16.5 C
Pontevedra
Xoves, 20 de Xuño de 2024
Máis
    HomeO CondadoPonteareasPonteareas reorganiza as súas concellarías tras os cambios no goberno para optimizar...

    Ponteareas reorganiza as súas concellarías tras os cambios no goberno para optimizar a xestión municipal

    Tras a saída do finado Xosé Represas, o Goberno local reordena as competencias poñendo á fronte das diferentes concellarías a persoas con amplos coñecementos e experiencia nesas áreas

    Tras a renuncia de Xosé Represas e a toma de posesión de Cristina Fernández Davila como alcaldesa, o Goberno municipal de Ponteareas realizou unha reordenación de competencias co claro obxectivo de “acadar un funcionamento óptimo dos servizos prestados á veciñanza”, poñendo á fronte das diferentes concellarías a persoas con amplos coñecementos e experiencia en cada unha das áreas.

    Así, por unha banda, a alcaldesa Cristina Fernández Davila asume as competencias que dependían do anterior alcalde (Urbanismo, Medio Urbano e Seguridade Cidadá e Emerxencias) e mantén a coordinación de Ensino e Saúde, áreas que xa dirixía até o de agora. Mentres, a rexedora deixa a área de Consumo, que dirixirá Eva Gil, e a de Eventos, que agora asume Miguel Bouzó.

    Outro dos cambios significativos nesta reorganización de competencias é a saída de Nahir Covelo por mor da súa situación persoal e laboral, o que supuxo que Bouzó asumise recentemente a concellaría de Deportes, así como a incorporación de dúas persoas ao Goberno municipal para situarse ao fronte de áreas que dependían directamente de Xosé Represas na anterior etapa.

    Deste xeito, Lola Covelo entra a formar parte do goberno para asumir os asuntos relacionados con infraestruturas básicas, como o saneamento, o abastecemento de auga ou as rozas. Ao cargo de Facenda estará Francisco Alonso, que regresa á corporación municipal “tras ser no anterior mandato, xunto a Represas, o artífice da xestión eficaz que logrou sanear a economía do Concello tras décadas de débedas, ruína e bancarrota”.

    Tras asumir Fernández Davila a alcaldía, prodúcese tamén unha variación nas tenencias de alcaldía, pasando a ser Roberto Mera o tenente de alcalde e manténdose Chus Garrote na segunda tenencia de alcaldía como ata o de agora. A terceira tenente de alcaldesa será Verónica Carrera.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.