O Concello de Redondela, na súa política de reforzamento das políticas de emprego, contratará a un total de 18 persoas en situación de desemprego ao abeiro da Liña 3 do Plan Concellos da Deputación de Pontevedra para o que destinará un orzamento de 264 325,09 € dos que a Deputación de Pontevedra achegará 257 580,89 euros mentres o Concello de Redondela aportará os 6774,20 € restantes.
Tal e como apunta a alcaldesa Digna Rivas, as contratacións “non so supoñen un respiro económico para as persoas contratadas, senón que contribúen a reforzar os servizos que se prestan á veciñanza”.
En total, o Concello contratará a 1 traballador/a social, 3 guías turísticos e 3 axudantes de servizos de actuacións de electricidade. Estes 7 contratos terán unha duración de 6 meses a xornada completa. Doutra banda, tamén se contratará a un total de 11 peóns forestais, a xornada completa, durante un tempo de 5,3 meses. A selección de persoal levarase a cabo a través dos Servizos Públicos de Emprego.
Digna Rivas aclarou que a contratación das 11 persoas como peóns forestais, permitirá dar continuidade ao programa de rozados e limpeza de estradas e camiños municipais iniciado o pasado ano no que, por primeira vez “o Concello optou por contratar a persoas desempregadas para o desenvolvemento destas tarefas en lugar de optar pola contratación dunha empresa, como se facía cos anteriores gobernos”.
A alcaldesa de Redondela, subliñou que a decisión adoptada, “non so foi dar unha saída as veciñas e veciños en situación de desemprego, senón que tamén supuxo unha mellora substancial na prestación do servizo de rozado, como quedou comprobado e así o recoñece a veciñanza”.
Redondela contratará a un total de 18 persoas desempregadas ao abeiro da liña 3 do Plan Concellos
As contratacións permitirán reforzar servizos de interese xeral e social e contarán cun orzamento de 264 325,09 €
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.