O Obradoiro de Estudos Locais Fernando Monroy de Redondela organiza, para este vindeiro domingo, 23 de abril un acto de homenaxe aos mestres Carmen Barreiro Seoane e Óscar Rey Belle, acto que terá lugar no Centro Cultural de Cesantes ás 12 horas e que contará coa participación do grupo de gaitas Airiños de San Simón. A homenaxe quere lembrar o traballo que fixeron, durante anos, para “alimentar as mentes” de tantos nenos e nenas de Cesantes.
Carmen Barreiro Seoane e Óscar Rey Belle casaron en xullo de 1934 cando ela era Mestra Nacional en Cepeda, Pazos de Borbén, e el Garda Forestal no mesmo lugar.
No ano 1944 Carmen chega como mestra con plaza definida para a Escola Unitaria Mixta de Outeiro das Penas en Cesantes, Redondela. Antes xa impartira docencia cando menos en dous lugares mais, Silleda e Cepeda. Pola súa banda, Óscar chegaría como mestre a Cesantes anos mais tarde, na década dos 50, si ben con anterioridade xa impartira clase de xeito interino en dous colexios do actual concello de Vigo.
Durante os anos que o matrimonio exerceu o maxisterio en Cesantes, residiron na propia parroquia, preto da escola que estaba ubicada na antiga sede da desaparecida Sociedade de Agricultores e que actualmente ocupa o Centro Cultural e Deportivo de Cesantes.
Alí, durante tantos anos, nunhas condicións precarias, onde moitas veces faltaba o material mais básico e se tiñan que facer cargo de dar clase en moitas ocasións a cursos de mais de cen alumnos, alimentaron as mentes de tantos e tantas nenos e nenas de Cesantes.
Ambos se xubilaron no seu último destino, Cesantes; primeiro Óscar e despois, no 1969, Carmen.
