O secretario xeral do PSdeG, Valentín González Formoso, propuxo a rebaixa do 50 % das peaxes das autoestradas de titularidade autonómica. Esta proposta dirixida ao goberno da Xunta é de carácter inmediato e forma parte dun plan urxente de medidas económicas e sociais para o ámbito galego dos socialistas que buscan facer fronte á dura perspectiva económica.
O número un dos socialistas galegos reuniuse co presidente da Confederación de Empresarios de Galicia, Juan Manuel Vieites, nunha rolda de contactos cos diferentes axentes sociais para explicar as medidas do PSdeG ante a difícil situación económica a nivel global, que tamén afecta directamente a Galicia.
Formoso trasladou que este paquete de propostas do PSdeG serve para facer fronte á situación económica que “atinxe a todos os eidos de competencia da Xunta”. A medida máis destacable é a de incorporar nos orzamentos do 2023 unha partida para baixar un 50% os peaxes aos usuarios galegos das autoestradas autonómicas, buscando beneficiar ao “tecido produtivo do país” e ás familias a aliviar a situación de incremento de prezos.
No mesmo plan de medidas dos socialistas pódese resaltar tamén unha rebaixa de taxas portuarias nun 75% buscando diminuír os custos de produción do sector pesqueiro e dos empresarios galegos que exportan e importan a través do portos.
Outras propostas son unha elevación do tramo exento de IRPF en Galicia, habilitar liñas de axuda á compra de combustible para as familias ou axudas para autónomos e profesionais para compensar a suba dos hidrocarburos. Formoso cre que estas medidas serán ben recibidas pola cidadanía, así como deberían recibilas ben o resto de formacións políticas, ás que emprazou a reunirse para traballar de cara a preparar a situación económica futura.
Por outra banda, Formoso emprazou ao goberno galego a “ter altura de miras” e “asumir a situación crítica” que se está a vivir polas familias e os entes produtivos galegos. Sinalou que “non valen as fórmulas políticas de sempre para unha situación excepcional” que non ten precedentes dende hai moito tempo polas características propias en orixe da crise económica que está por vir.
Amosou un descontento ante o emprego das institucións públicas “que uns gobernan” para enfrontarse coas que gobernan partido políticos opostos. Polo que remarcou a falta de diálogo da Xunta, tanto cos líderes da oposición, como co goberno central, contra o cal indica que Rueda segue o “camiño de confrontación” iniciado por Feijóo cando gobernaba Galicia.
Na mesma liña, Formoso amosou a súa preocupación ante o gran número de postos de traballo que están en perigo en Galicia pola conxuntura económica, estando tamén en risco os servizos públicos e o sistema de pensións. Por elo, destacou a importancia de que se actúe dende os postos de responsabilidade para aliviar a carga económica sobre as familias.
