13.7 C
Pontevedra
Mércores, 22 de Maio de 2024
Máis
    HomeComarcasRedondelaRedondela mobilizase contra a instalación dun local de apostas

    Redondela mobilizase contra a instalación dun local de apostas

    A Coordinadora contra a Casa de Apostas de Redondela convoca unha mobilización para este sábado ás 19 horas "contra un problema que afecta a toda a cidadanía"

    A apertura dun local dun ‘Salón Recreativo e de Xogo’ en Redondela, –nome co que figura no expediente que obra no Concello– ou local de apostas como asegura a veciñanza, vén de xerar unha grande inquietude social. Inquietude que sube de tono ao ter en conta o lugar da súa ubicación, a Avenida Ernestina Otero, camiño obrigado cara a zona escolar, ás instalacións deportivas e as zonas de ocio da mocidade.

    Na mañá de hoxe e na Casa da Cultura, Ana María González Soto, da ANPA do IES Mendiño; Damián Mo, un pai que participa a nivel particular, e Berto Covelo, do colectivo ‘ArteLixo’ eran a voz da Coordinadora contra a Casa de Apostas de Redondela á hora de anunciar a mobilización que terá lugar o vindeiro sábado, 27 de outubro ás 19 horas.

    Dende que se coñeceu a noticia da apertura deste local, sinalaba Ana María González, desenvolven concentracións todos os luns e as fan “á saída dos nenos e nenas cos colexios para darlle unha mair visibilización a este problema que temos en Redondela”.

    A maiores das mobilizacións semanais, a Coordinadora comezou a desenvolver un traballo de concicenciación en todos os aspectos, dende o social con recollida de firmas e información sobre o problema que supuña a apertura dun local destas características, ata o institucional presentando no Pleno da Corporación unha moción para conseguir o apoio do Concello “moción que todos os partidos aprobaron por unanimidade”.

    Damián Mo subliñaba a importancia da participación de todos os veciños e veciñas “para amosarlle aos grupos políticos que a veciñanza non está de acordo coa apertura deste establecemento”. Estamos a dicir ben claro, dixo, “que non queremos casas de apostas en Redondela”.

    Berto Covelo salientaba a labor que está a facer a Coordinadora “porque as concentracións e a información que estamos a dar está dando lugar a un debate”, esas mesmas concentracións, sinala Covelo “sirven para desnormalizar esa lacra”. O xogo e a ludopatía, afirmaba, “é a nova heroína coa que lles toca loitar aos nosos fillos” de ahí que recalcase a necesidade de que a cidadanía se manifeste este sábado “porque é un problema que afecta a unha parte da poboación de Redondela que son os nosos fillos e fillas en idades temperás e na adolescencia”.

    Os datos, sinalaban os representantes da Coordinadora, son “máis que alarmantes” e amosan que estamos ante perigo real xa que “en tan só catro anos, os casos de ludopatía incrementáronse nun 300 %”.

    Para Berto Covelo, o perigo é o intento que se está a facer “por normalizar” esta situación e citaba “os constantes anuncios na televisión, equipos de fútbol que nas camisetas levan publicidade de casas de apostas, futbolistas e famosos que anuncian as apostas deportivas…”. Por iso mesmo, non entende a cidadanía que prohibírase a publicidade do tabaco e do alcohol ” e porén con isto non se fai o mesmo a pesar de que está demostrado que é unha enfermidade e, en lugar de buscar medios para erradicala, estase intentando a súa normalización”.

    Damián Mo era claro ao dicir que “é un negocio ao que non lle miro nada positivo para a cidadanía. Calquera negocio ofrece un servizo a poboación pero, este negocio, o único que fai é que a mocidade engánchese á ludopatia”.

    A ollada política tamén tiña o seu espazo na rolda de prensa e apuntábase directamente á Xunta de Galicia “que daba unha autorización para este local e non só daba esa autorización, senón que a reforzaba cun informe favorable á apertura dunha casa de apostas na ubicación en que se pensa abrir” aseguraba Berto Covelo e engadía que “ese mesmo partido que goberna na Xunta e alí da autorización, apoianos aquí cousa da que nos congratulamos”.

    No encontro coa prensa, púxose sobre a mesa tamén a “incongruencia” do permiso de apertura. A Xunta concede un permiso no mes de abril –explica Berto Covelo– “cando un mes depois, en maio, iníciase o borrador para cambiar a Lei e, con ese borrador na man, esa casa de apostas non podería estar aí”. “Estamos a falar da historia dunha contradicción”, afirmou.

    Éntre as medidas máis inmediatas, amais da manifestación do vindeiro sábado, está a de presentar alegacións “unha vez que se inicie o período de exposición pública posto en marcha polo Concello”. A Coordinadora ten un grupo de traballo “para explicarlle á xente a realidade da situación, orientala á presentación de alegacións a maiores das que presentaremos nós”. “Imos facer presión aínda que chegue a abrirse. Non a queremos, nin aí, nin en ningún outro lado, pero aí seguro que non”.

    Se a sociedade en xeral está inquieta coa apertura deste local de apostas, –as máis 3.000 firmas recollidas ata o momento contra a súa apertura son boa mostra diso– non é menos o malestar da comunidade educativa que se reflicte no feito de que, “absolutamente todas as ANPAS de Redondela están involucardas na Coordinadora”, asguraba Ana María González.

    O certo é que a cidadanía de Redondela está a decir non á casa de apostas, local de xogo, ou como se lle queira chamar. A mobilización do sábado é un principio xa que se algo quedou claro na rolda de prensa desta mañá, é que a Coordinadora non parará ata conseguir os seus fins. “Non imos deixar sos aos nosos mozos e mozas ante este problema”, aseguraban.

    É evidente que sós non estarán porque, como sinalaban, están a recibir apoios de colectivos e particulares doutros concellos conscientes de que, o problema que hoxe vive Redondela e que ameaza seriamente ao sector máis novo da poboación, maña afectaralles a eles nos seus municipios. Se as administracións que teñen competencia nesta materia non adoitan medidas urxentes, so será cuestión de tempo.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.