A Deputación de Pontevedra ten programada para esta semana o arranque de dúas novas accións formativas de “Conectadas” en Redondela e Lalín. En total participarán preto de 30 mulleres neste programa provincial que ten como principal obxectivo potenciar a promoción e saúde das mulleres a través da formación.
Este luns, 23 de outubro, doce usuarias da Fundación FORMAVIGO participarán no taller “Actívate na procura de emprego” que se impartirá os luns e martes cun horario de 9:30 a 12:00 horas no edificio Multiusos da Xunqueira en Redondela. O segundo curso comezará este martes, 24 de outubro, e vai dirixido a quince mulleres da Asociación de Veciños de Moneixas (Lalín) que practicarán pilates no Centro Social todos os martes de 16:00 a 17:30 e os sábados de 10:00 a 11:30 horas.
Este ano participan en “Conectadas” 4.000 usuarias de 219 entidades de 53 concellos da provincia. Os colectivos puideron escoller entre 30 obradoiros ofertados dentro de cinco bloques temáticos: “Emprende, iniciativas sostibles para o emprego”, “ExpresARTE”, “Conéctate”, “Sementa sostibilidade” e “O teu momento. Coidado e benestar”. Todas as accións formativas inclúen, de forma transversal nos seus contidos, o tratamento da igualdade entre homes e mulleres e teñen unha duración de 35 horas.
