O Concello de Redondela traslada as feiras que coincidan en día laborable ao domingo máis próximo

As feiras que habitualmente celebrábanse en Redondela os días 6 e 21 de cada mes, cambiarán a súa data –cando esta coincida en día laborable– para celebrarse no domingo máis próximo. O cambio adoptado polo Goberno local permite pechar ao tráfico rodado a Avenida Mendiño; instalar o 100 % dos postos, mantendo entre eles a distancia de seguridade marcada polas autoridades sanitarias e, ao mesmo tempo, facilitar o distanciamento entre as compradoras e compradores.

A nova medida foi explicada esta semana ao colectivo de vendedores e vendedoras polo concelleiro de Feiras e Mercados, Vicente Lamas, e entrará en vigor de inmediato de tal xeito que a feira que tería que celebrarse o vindeiro martes, 6 de abril, adiántase ao domingo día 4 de abril.

Non se pode esquecer que a Avenida Mendiño é unha vía que rexistra unha alta densidade de tráfico rodado ao ser o acceso natural aos institutos e centros escolares, pavillón de deportes, conservatorio, piscina municipal e centro de saúde. Por ese motivo, explica a alcaldesa Digna Rivas, “o seu peche en día laborable é impensable e de manter as feiras nos seus días habituais, obrigaría a reducir o número de postos para poder cumprir as normas sanitarias establecidas”.

En todo caso, e pese ao peche ao tráfico rodado da Avenida Mendiño durante a feira, quedará habilitado un corredor que, en caso de necesidade, permita o paso de ambulancias ao centro de saúde ou aos servizos de emerxencia.

A alcaldesa de Redondela subliñou a necesidade deste cambio “para poder desenvolver unhas feiras que constitúen un elemento dinamizador da economía local e, ao mesmo tempo, non baixar a garda nas medidas de prevención sanitaria”.

Segundo a nova medida, as feiras ata o mes de decembro, desenvolveranse nas datas que figuran no seguinte cadro:

Estas datas serán mantidas sempre que o concello de Redondela non rexistre un nivel alto de risco sanitario e non se atope en situación de peche perimetral.