O domingo 24 de xullo, a partir das 21 horas, o Pazo das Pías de Nigrán converterase no escenario dun novo concerto da terceira edición do programa “Música no Ar”, que a Deputación de Pontevedra ten en marcha co obxectivo de levar a música clásica a espazos patrimoniais da provincia como pazos, mosteiros, igrexas, bens de patrimonio industrial, conxuntos etnográficos e espazos protexidos cheos de maxia e historia. As persoas interesadas en acudir a esta cita poderán asistir sen reserva, xa que a entrada é libre ata completar aforo.
A velada estará protagonizada pola soprano viguesa Begoña Salgueiro e a pianista ferrolá Andrea García. Ámbalas dúas contan cunha recoñecida traxectoria no panorama musical actual, amais formáronse xunto os mellores artistas e mestres en cadanseu ámbito así como Montserrat Caballé, Renata Scotto ou Nancy Argenta, no caso de Begoña Salgueiro ou profesores do talle de Vladimira Smausova, Ricardo Descalzo ou Iván Cítera na traxectoria de Andrea García.
“Música no Ar”, enmarcado no amplo programa da Deputación, “Con-Fiando Cultura” ten como meta promover e garantir o acceso igualitario á cultura para todos e todas, amais de por en valor espazos da memoria, da arte e da identidade.
