A Semana Europea da Mobilidade é unha campaña de ámbito europeo destinada a sensibilizar á sociedade sobre as consecuencias negativas que ten o uso irracional do coche nas cidades e vilas, tanto para a saúde pública como para o medioambiente e os beneficios do uso de modos de transporte máis sostíbeis coma o transporte público, a bicicleta ou os desprazamentos a pé. Celébrase desde 1999 do 16 ao 22 de setembro con actividades para promocionar a mobilidade sostíbel. O día 22 ademais celébrase todos os anos o evento “A cidade sen coche” no que en 2019 participaron 3.136 cidades europeas e á que este ano se suma por vez primeira Ponteareas.
A concellaría de Mobilidade e Tráfico que dirixe Roberto Mera, en colaboración coas de Mocidade e Vías e Obras, dirixidas por Miguel Bouzó e Chus Garrote respectivamente, desenvolve durante esta semana diferentes actuacións e actividades a favor da mobilidade a pé e en bici.
No día de onte entrou en vigor a limitación de velocidade na Avenida de Castelao a 30 km/h, mediante substitución da sinalización vertical. Deste xeito, as vías urbanas de Ponteareas están limitadas a 20 km/h con prioridade peonil, a Avenida de Castelao dependente da Xunta a 30 km/h e a rúa Real dependente do Ministerio de Transporte a 50 km/h.
Hoxe o concelleiro de Mobilidade Roberto Mera participa na xornada “Por unha mobilidade sen emisións” organizada polo Ministerio para a Transición Ecolóxica e o Reto Demográfico.
Mañá venres instalaranse na nova praza situada na rúa Doutor Fernández Vega, fronte ao mercado, os primeiros aparcadoiros públicos de bicicletas da vila de Ponteareas.
A partires do venres tamén se iniciarán dúas campañas de control do tráfico dirixido a protexer ás persoas que camiñan ou que circulan en bicicleta. Por unha banda, realizaranse controis de radar en diferentes rúas e avenidas da vila para concienciar ás persoas condutoras da importancia de respectar os límites de velocidade en zona urbana. Os controis de radar estarán precedidos de información visíbel na propia calzada. Por outra banda, durante esta semana intensificarase a vixilancia dos pasos de peóns, os cebreados de seguridade para a súa visibilidade, as beirarrúas e os espazos peonís, evitando que os vehículos invadan os lugares reservados para as persoas. Xunto coa correspondente denuncia, os axentes entregarán ás persoas infractoras un folleto informativo baixo o titulo: “As persoas tamén contan, non invadas o seu espazo!” coa intención de concienciar sobre a necesidade de que as persoas condutoras respecten os espazos reservados para as persoas.
O luns a Xunta de Goberno acordará iniciar os expedientes de adhesión do Concello de Ponteareas a dúas redes municipais: a Rede de Cidades que Camiñan e a Rede de Cidades pola Bicicleta.
O martes celébrase o Día Europeo sen Coches e Ponteareas adhírese á iniciativa con varias actividades. Durante todo o día, o establecemento Toñi Porto Bicimecánica ofrece revisión de balde de bicicletas. Ás 16:30 abrirase a ciclovía da Praza da Perillana, unha rúa perimetral da praza que a partires do día 22 pasa a estar reservada de maneira permanente para o uso da bicicleta, permitíndose unicamente o acceso a garaxes a 10 km/h e con preferencia de bicis e peóns. Ás 17:30 na rúa Rogelio Groba iniciarase a actividade “Ponte no seu lugar”, en colaboración con Adapta, coa que os participantes poderán vivir a experiencia das dificultades de mobilidade nunha cadeira de rodas. A partires das 18:00 procederase a pechar ao tráfico a rúa Constitución e a Praza de Bugallal, xenerando un amplo espazo sen vehiculos xunto coa Praza Maior, Rúa da Esperanza e Rúa de Oriente. Nese espazo desenvolverase unha xincana en bicicleta en colaboración co Club Ciclista Ponteareas e Biciebike.
