A Concellería de Transparencia, Novas Tecnoloxías e Participación Cidadá do Concello de Redondela, que xestiona Susana Couñago, vén de iniciar o proceso de actualización das bases de datos das asociacións e entidades veciñais de cara a ter unha listaxe o máis actualizada posible para que todas as asociacións do concello dispoñan da mesma información e teñan as mesmas oportunidades, por exemplo, para acceder a axudas municipais.
As asociaciós e colectivos deberán remitir os seus datos de contacto, á maior brevidade posible, ao enderezo de correo electrónico transparencia@redondela.gal. O que se require é que se facilite ao Concello unha dirección de correo electrónico que preferiblemente sexa institucional (unha dirección a nome da asociación), e non un enderezo persoal de calquera membro do colectivo, así como un teléfono de contacto.
Nestes momentos a listaxe está incompleta xa que faltan datos de contacto dalgúns colectivos, noutros casos a dirección de correo electrónico e teléfono de contacto non están actualizados e/ou pertencen a unha persoa física, e non da propia entidade, etc.
O actual equipo de Goberno quere facer da Participación Cidadá e da Transparencia os dos piares básicos da súa acción política e para iso é necesario que a comunicación coa veciñanza sexa fluída e de dobre dirección. O Goberno entende que as Asociacións Veciñais de todo tipo (parroquiais, deportivas, culturais, etc.) deben ser as canles de interlocución naturais co Concello.
Doutra banda, a Concellería de Transparencia, Novas Tecnoloxías e Participación Cidadá desenvolverá uns cursos de balde dirixidos a todas as distintas entidades e asociacións de Redondela sobre a Administración Electrónica. Nestes cursos explicarase o funcionamento do certificado dixital (trámites, solicitudes) así como o uso da sede electrónica do Concello de Redondela (manexo da páxina, presentación de escritos, subvencións, etc.).
Os cursos serán impartido nunha xornada cunha duración aproximada de 3 horas, e impartiranse nos venres 16, 23 e 30 de agosto en horario de 10:30 h a 13:00 horas. Todas aquelas entidades ou asociacións que queiran apuntarse deberán enviar un correo electrónico a transparencia@redondela.gal indicando a entidade, teléfono de contacto, e o número de asistentes (ata un máximo de tres persoas por entidade) con indicación do venres de agosto que prefiran asistir.
