O Concello de Ponteareas organiza varias visitas aos “chiringuitos” da Freixa para aquelas persoas que estean interesadas en presentar as súas solicitudes poidan obter información de primeira man. Serán o luns 15 e martes 16 de abril desde as 10:00 horas ata as 12:00 horas e non é necesaria inscrición previa.
Deste xeito, as persoas físicas ou xurídicas que queiran optar a algún dos “chiringuitos” da praia fluvial da Freixa poden coñecer os espazos habilitados nunha visita que organiza a administración local co obxectivo de facilitar o acceso á información. Deberán presentarse no lugar a partir das 10:00 horas ambos os días e estarán acompañados pola concelleira de Medio Ambiente Silvia Fernández.
Cómpre lembrar que en total son catro “chiringuitos” e a concesión é por un período de catro anos prorrogables. Ademais, contan con subministro eléctrico, de auga e o correspondente saneamento. O prazo para presentar as solicitudes finaliza o día 24 de abril ás 14:00 horas.
A concelleira de Medio Ambiente, Silvia Fernández, indica que “animo a todas as persoas que estean interesadas na concesión dalgún dos chiringuitos a que se acheguen á praia fluvial da Freixa o luns e o martes para que coñezan os espazos”.
