18.2 C
Pontevedra
Luns, 17 de Xuño de 2024
Máis
    HomeÉ NoticiaLeticia Gallego cualifica de "ataque á sanidade pública" a restrición de actividade...

    Leticia Gallego cualifica de “ataque á sanidade pública” a restrición de actividade en 14 centros de Atención Primaria da área de Vigo

    Denuncia a “gravísima situación” que se vive no Baixo Miño e o Morrazo, e pídelle á Xunta que “deixe de xogar coa saúde dos cidadáns”

    A deputada socialista Leticia Gallego tachou hoxe de “ataque á sanidade pública, gratuíta e universal” a decisión da Xunta de restrinxir a actividade en 14 centros de atención primaria da área sanitaria de Vigo, facendo que os facultativos só atendan urxencias e casos de Covid. Trátase, en palabras da parlamentaria do PSdeG, dunha “decisión nefasta” xa que “toda a cidadanía ten dereito a acudir ao seu médico por calquera enfermidade”.

    Leticia Gallego sinalou que esta medida afecta ás unidades de Primaria do Rosal, A Guarda, Tomiño, Oia, Cangas, Moaña, Ponteareas, O Porriño e, en Vigo, aos centros de saúde de Navia, Nicolás Peña, Beiramar, Casco Vello, Matamá e Teis.

    Así, alertou de que “a situación da atención primaria na área de Vigo é gravísima” e fixo especial fincapé nos prexuízos que se están a ocasionar aos pacientes do Baixo Miño e do Morrazo, unha situación asistencial “indigna e indecente” e con protestas de diferentes colectivos sanitarios todas as semanas. Solicitou tamén ambulancias medicalizadas para estas dúas comarcas porque “están xogando vostedes coa saúde dos galegos e galegas”.

    En calquera caso, Leticia Gallego indicou que “non se pode tolerar que se estea desatendendo a poboación en xeral e atendendo tan só ás urxencias e ás persoas con COVID”. Por iso, reclamoulle á Xunta que “incorpore de maneira inmediata máis persoal facultativo nestes catorce centros de saúde aos que lles restrinxiu a actividade”.

    Leticia Gallego lembrou que esta medida xustificouse en que había moitos profesionais de baixa, outros de vacacións  e prazas vacantes por xubilacións que non se cobren. Porén, lembrou que “esta situación non é nova” e que, de feito, o grupo parlamentario socialista estivo a denunciar esta situación e “o colapso da atención primaria” ao longo de todo o ano pasado.

    “Esta é”, subliñou, “unha mostra máis desa saturación no sistema galego de saúde da que vimos alertando os socialista durante toda esta lexislatura”. Por iso, manifestou que “resulta necesario poñer de xeito urxente á dispor dos centros de saúde os recursos humanos suficientes para atender as necesidades de cada municipio conforme a súa poboación, para deste xeito garantir a correcta e plena asistencia sanitaria na Atención Primaria”.

    Ao fío disto, tamén lamentou que a Xunta renunciase a formar a 151 médicos de familia na última década, outra circunstancia que afonda no abandono e o deterioro da sanidade pública galega.

    En definitiva, as restricións na área sanitaria de Vigo enmárcanse nun contexto no que “a atención primaria está totalmente desbordada, con xornadas de ata 190 pacientes nalgúns PAC, cuns profesionais esgotados, con cada vez máis cadros de depresión e ansiedade entre os médicos e médicas e cun total desánimo”. Nesta liña, Leticia Gallego advertiu que “o goberno do señor Feijoo “está acabando coa sanidade pública e de calidade en Galicia e cos profesionais da sanidade non poden máis e así o están denunciando”.

    Tras destacar “a gran profesionalidade e o compromiso de todos os facultativos da nosa comunidade”, Gallego demandoulle ao goberno galego “que melloren os contratos de médicos, médicas e enfermeiras”, xa que moitos deles están a marchar a Portugal, onde “as condicións laborais son mellores”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.