.349 habitantes, cunha dotación de persoal sanitario formada por 3 médicos de familia, 3 enfermeiras, unha pediatra que pasa consulta tres días por semana e 1 auxiliar de enfermería. O persoal médico ten un total de 4.701 Tarxetas Individuais sanitarias (TIS), repartidas por médico en 1.502, 1.643 e 1.556 respectivamente.
  • A OMS recomenda unha rateo de pacientes por médico máximo de 1.200. Pola súa banda, a Sociedade Española de Médicos de Atención Primaria (SEMERGEN) recomenda unha rateo de 1.300 pacientes por médico e indica que esta non debería superar nunca os 1.500. No caso do Rosal, todo o persoal médico ten unha rateo que excede tanto as recomendacións como os máximos admisibles. Neste caso, e tendo en conta o número de habitantes, ao Rosal corresponderíalle 1 médico/a e 2 enfermeiros/as máis, ademais de 1 pediatra con dedicación total e unha matrona.
  • Polo tanto, tal e como se expuxo, ao non cubrirse con persoal substituto as vacacións dos médicos titulares, quedarían soamente dous médicos para atender a un total de 4701 pacientes, e é por iso que desde esta alcaldía lembrámoslle que a súa obriga é a de garantir un servizo de Atención Primaria que cubra as necesidades da poboación, polo que esperamos que modifiquen a súa decisión e cubra con persoal contratado as vacacións, baixas e permisos do persoal médico dos nosos Centros de Saúde.

A alcaldesa do Rosal, Anxela Fernández Callís deixa claro que, dende o Goberno local “apoiaremos e defenderemos a Sanidade Pública. Faremos todo o que estea na nosa man para conseguir que a Consellería de Sanidade e o SERGAS cumpran coa súa responsabilidade e garantan o servizo habitual de Atención Primaria do noso Concello”.

Susana Seivane, o sábado en Salceda ao abeiro do programa «Musigal 2019» da Deputación de Pontevedra

Redacción
-
0

Mañá sábado, Susana Seivane ofrecerá un concerto en Salceda de Caselas ao abeiro do programa «Musigal 2019» da Deputación de Pontevedra. Seivane é unha gaiteira cun estilo musical tradicional dos antigos gaiteiros aínda que tamén incorpora ás veces influencias doutros estilos musicais.

Keep on reading!

Ponteareas inaugura o parque de calistenia e workout

Redacción
-
0
Ponteareas inaugura o parque de calistenia e workout

O concello de Ponteareas convida a toda a veciñanza á inauguración do parque de calistenia e street workout que terá lugar este venres día 19 de xullo ás 19:00 horas no parque Ferro-Ucha. Esta nova zona deportiva financiouse con fondos propios cun custo total de 22.709 € e conta con 210 metros cadrados, no que se inclúe un parque de calistenia de 180 metros cadrados e un circuito aeróbico de 80 metros cadrados.

A partir das sete da tarde de mañá venres a mocidade poderá participar na exhibición, no obradoiro e na quedada workout que organiza a concellería de Mocidade, que dirixe Miguel Bouzó. Esta actividade está enmarcada no programa Mocidade Viva deseñado en colaboración cos mozos e mozas de Ponteareas que participaron na consulta realizada para a configuración de todas as actividades que se ían incluir no primeiro programa específico para a mocidade no concello de Ponteareas.

O parkour, o breakdance, o graffiti e as actividades que implican o desenvolvemento de expresións artísticas na rúa foron as máis demandas pola mocidade, “por iso dende a concellería de Mocidade continuamos coa nosa aposta por ofrecerllas ás nosas mozas e mozos que poden, deste xeito, atopar na súa cidade entretemento e espazos de convivencia”.

Fomentar a práctica deportiva aproveitando os espazos naturais que ofrece a cidade é o obxectivo desta iniciativa que promove a concellería de Deportes que tras unha consulta popular a través das redes sociais decidíu ubicalo neste céntrico pulmón verde.

Os diferentes módulos destinados ao exercizo distribúense ao longo de toda a superficie situando sobre o terreo o circuito aeróbico e executando a área da superficie de destinada a calistenia sobre area de sílice de río. A zona está perimetrada cun borde de madeira de piñeiro para evitar que a area se espalle.

O parque de calistenia ten un cubo, un monkey bar horizontal, un banco para abdominais, unha parede sueca, barras de dominada triple francesa e barra dominada clásica, un monkey bar de dous niveis, un monkey bar serpe e barras paralelas.

Pola súa banda o circuito aeróbico componse dun elevador-flexión de brazos, un aparello de cintura, outro de remo, outro para adestramento de torso e outro para extensión de xeonllos.
Na liña da estratexia “Ponteareas, Hábitat Saudable”, esta nova iniciativa do goberno de Ponteareas busca promover hábitos de vida saudables e a interacción respetuosa da cidadanía co medio ambiente.

O obradoiro ‘Percorre Tui’ realizou visitas para os participantes no campamento de ‘Un Máis’

Redacción
-
0
O obradoiro ‘Percorre Tui’ realizou visitas para os participantes no campamento de ‘Un Máis’

Alumnado da especialidade de ‘Promoción turística local e información ao visitante’ do obradoiro de emprego ‘Percorre Tui’ realizaron ao longo desta mañá varias visitas guiadas para os nenos e nenas de 4 a 18 anos que están a participar no campamento inclusivo que dende comezos de mes imparte a Asociación Un Máis.No campamento están a participar 25 nenos e nenas, dos que 13 teñen TEA, xunto a voluntarios e monitores.

Tratouse dunhas serie de visitas moi especiais, e en grupos reducidos, nas que os guías, cunha linguaxe sinxela e apoiados por pictogramas, explicaron aos pequenos visitantes as características do Centro de Interpretación “Tui, Camiño de Santiago” situado no antigo convento de San Domingos. Así puideron coñecer algunhas pinceladas da historia do edificio, percorrendo o seu interior, como o claustro dende onde admiraron o campanario da igrexa de San Domingos, e tamén as caixas luz que ilustran cada unha das etapas até Santiago.

Precisamente para esta ocasión colocáronse amais fotografías das visitas que os participantes no campamento de Un Máis realizaron xa a algúns puntos do Camiño como a Catedral de Tui, O Porriño ou Redondela. No remate entregáronlles e seláronlles a Credencial de Visita ao Centro de Interpretación, convidándoos a realizar un debuxo daquilo que máis lles gustou durante a visita.

A concelleira de Emprego e Formación, Ana Mª Núñez, e o concelleiro de Turismo e Patrimonio, Laureano Alonso, acompañaron ao primeiro grupo que participou nesta iniciativa que busca tamén formar dende a sensibilización á diversidade ao alumnado do obradoiro. O director do Obradoiro, Rodolfo Villalba, explicou precisamente que entre as actividades que levan a cabo no obradoiro está o deseño e promoción de rutas no municipio, polo que consideraron axeitado realizar esta actividade de inclusión. Ana Isabel Vila Pereira, directora e psicóloga de Anarela e coordinadora do Campamento, salientou o positivo desta actividade que espertou o interese entre os cativos e cativas.

Ponteareas elaborará un Plan de Convivencia e Civismo para mellorar a calidade de vida

Redacción
-
0
Ponteareas elaborará un Plan de Convivencia e Civismo para mellorar a calidade de vida

O Concelleiro de Bo Goberno, Roberto Mera, anunciou o inicio dos traballos de elaboración dun Plan Convivencia e Civismo dirixido a garantir o respecto ás normas cívicas e de convivencia que deben rexer a relación entre as persoas e o uso dos espazos públicos en Ponteareas. Mera sinalou que “neste mandato estamos decididos a abordar dunha vez os numerosos problemas de convivencia e de condutas incívicas que afectan á calidade de vida, a seguridade e a saúde dos ponteareáns”.

Desta situación, Mera culpa aos anteriores gobernos municipais ao sinalar que “coa súa inacción ou coa súa pasividade” propiciaron ou consentiron algúns destes comportamentos. 

O edil nacionalista citou entre outros exemplos “a falta de respecto ao dereito ao descanso, con ruidos en locais e en eventos ao aire libre até altísimas horas da madrugada; a suxedade nas rúas con excrementos de cans, cabichas e todo tipo de residuos; o descontrol con cans potencialmente perigosos que circulan sen bozos nin correas, o abandono de baixos lóbregos convertidos en esterqueiras, a condución a velocidade excesiva polas rúas da vila, o estacionamento de vehículos en pasos de peóns ou en prazas reservadas para persoas con mobilidade reducida, etc.”

Roberto Mera asegura que “o noso obxectivo é protexer á maioría da poboación que sufre esas condutas e erradicar eses comportamentos dunha minoría, primeiro pola vía da concienciación e das alternativas, e despois, se é necesario, pola vía punitiva con sancións”.

O Plan de Convivencia e Civismo contempla unha primeira fase de diagnose da situación na que se recabará información sobre os problemas de convivencia, quen os provoca, a quen e como afecta, onde, porqué e cando se producen eses problemas, se a falta de resposta municipal se debe á ausencia de normativa, de medios materiais e humanos ou á simple desidia ou desorganización.

Para o traballo de diagnose Mera porá en marcha un proceso participativo e manterá reunións coa veciñanza das diferentes zonas da vila e colectivos sociais,. Ademais manterá reunións de traballo cos departamentos encargados de actuar fronte aos problemas de convivencia, especialmente a Policía Local. Analizaranse tamén todas as ordenanzas e regulamentos municipais para a súa actualización porque, segundo Mera, están en moitos casos desfasadas. O edil cita como exemplo que “en Ponteareas deixar excrementos de can nas rúas está castigado con 30 euros mentres noutros lugares a sanción é de 750 a 1.500 euros. Os infractores teñen que saber que deben mudar as súas condutas porque en breve terán consecuencias importantes” sinalou o concelleiro.

Mera prevé que o Plan estea listo a finais de ano para comezar a aplicar as medidas en 2020, aínda que algunhas urxentes poderanse ir executando xa en 2019.

A mediación do Concello de Tomiño permite a retirada do embarcadoiro do antigo ferry con Cerveira

Redacción
-
0
A mediación do Concello de Tomiño permite a retirada do embarcadoiro do antigo ferry con Cerveira

A mediación do Concello de Tomiño posibilitou a retirada do embarcadoiro do antigo ferry-boat que unía Goián e Cerveira e que, dado o seu estado de deterioro e abandono, constituía un perigo para os piragüistas do Club Deportivo Miño e público en xeral. 

Traballos de despezamento do embarcadoiro

Logo de que repetidas veces durante os últimos anos, o Concello solicitara a Portos de Galicia a retirada do mencionado embarcadoiro sen resultados, o goberno local conseguiu chegar a un acordo para que un estaleiro de A Guarda ofrecérase a desmontar a antiga instalación e a levala río abaixo, sen custes para a Xunta de Galicia, a cambio de aproveitar os materiais para construír un pantalán flotante na Pasaxe.

Deste xeito, tras unha semana de arduo traballo para desmontar por partes o antigo embarcadoiro, este xa non representa un perigo para os deportistas que pasan polo río. Só resta retirar nestes días a parte flotante da instalación.

O PP reparte as tarefas “para fiscalizar ao goberno local”

Redacción
-
0
O PP reparte as tarefas “para fiscalizar ao goberno local”

O Grupo Municipal do PP de Ponteareas mantivo unha reunión para repartir “o traballo de fiscalización” e propostas entre os cinco concelleiros que están a representar ao PP no consistorio de Ponteareas. A portavocía mantena Belén Villar, quen tamén será a responsable de fiscalizar ao goberno e facer propostas en materia económica, de emprego e servizos básicos.

Pola súa banda, Andrés Sampedro que xunto con Belén Villar formaba parte do Grupo Municipal do PP durante o pasado mandato, ocuparase de todo o relacionado con Educación, Cultura e Festas. Silvia F. Táboas, responsabilizarase do tema urbanístico e todo o vinculado a iso. Francisco J. Represas, ocuparase dos temas relativos á presentación de propostas para as concellerías de Deportes, Voluntariado, Seguridade Cidadá, Medio Ambiente e Parques e Xardíns, entre outras tarefas que lle foron encomendadas “como velar por que o Goberno local fomente a Participación Cidadá e a Transparencia”, asegura Belén Villar.

Por último, Lina Limeres, será a responsable de Comercio, Turismo e todo o relacionado cos servizos sociais do Concello.

Oia acolleu unha nova sesión formativa dentro do proxecto “Rumbo ao Emprego”

Redacción
-
0
Oia acolleu unha nova sesión formativa dentro do proxecto “Rumbo ao Emprego”

O proxecto “Rumbo ao Emprego” que están a desenvolver conxuntamente os concellos de Oia e O Rosal ofreceu hoxe venres unha nova sesión aberta ao público xeral, neste caso centrada en como xestionar o cambios. A píldora formativa desenvolveuse este venres 19 de xullo baixo o título «Como afrontar a xestión do cambio na procura de emprego» e tivo lugar no Centro Sociocultural de Pedornes entre as 10 h e as 12 horas.

A actividade correu a cargo de Yolanda Fortes, consultora e docente de estratexia persoal e proxectos paralelos, que conta cunha ampla experiencia traballando aspectos como o talento, a marca persoal, a motivación e a comunicación.

Especialista en consultoría e coaching, Yolanda Fortes centra as súas intervencións en lograr que as persoas sexan o cambio que queren no seu negocio ou proxecto profesional. “Transformando ás persoas transformamos os negocios” é, de feito, o seu lema.

Naesta píldora formativa, a relatora guiou ás persoas asistentes na difícil tarefa diaria de asumir os cambios: debullou os medos e inseguridades que asaltan ás persoas cando deciden saír da súa zona de confort e amosou o positivo que pode resultar “tirarse á piscina” nalgúns momentos da vida.

“Rumbo ao Emprego” é un proxecto que os concellos do Rosal e Oia veñen desenvolvendo conxuntamente desde o mes de abril. Conta co financiamento da Deputación de Pontevedra dentro da liña 2 do Plan Concellos.

Esta iniciativa en materia de inserción laboral inclúe formación, prácticas en empresas, orientación e acompañamento individualizado para a procura de traballo. Entre as distintas accións programadas destacan as píldoras formativas, sesións abertas ao público xeral nas que distintos especialistas abordan temas de interese como o autoemprego, as dinámicas de grupo nas entrevistas de traballo ou a xestión do cambio, entre outros.

Ponteareas contratará a 11 novas traballadoras vítimas de violencia de xénero

Redacción
-
0
Ponteareas contratará a 11 novas traballadoras vítimas de violencia de xénero

A concellería de Benestar Social e Igualdade, que dirixe Verónica Carrera, vén de asinar un convenio coa Xunta de Galicia polo que a administración local recibirá un total de 187.919,44 € para a contratación de 11 mulleres vítimas de violencia de xénero. A partir do mes de setembro estas mulleres traballarán durante un ano a xornada completa, desempeñando tarefas de interese xeral e utilidade social, como administrativas, xardineiras ou limpadoras.

Este convenio amosa, unha vez máis, a capacidade de Ponteareas para adquirir o apoio e confianza das diferentes administracións. Verónica Carrera explica que esta liña de subvencións “pretende que as mulleres danadas pola violencia machista acaden unha maior autonomía comezando pola independencia económica”. A concelleira lembra que, no que vai de ano, foron atendidas  un total de 150 mulleres no Centro de Información a Mulller (CIM) ubicado na rúa Oriente..

Carrera aposta ademais pola formación ofrecendo durante todo o ano unha programación de cursos e obradoiros cos que mellorar o curriculum das mulleres ampliando así as posibilidades da inserción laboral.

Cómpre salientar que dende a concellería de Benestar Social e Igualdade tamén ofrecen charlas e actividades para que as mulleres gañen en autoestima e adquiran ferramental psicolóxicas e condutuais que as fagan máis independentes e menos vulnerables.

Mos aposta pola seguridade infantil nos vehículos

Redacción
-
0
Mos aposta pola seguridade infantil nos vehículos

O departamento municipal de Política Social do Concello de Mos organizou hoxe, en colaboración coa Policía Local, unha charla sobre Sistemas de Retención Infantil nos vehículos que tivo lugar esta mañá no Centro de Saúde de Mos, no Rebullón. No encontro a Policía explicou que “cada día, nas nosas estradas, prodúcense accidentes de tráfico que teñen consecuencias fatais para os menores debido ó uso inadecuado dos sistemas de retención ou a falta dos mesmos”.

Os bebés e os menores son un sector especialmente vulnerable neste sentido, xa que ben por falta de coñecemento ou ben por un uso inadecuado, os sistemas de retención non son usados adecuadamente. Conscientes desta situación e tendo en conta o cambio de normativa nos sistemas de retención para menores de 135 cm de altura, consideramos importante formar e informar ás familias do bo uso destes sistemas, que son importantes para a seguridade dos nosos cativos”.

A formación, á que asistiron un total de 25 persoas, estaba dirixida á poboación xeral que desexase asistir e tiña por obxectivos formar ás familias no uso axeitado nos sistemas de retención infantil, colaborar na seguridade dos habitantes do Concello, coñecemento da normativa legal sobre os SRI, os grupos existentes e as lesións que preveñen e fomentar actitudes responsables e seguras.

Este curso ten como obxectivo fundamental concienciar á poboación de que tódolos nenos/as que viaxen en coche deben levar sempre a súa cadeira adaptada. Así mesmo os menores con altura igual ou inferior a 135 centímetros deben viaxar obrigatoriamente nos asentos traseiros do vehículo pola súa seguridade. Excepto cando o vehículo non dispoña de asentos traseiros, estes estean ocupados por outros menores coas mesmas características, ou cando non sexa posible instalar nos asentos traseiros tódolos sistemas de retención infantil.

Dende a Policía Local de Mos considérase fundamental a concienciación respecto deste tema, pois os sistemas de retención infantil reducen nun 75 % as mortes en un 90 % as lesións. As lesións máis frecuentes cando non se utilizan os S.R.I son lesións de pescozo en cativos de ata 2 anos de idade, lesións na cabeza entre os 2 e os 4 anos; e lesións abdominais entre os catro e dez anos.

Outros aspectos abordados polos axentes policiais locais na charla desta mañá foron como elixir o sistema de retención máis axeitado, nocións para mercar unha cadeira adecuada, e para instalala correctamente con cintos de seguridade ou Isofix.

Detalladamente explicouse durante esta actividade os grupos de idade e as características dos sistemas de suxección específicos de cada grupo. O grupo 0 e 0+ que integra ós recén nacidos de ata 13 quilos aproximadamente, o grupo 1: de 9 ata 18 quilos aproximadamente, os grupos 2 e 3: de 15 ata 36 quilos aproximadamente e a partir de 135 centímetros de altura.

Para as mulleres embarazadas asistentes á acción formativa explicouse tamén como empregar o cinto de seguridade durante o embarazo. E os policías mosenses concluíron a súa exposición con cinco regras de ouro sobre os sistemas de retención infantil que son empregar sempre o sistema de retención infantil axeitado á altura e peso do/a neno/a, colocar o maior tempo posible a cadeira en sentido contrario á marcha, asegurarse de que a cadeira está ben anclada ao vehículo e que o neno/a vai ben suxeito/a, vixiar os traxectos curtos e dar exemplo ós cativos poñéndose sempre o cinto.

Para as futuras nais explicouse que as cadeiras de protección deben empregarse dende o primeiro viaxe en coche dos recén nacidos, á saída dos mesmos do hospital.

«Noites no Castelo» é a cita obrigada para esta fin de semana na Guarda

Redacción
-
0
«Noites no Castelo» é a cita obrigada para esta fin de semana na Guarda

Esta fin de semana A Guarda contará na súa programación cunha das citas musicais de maior importancia, o evento «Noites no Castelo», que terá lugar este sábado e numerosas actividades deportivas como a III Mostra CD Baixo Miño, La Guardia en Danza o Torneo 3×3 Vila da Guarda de Baloncesto ou o Torneo de Fútbol 7. É, polo tanto, unha extraordinaria ocasión para achegarse á Guarda, gozar das súas praias e a súa gastronomía e rematar, no Castelo de Santa Cruz, coas «Noites no Castelo». 

Venres 19
Este venres día 19 en horario de 10:00h a 13:00h horas da mañá o Castelo de Santa Cruz acolle un obradoiro gratuíto especificamente destinados a mozos e mozas da Guarda de 12 anos en diante e que terá como motivo «WATER», un obradoiro de experimentación científica relacionado coa auga.

Na xornada deste venres continúan as visitas guiadas para coñecer o patrimonio do Monte Santa Trega, ás 11:30 h realizarase a visita guiada ao Castro de Santa Trega, que terá como punto de encontro a vivenda reconstruída do Castro de Santa Trega e que terá unha duración aproximada de 30 minutos.

Ás 12:30 h e ás 17:00 h terán lugar dúas novas visitas guiadas ao Monte Santa Trega, con punto de encontro no Museo Arqueolóxico(MASAT) e que terán unha duración aproximada de 90 minutos.
Estas visitas guiadas son de carácter gratuíto e sen inscrición previa. Para grupos de máis de 10 persoas é obrigatorio facer unha reserva previa chamando ao teléfono 986 610 504. A taxa de acceso ao Monte Santa Trega é de 1 € para adultos e 0,5 € para menores de 14 anos.

Sábado 20
Este sábado día 20 de xullo a partires das 22:00 h celébrase unha nova edición de Noites no Castelo, un festival organizado dende a Concellería de Festas e Festexos Populares do Concello da Guarda e que está subvencionado pola Deputación de Pontevedra, o Fondo Galego de Cooperación e Solidariedade, a Xunta de Galicia e en colaboración coa Axencia Galega das Industrias Culturais AGADIC e o Xacobeo 2021.

Nesta quinta edición contarase coas actuacións dos grupos de música Batuko Tabanka e Leilía, enchendo de boa música un ano máis este emblemático espazo da vila guardesa, declarado Ben de Interese Cultural(BIC).

O Festival Noites no Castelo consolídase xa coma unha cita musical ineludible do calendario de verán do Concello da Guarda, pasando polo seu escenario grupos coma Ardentía, Milladoiro, a Banda Crebinsky, o gaiteiro Xosé Manuel Budiño, a cantante Mercedes Peón, a gaiteira Susana Seivane ou o grupo folk A Roda.

Doutra banda, o próximo sábado día 20 de xullo o Club de Tenis Codesal acollerá a 5º edición do Torneo 3×3 de Baloncesto Vila Da Guarda, organizado polo Baixo Miño Basket. Nesta edición, que dará comezo ás 10:00 h, o equipo guardés organiza unha xornada practicando baloncesto e gozando das instalacións do club de tenis na beira do Rio Miño contando coa participación dun total de 12 equipos do sur de Pontevedra, xogando a fase final pola tarde.

Tamén este sábado o Estadio Municipal da Sangriña acolle o X Torneo de Futbol 7 Vila da Guarda, que arrancará ás 15:30 h da tarde e que continuará na xornada do domingo.

Este sábado continúan as visitas guiadas para coñecer o patrimonio do Monte Santa Trega, ás 11:30h realizarase a visita guiada ao Castro de Santa Trega, que terá como punto de encontro a vivenda reconstruída do Castro de Santa Trega e que terá unha duración aproximada de 30 minutos.

Ás 12:30h e ás 17:00h terán lugar dúas novas visitas guiadas ao Monte Santa Trega, con punto de encontro no Museo Arqueolóxico(MASAT) e que terán unha duración aproximada de 90 minutos.
Estas visitas guiadas son de carácter gratuíto e sen inscrición previa. Para grupos de máis de 10 persoas é obrigatorio facer unha reserva previa chamando ao teléfono 986610504.
A taxa de acceso ao Monte Santa Trega é de 1€ para adultos e 0,5€ para menores de 14 anos.

Domingo 21
Este domingo día 21 de xullo a Agrupación Guardesa de Pescadores, Mariñeiros e Mariscadores non profesionais “O Buxeiro” organiza unha gran recollida de plásticos na costa da Guarda. O punto de reunión será a Alameda da Guarda ás 8:00h da mañá, onde se repartirán guantes e bolsas e se explicará como será o funcionamento desta actividade, para a que non é preciso inscrición previa.

O Estadio Municipal da Sangriña acolle nesta xornada as finais do X Torneo de Futbol 7 Vila da Guarda en horario de mañá.

A partires das 17:00h da tarde deste domingo a carpa do Porto da Guarda acolle a celebración da Festa do Avó, evento no que participarán a Coral e o Grupo de Gaitas do Clube da Terceira Idade da Guarda, nun acto que estará presentado por Jesús García Villadóniga e no que se fará tamén unha homenaxe.

A praia da Freixa conta durante os meses de verán co servizo de socorrismo

Redacción
-
0
A praia da Freixa conta durante os meses de verán co servizo de socorrismo

Os socorristas contratados polo Concello de Ponteareas para velar pola seguridade dos bañistas da Freixa durante os meses de verán traballan xa dende a pasada semana na praia fluvial ponteareá. A contratación deste servizo de socorrismo, que estará activo os sete días da semana para contribuir no benestar de todos e todas os que se acheguen a desfrutar deste espazo natural, prodúcese grazas a unha subvención da Consellería de Traballo e Benestar da Xunta de Galicia que se completa con fondos propios do concello de Ponteareas.

Os socorristas traballarán durante os meses de xullo, agosto e setembro, en horario de luns a xoves de 16 h a 21 horas e venres, sábados e domingos de 12:30 h a 21 horas.

A Deputación leva a súa campaña para previr agresións sexuais ao festival ‘Vive Nigrán’

Redacción
-
0
A Deputación leva a súa campaña para previr agresións sexuais ao festival ‘Vive Nigrán’

A Deputación de Pontevedra volverá levar este vindeiro fin de semana a súa campaña de igualdade #LEMBRAEUDECIDOTIRESPECTAS #CONTACOMIGOEURESPÉCTOTE para previr violacións en cita e as agresións por submisión química ao ‘Vive Nigrán’, un dos sete eventos do verán que conforman os Festivais Rías Baixas e que se desenvolverá os días 19 e 20 deste mes de xullo.

Co obxectivo de amosar as novidades desta terceira edición e o plan de traballo, así como para presentar o balance da pasada edición da campaña neste festival, as técnicas de Igualdade da Deputación mantiveron hoxe un encontro no salón de plenos do Concello de Nigrán co alcalde, Juan González, representantes da corporación municipal, da Garda Civil, a psicóloga e a avogada do CIM, a técnica de Cultura e representantes da organización do evento.

A institución provincial volverá instalar un punto de información con cinco axentes de igualdade que entregarán os folletos da campaña, aínda que tamén farán intervencións na praia. #LEMBRAEUDECIDOTIRESPECTAS vai dirixida tanto aos mozos como as mozas, con materiais nos que se ofrece unha actuación integral de prevención e actuación contra os devanditos tipos de agresión sexual e nos que se amosan con claridade os límites nas relacións entre adolescentes e danse a coñecer este tipo de agresións, facendo fincapé en que son un delito e que a culpa nunca é da vítima. Outros materiais (sombreiros, tarxetas, adhesivos e pulseiras) complementarán a campaña.

O stand permanecerá no festival o venres 19 desde as 18 ás 22 horas e o sábado 20, de 18 a 23.30 horas. Por parte da organización do festival, informouse que este ano como novidade a empresa de seguridade conta con dúas profesionais que teñen formación en violencia de xénero. E no encontro decidiuse tamén colocar no stand folletos do CIM para que as mulleres que se acheguen coñezan este recurso. Precisamente, o persoal do centro compartiu as impresións sobre a posta en marcha dun punto violeta nas pasadas festas de San Xoán, e informou que se colocará en próximos eventos no concello.

O pasado ano, polo stand da Deputación pasaron 460 persoas, do total de 8.000 que foron atendidas no marco desta campaña de igualdade nos sete festivais de verán da provincia pontevedresa. No transcurso da reunión, incidiuse na boa resposta á pasada edición, na que se deu un paso máis cara a implicación dos mozos na campaña, baixo o lema “CONTA COMIGO EU RESPÉCTOTE”, coa que se pretende que eles amosen o seu rexeitamento ante este tipo de condutas, non sexan cómplices e se sitúen claramente fronte aos agresores.

A Deputación desenvolverá estas accións formativas e de coordinación dos colectivos de atención ao público nos cinco concellos restantes nos que se levarán a cabo os Festivais Rías Baixas, co obxectivo de proporcionar ferramentas e desenvolver protocolos de colaboración e coordinación ante unha posible agresión sexual.

O Rosal e Caminha inician contactos para colaborar en programas lúdicos, culturais e deportivos

Redacción
-
0
O Rosal e Caminha inician contactos para colaborar en programas lúdicos, culturais e deportivos

A alcaldesa do Rosal, Ánxela Fernández Callís, acompañada pola concelleira de Cultura, Sara Vicente Salcidos, mantiveron no día de hoxe unha reunión en Caminha co presidente da Câmara Municipal Miguel Alves, de cara a comezar “a tender pontes” entre ámbolos dous municipios de cara a conseguir traballar, de xeito colaborativo, no ámbito da programación lúdica, cultural e deportiva. 

“Para nós é moi importante que o río Miño deixe de ser unha barreira e se converta nun espazo transfronteirizo cheo de oportunidades”, sinalou a rexedora local do Rosal, polo que considera “fundamental” comezar a traballar conxuntamente “entre ambas marxes do noso río propiciando un entorno que favoreza unha maior dinamización dos nosos pobos”.

Ánxela Fernandez adiantou que, nas vindeiras datas, o equipo de goberno de Caminha, co presidente da Câmara ao fronte, visitará O Rosal de cara a comezar a traballar conxuntamente.

Nigrán pecha o venres 19 os concertos de cello do ‘Curso de Verán SonCello’

Redacción
-
0
Nigrán pecha o venres 19 os concertos de cello do ‘Curso de Verán SonCello’

O Concello de Nigrán ofreceu dende o luns 15 de xullo ata este venres 19 de xullo tres concertos de violoncellistas que asisten no CEE de Panxón ao curso de verán da Asociación de Violoncellistas de Galicia ‘Soncello’. Este curso inclúe a celebración destes concertos, levados a cabo por músicos convidados, profesores e o propio alumnado, e serán de entrada gratuíta.

Este curso de verán (dirixido a músicos de tódolos niveis) inclúe clases individuais e colectivas coas profesoras Carolina Landriscini, Isabel Font e Isabel Figueroa, clases e ensaios de conxunto, orquestra de violoncellos, obradoiros de técnica (Carolina Landriscini), violoncello barroco (Fernando Santiago) ou improvisación libre (Margarida Mariño), Pilates (Isabel Font) ademáis de outras actividades de tipo lúdico e de lecer.

O BNG de Redondela homenaxea “ás mulleres de San Simón”

Redacción
-
0
O BNG de Redondela homenaxea “ás mulleres de San Simón”

O BNG de Redondela vén de anunciar a convocatoria dun acto de homenaxe ás mulleres de Redondela que “dando un exemplo de dignidade, beleza e heroísmo, foron quen de tecer unha rede de solidariedade para levar un pouco de esperanza aos presos que o rexinme franquista enviou o campo de concentración de San Simón, entre os anos 1936 e 1945”, acto que se enmarca dentro da conmemoración da semana da Patria Galega.

Esta homenaxe pon en valor ás mulleres de Redondela, Cesantes e A Portela, “que poñendo en risco as súas vidas e as dos seus, déronlle algo de luz a vida daqueles homes, sen pedir nada a cambio”. “Mulleres que amasaban bolas de pan e cociñábanlle empanadas de xoubas, que recollían as súas roupas e logo devolvían lavadas e na que mesmo cosían mensaxes de esperanza para tentar paliar todo aquel horror”, subliña a formación nacionalista.

Todas elas serán homenaxeadas o sábado 20 a partir das 20:00 horas, nun acto que terá lugar na Portela, no final do paseo marítimo e que dende o BNG convidan a participación da veciñanza.

A presentación do acto correrá a cargo do responsable local do BNG de Redondela, Anxo Lusquiños e contará coa intervención do deputado no parlamento galego, Luís Bará Torres, quen sendo director xeral da Xunta durante o goberno do bipartito, impulsou a San Simón como ‘Illa da Memoria’ e quen recolle no seu libro sobre a represión franquista en Galiza ‘Non des a esquecemento a historia da xesta humanitaria destas mulleres.

O acto rematará cunha ofrenda floral no peirao da Portela, onde se porá fin a esta merecida homenaxe

A Xunta comprométese a presentar en tres meses a mellora da travesía da Vaquería no Porriño

Redacción
-
0
A Xunta comprométese a presentar en tres meses a mellora da travesía da Vaquería no Porriño

A Xunta de Galicia tén de prazo ata o 11de outubro para presentar un proxecto de mellora da seguridade viaria na travesía do barrio A Vaquería, en Budiño, segundo o compromiso adquirido a pasada semana, polo director da Axencia Galega de Infraestruturas, Francisco Menéndez, ante a alcaldesa do Porriño, Eva García de la Torre, e unha representación veciñal nun un encontro celebrado en Vigo na sede da Delegación Territorial da Xunta.

Segundo explicóu Eva García, despois da reunión de dúas horas de duración, “achegamos posturas entre vecinos da Vaquería e Xunta de Galicia para unha mellor solución ós problemas de seguridade viaria da travesía da estrada autonómica PO-510 por ese barrio de Budiño”.

A alcaldesa explicou que o director da Axencia Galega de Infraestructuras aceptou incorporar dúas glorietas, un semáforo con pulsador e sendas para peóns para mellorar a seguridade dos veciños.

Cando sexa presentado o proxecto, “os veciños disporán dun período de alegacións para formular as súas aportacións que poidan ser incorporadas co correspondente aval dos técnicos da Consellería”, declarou Eva García de la Torre.

A Guarda acolle este sábado a II edición de «La Guardia en Danza»

Redacción
-
0
A Guarda acolle este sábado a II edición de «La Guardia en Danza»

O vindeiro sábado día 20 de xullo o Auditorio de San Bieito da Guarda acolle a segunda edición de «La Guardia en Danza», un evento organizado polo Centro DO-MAJÓ en colaboración coa Concellería de Deportes do Concello da Guarda. Este evento, con entrada de balde arranca ás 20:30 h contando con varias exhibicións de Danza Moderna, Hip-Hop, salsa, entre outros.

Participará o grupo de danza moderna do Centro DO-MAJÓ e escolas de Vigo e do Baixo Miño con espectaculares exhibicións cheas de orixinalidade. Un espectáculo de música e danza ao ar libre onde ademais se sortearán varios premios.

Salvaterra de Miño facilita a conciliación familiar e laboral cos campamentos de verán

Redacción
-
0
Salvaterra de Miño facilita a conciliación familiar e laboral cos campamentos de verán

Este pasado luns daba, en Salvaterra de Miño, a segunda quincena do Campamento de Verán, unha iniciativa enmarcada no programa de conciliación familiar que desenvolve o Concello que preside Marta Valcárcel. “Este Concello leva anos traballando en diferentes accións e programas de conciliación familiar e laboral, que se desenvolven durante todo o ano, se ben é verdade que é sobre todo na época estival onde se fai un esforzo máis salientable, xa que é a época mais difícil para a propia conciliación”, explica a rexedora municipal.

Cómpre salientar que Salvaterra de Miño é un Concello en crecemento, “onde moitas parexas novas elixiron vivir e formar a súa familia nun entorno tranquilo e onde o que se prima é a calidade de vida”, di Valcárcel.

Nun Concello cunha poboación infantil de 4 a 14 anos de máis de 900 nenos é moi importante planificar as accións tanto formativas como de ocio e focalizalas e dirixilas sobre todo a esa franxa de idade, por ese motivo este ano, a Alcaldía “daba un un paso máis” ao estender estes campamentos de conciliación, que nun principio estaban enfocados ao mes de xullo, tamén ao mes de agosto. Así este ano a oferta esténdese as catro quincenas, nas que participan máis de 100 nenos e nenas, coa opción de aula matinal e comedor, en colaboración coa ANPA.

Durante estes dous meses os participantes realizarán diferentes actividades de animación musical, obradoiros, deporte, xogos de auga…

A piscina de Arbo comeza a súa tempada estival

Redacción
-
0
A piscina de Arbo comeza a súa tempada estival

A piscina municipal de Arbo iniciou a súa tempada estival o pasado 2 de xullo. As piscinas, inauguradas no ano 1996, e están situadas no Barrio dá Chan, á beira do cuartel da Garda Civil da localidade. O pasado ano, as instalacións eran obxecto de fondas obras de renovación, desenvolvento traballos de mantemento e substitución dos cadros eléctricos, a incorporación do sistema de ventilación para a renovación de aire, cambio de tubaxes, bombas de depuración, válvulas, manómetros ou a carga de area nos depósitos de depuración, entre algunhas outras.

Tamén se renovou a piscina pequena (infantil) e no vaso da piscina grande repuxéronse as baldosas de cerámica.

Son dúas piscinas, unha grande para adultos e unha pequena para os nenos, aseos e vestiarios. Un ano máis, tamén ofrece unha cantina que serve refrescos, xeados ou bocadillos, ademais dunha pista de baloncesto e unha gran zona de céspede onde se pode xogar, comer e beber. O horario de apertura é de luns a venres de 11 h a 13.30 h e de 15:30 h a 21.00 h pola tarde. As fins de semana funciona en horario continuo de 11 h a 21 h. A entrada xeral ao recinto custa 1,20€ pero para os nenos de entre 6 e 12 anos o prezo é de 0,90€. Para os máis pequenos a entrada é gratuíta.

O alcalde de Arbo, Horacio Gil, subliñou o feito de que coas obras de mellora e acondicionamento levadas a cabo nos últimos tempos na piscina municipal de Arbo, “inclúense melloras sanitarias e de estética no recinto, mellorando a seguridade e asegurando a súa continuidade como un dos núcleos de reunión e entretemento da vila. Especialmente para os nenos de Arbo e para os numerosos pequenos que nos visitan nas vacacións de verán”.

1...416417418...425Page 417 of 425

Fundado por Alfredo Estévez © Hansei Media, SL