19.8 C
Pontevedra
Luns, 15 de Xullo de 2024
Máis
    HomeVal MiñorNigránO mercado invernal 'Bulebule' abre a programación de Nadal de Nigrán

    O mercado invernal ‘Bulebule’ abre a programación de Nadal de Nigrán

    O Concello de Nigrán abrirá oficialmente a súa programación de Nadal a partir do venres 15 de decembro co xa tradicional mercado invernal ‘Bulebule’. A partir aí, e ata o día de Reis coa popular cabalgata, sucederase a programación festiva para todo tipo de públicos e gustos: baile, bingo social, contacontos, eventos deportivos, cine familiar, corais, rondallas… Todo polo míudo está pendurado na web no apartado ‘Próximos Eventos’ https://www.nigran.es/agenda/.

    A terceira edición do Bulebule chega a Nigrán do 15 ao 17 de decembro coa novidade de trasladarse desde a Praza Rosalía de Castro á Praza do Concello (fronte ao Auditorio) e, unha vez máis, co reto de funcionar como un impulso á creatividade, á música, á gastronomía e á artesanía da comarca. Trátase dun evento único que destaca e celebra o talento artesanal porque o seu propósito é fomentar o feito a man e as habilidades creativas de artistas da rexión, que estarán representados nunha trintena de postos de venda.

    “Eliximos este evento como o gran inicio do noso Nadal aínda que as luces xa estean acendidas nesa data. A realidade é que o ‘bulebule’ é o punto de partida da nosa programación especial, por iso ten máis sentido facer aí a gran celebración”, explica o alcalde, Juan González.

    Deste xeito, o Concello irá acendendo as luces de Nadal en todo o municipio ao longo desta ponte de decembro e o gran evento que marcará o inicio das festas en Nigrán será a inauguración do mercado o venres 15 desde as 17:30 horas ás 18:30 horas con ‘Benito e Rufino’, de Troula Animación, o concerto de The Bar Luthier’ ás 20:00 horas e bingo solidario ás 18:00 no Auditorio. A partir de ahí, a fin de semana contará cunha ampla variedade de actividades para nenos e adultos, desde talleres creativos ata actuacións en vivo, asegurando diversión para toda a familia e con programación no Auditorio Municipal situado ao seu carón (Coral Novos Aires ás 19:00 do sábado e coral de Chandebrito e Parada o domingo á mesma hora). No exterior, como parte do ‘Bulebule’, repetiranse concertos en sesión vermú e de serán; o sábado 16 co cantautor Javier Lago (13:30), ‘Music Bross’ ás 18:00 e a banda tributo ao pop rock dos 80/90 ‘El hechizo de Nora’ (20:00) e doble sesión de contacontos en inglés ‘Santa’s Elves’ a cargo de Kids&Us ás 11:00 e 17:00 no Auditorio. Finalmente o domingo, estará a cantautora Carla Lourdes (13:30) e a rock band ‘The Twinpims’ (20:00). Os horarios, actividades e o nome de firmas asistentes poderán consultarse a través do seu instagram @bulebulenigran e na súa páxina web www.bulebulenigran.es.

    “Estamos emocionados de dar a benvida novamente ao ‘Bulebule’. Esta edición representa un fito significativo, e estamos seguros de que ofrecerá aos visitantes unha experiencia única, chea de creatividade e calidez invernal”, sinalan desde Brétema Studio, organizadora do evento de orixe nigranés.

    Resto da programación

    A programación continúa o venres 22 co ‘Encesta un alimento’ do CB Nigrán, os papanoeles surfeiros o 23 en Patos e o baile de Nadal pola tarde no Auditorio. Como é tradicional, a rondalla de Santiago de Parada desfilará polas rúas de Nigrán a mañá do 24. Os máis cativos poderán gozar de cine o martes 26 con ‘El origen de los guardianes’ (18:00 horas, Auditorio Municipal) e o 2 de Xaneiro con ‘Cuento de Navidad’ (18:00 horas, Auditorio Municipal). Pensado tamén nas crianzas serán uns obradoiros de pintura avós/netos que se anunciarán convintemente e a presentación do libro do nigranés Ivan R. ‘Los Winkle’ o 27 de decembro na Biblioteca. Como é habitual, o día 30 terá lugar a tradicional carreira ‘San Silvestre Solidaria’ e ‘Os arroases do Val Miñor’ lanzaranse á agua desde o porto de Panxón. Ademáis, o día 30 terá lugaro concerto de fin de ano da orquestra de saxos de Redondela. A programación remata o día 5 de xaneiro coa gran Cabalgata de Reis.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.