O Concello de Nigrán rematará esta semana as obras de conexión á rede municipal de saneamento nun camiño do barrio de Sanromán (Priegue), tal e como tiñan demandado os veciños. Deste xeito, os interesados xa poden tramitar esta conexión que beneficia a media ducia de vivendas e que completaría este núcleo. A través do persoal municipal, o Concello emprendeu estas obras que inclúen a reposición do pavimento e está a realizar a conexión mediante a instalación de preto de 50 metros de tubaxe en PVC.
“Desde o concello de Nigrán, e xa sexa con noso persoal municipal como en este caso, a través da concesionaria Aqualia ou plan concellos da Deputación ou co uso de remanente, temos como obxectivo completar o saneamento en todos os barrios e vivendas posibles porque o tratamento inadecuado das augas residuais xeneradas polas actividades humanas é unha das principais causas de contaminación das augas”, sinala Juan González, alcalde de Nigrán.
Tal e como informou o Concello aos veciños, estes deben acudir á oficina de Aqualia na Avda.Val Miñor, 2 (de luns a venres, de 09:00 a 13:00 horas) para solicitar a conexión ao mesmo.
