O Concello de Nigrán colabora coa celebración das festas de San Pedro, do 29 de xuño ao 1 de xullo, achegando 4.000 € a través da iniciativa ‘Música nas Parroquias’. Este programa municipal finánciase a través da liña 2 do Plan Concellos da Deputación de Pontevedra e conta cun orzamento total de 40.000 € que se distribúen entre todas as festas patronais de Nigrán, ben para contratar bandas de música ou orquestras.
A festa de San Pedro arranca no torreiro que leva o seu nome o propio 29 de xuño (festivo local) con pasarrúas e concerto ao mediodía (tras a Misa Solemne das 12:30) da Unión Musical do Val Miñor e verbena a partir das 23:00 coa orquestra Compostela. O venres a partir das 18:00 será a actuación do clown nigranés Peter Punk e a partir das 22:00 tocará Alianza e o grupo La Conexión. Pechan as festas D`Cache e Milenium o sábado 1 de xullo a partir das 22:00 horas.
“Volvemos a colaborar coas entidades festeiras e veciñais para garantir a pervivencia das festas tradicionais de Nigrán porque son os verdadeiros días de celebración conxunta da veciñanza e de ledicia en cada parroquia”, resume o alcalde, Juan González.
O programa municipal ‘Música nas Parroquias’ colaborou xa coas festas do Santísimo Cristo da Victoria en Chandebrito e San Xoan de Panxón, agora será San Pedro da Ramallosa e posteriormente Santiago de Parada, Carme de Lourido, San Fiz de Nigrán (organizado integramente polo Concello), Virxe das Angustias, San Roque de Camos e, finalmente, Bo Xesús de Priegue.
