A partir do 11 de maio, Pemes, autónomos e autónomas e persoas traballadoras de Redondela, poderán contar cun servizo de atención persoalizada, apoiado por expertos nos distintos ámbitos temáticos, no que se resolverán as dúbidas que se lle poidan presentar e se lles informará das axudas de carácter fiscal, laboral e económico postas en marcha pola emerxencia sanitaria da COVID-19.
Trátase, segundo a alcaldesa Digna Rivas, de poñer ao alcance do sector produtivo do municipio “todas as ferramentas precisas que lle axuden, á maior brevidade posible, a unha volta á normalidade”.
A páxina web do Concello de Redondela conta cunha sección específica COVID-19, na que se recollerá información para Pemes, autónomos e autónomas e persoas traballadoras. Para unha maior funcionalidade, a páxina conta cun apartado de ‘Consultas frecuentes’ na que se irán rexistrando as preguntas recibidas polo servizo de asesoramento e as respostas que poidan ser de interese para outras empresas ou persoas con problemáticas similares.
Cómpre salientar que, dende o primeiro momento, a web do Concello de Redondela puxo a disposición tanto das empresas como da veciñanza, unha sección cun apartado específico no que se detallan as medidas postas en marcha, tanto polo Goberno da nación como pola Xunta de Galicia, Deputación de Pontevedra e Goberno local para paliar os efectos que, esta crise sanitaria sen precedentes, está a provocar no tecido empresarial local.
Esta sección de información sobre a COVID-19, “amplíase agora con este servizo específico para o sector produtivo de cara a resolver as dúbidas que se lle poidan presentar e a darlles conta das líneas de axuda habilitadas polas distintas administracións”
A alcaldesa subliñou que tanto esta sección web COVID-19 coma o servizo de consulta específico para Pemes, persoas autónomas e persoas traballadoras, forman parte “dun amplo plan de reactivación local no que traballa do Equipo de Goberno” e que, adiantou a rexedora local “incluirá un amplo abano de medidas de contención dos efectos que, a crise sanitaria, está a provocar no municipio”.
Nesa liña, concluíu Digna Rivas “o Goberno está elaborando un ‘Plan de choque’, para o que se contará coa participación da Asociación de Empresarios e persoas autónomas do municipio no que se inclúan unha serie de medidas concretas que axuden a contrarrestar o impacto que, para a nosa economía local, supón esta crise tanto económica como sanitaria”.
