23.5 C
Pontevedra
Sábado, 13 de Xullo de 2024
Máis
    HomeVal MiñorNigránNigrán comeza a programación de agosto co 'Parrulas Fest'

    Nigrán comeza a programación de agosto co ‘Parrulas Fest’

    O Concello de Nigrán ofrece no esteiro de A Foz da Ramallosa desde o mércores 2 ao sábado 5 de agosto a cuarta edición do Parrulas Fest, festival gratuíto producido desde a cooperativa Charlatana e dirixido a público infantil e familiar. Nesta ocasión, a cita contará con 9 das mellores compañías de artes escénicas de todo o país (6 delas galegas) e unha arxentina de renome internacional. Clown, circo, acrobacias, teatro, malabares e outras disciplinas serán os protagonistas deste festival que, como é xa tradición, rematará coa gala solidaria de ‘Pallasos sen fronteiras’ conducida por Peter Punk, nome artístico do nigranés Isaac Rodríguez, director do Parrulas. Toda a programación pode consultarse na web do Concello de Nigrán www.nigran.es.

    “O ‘Parrulas’ é xa unha parte imprescindible na programación de verán do Concello de Nigrán, cada ano reúne a centos de familias moi fieles ao festival e de visitantes que veñen a desfrutar nunha contorna marabillosa de espectáculos de altísima calidade e sempre moi divertidos”, destaca o alcalde, Juan González.

    Os espectáculos arrancan o mércores co ‘Consertasso na horta’ de Brais das Hortas (19:30 h) e ‘Unha volta polo mundo’ da clown Minerflu (20:30). O xoves continúa con A Vela Circo, ‘O último que apague a luz’ (19:30); e o inocente pallaso ‘Nono’ (20:30). A maiores, o venres e o sábado ao mediodía (12:00 horas) haberá unha sesión especial destinada á primeira infancia (función musical con Martiña Soñadora o primeiro día, e de narración oral o segundo, con Caxoto). A tarde do venres prosigue co mago José Mari (Premio Nacional de Maxia Infantil 2022) e Mai Clown (19:30 e 10:30 horas). O sábado culmina o Parrulas Fest co clown arxentino de renome internacional Niño Costrini, nome artístico de Sebastián Guz, que presenta o espectáculo ‘Humanus Comicus’, unha parodia do mundo do circo; a continuación, como xa é habitual e conforme aos valores de compromiso social do festival, celebrarase a gala a favor de Pallasos sen Fronteiras (o fin é que o recadado mediante a ‘gorra solidaria’ dos artistas participantes vai directamente a esta entidade que traballa a nivel nacional e internacional a favor da infancia máis desfavorecida co obxectivo de mellorar a súa situación emocional).

    “Regresamos cunha programación moi variada e coidada na que, como sempre buscamos, destacan valores como a igualdade, o coñecemento, a escoita e o humor. Ao mesmo tempo favorecemos a socialización con familias e amizades e sementamos nos cativos o amor pola cultura e a lingua galega”, destaca Isaac Rodríguez, quen ten como obxectivo “situar a Nigrán no mapa dos festivais de artes escénicas en Galicia”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.