O Concello de Redondela pon en marcha a nova web de turismo, concibida como unha ferramenta de utilidade para as persoas visitantes ou para a propia veciñanza pero, sobre todo “como elemento dinamizador para sectores locais da hospedaxe e a hostalaría”.
A iniciativa do departamento que xestiona María Castro Abad, quere ser un escaparate “atractivo e dinámico”, con seccións ben diferenciadas –Que ver, Que facer, Onde comer, Onde durmir e Camiño de Santiago– de fácil acceso e que responda ás necesidades de información tanto das persoas visitantes como da propia veciñanza.
Nesta web atópase breve información sobre distintos elementos culturais (Monte Penide, o miliario de Vilar, a igrexa de Santiago, o leguario da Pantalla…) e propostas de enclaves paisaxísticos (A Peneda, Cedeira, areal de Cesantes, paseo da Portela…). Esta información, que detalla a xeolocalización, facilitará o coñecemento da historia de Redondela así como gozar dos beneficios da natureza.
Toda esta información, recollida en tres idiomas (galego, castelán e inglés), aparece recollida en grandes bloques: patrimonio, medio natural, sendeirismo, casco urbano, gastronomía e festas. Desta maneira facilita o acceso á información por parte do visitante ou persoa interesada.
Se ben a páxina está pensada para dar a coñecer os enormes recursos que Redondela posúe en materia de turismo, “adquire unha especial importancia para os sectores da hostalaría e a hospedaxe xa que, a través do portal web, veciñanza e visitantes terán completa información de todos os establecementos que se incorporen á páxina como os datos de contacto necesarios para facer reservas”, explica a alcaldesa Digna Rivas.
A rexedora local lembra que “estamos nun momento de extraordinaria importancia para o sector da hostalaría e hospedaxe cun crecente número de visitantes que superan xa cifras dos anos anteriores á pandemia”.
Nese contexto, Digna Rivas subliña a importancia “de desenvolver, por parte do Goberno local, todas aquelas iniciativas que contribúan a consolidar e fomentar ese crecemento e para iso, nada mellor que utilizar a potencialidade que nos ofrecen as novas tecnoloxías, cada día máis utilizadas polos visitantes para buscar, precisamente, o que ofrece a páxina nas súas seccións”.
Redondela ultima a posta en marcha da nova páxina web de turismo
A Concellería de Turismo mantivo reunións con representantes da hostalaría e a hospedaxe para coñecer a súa opinión sobre o novo portal e incorporar as súas achegas
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.