18.6 C
Pontevedra
Luns, 24 de Xuño de 2024
Máis
    HomeO CondadoPonteareasPonteareas opta a fondos europeos para a posta en valor do xacemento...

    Ponteareas opta a fondos europeos para a posta en valor do xacemento arqueolóxico de Troña

    O Concello de Ponteareas postulouse para obter fondos europeos cos que levar adiante un novo proxecto para a creación dun espazo multifuncional aberto á veciñanza que albergará un Centro de Interpretación e de recepción de visitantes do Castro de Troña. Para levar a cabo este proxecto, que suporá un investimento de máis de 1,2 millóns de euros, o Concello presentou a súa candidatura ao programa de mellora da competitividade e dinamización do patrimonio con uso turístico no marco do Plan de Recuperación, Transformación e Resiliencia convocado polo Ministerio de Industria, Comercio e Turismo.

    “Este proxecto permitirá impulsar o noso patrimonio cultural e atraer visitantes interesados en descubrir a nosa riqueza histórica. Será un reclamo importante co que seguir promovendo un turismo sostíbel, poñendo en valor o noso patrimonio e ofrecendo experiencias enriquecedoras ao público”, destaca a alcaldesa, Cristina Fernández.

    As novas instalacións estarás situadas nunha parcela no barrio do Outeiro, en Pías, que na actualidade conta cunha vivenda de planta baixa e baixo cuberta, unha edificación auxiliar e un almacén. Ademais a intervención inclúe a actuación na edificación auxiliar existente na propia contorna do castro, creando un centro de interpretación integral que dea apoio á persoa visitante e complete a súa experiencia.

    Entre as actuacións que se realizarán ao abeiro deste proxecto, están a recuperación e rehabilitación do castro a través do control da vexetación para evitar a proliferación de especies arbóreas invasoras e procederase á reexcavación de zonas xa escavadas en campañas anteriores e de novos puntos de interese para completar a interpretación de zonas xa intervidas. Tamén se restaurarán e recuperarán elementos xa escavados e aqueles novos que se descubran nunha nova actuación, así como os elementos etnográficos de interese que se atopan na contorna do xacemento. Ademais, crearase un itinerario para fomentar e garantir un bo uso turístico e cultural do espazo.

    Como sinala a concelleira de Turismo, Eva Gil, “o proxecto abórdase dende a perspectiva de centralizar e potenciar a relación do visitante co Castro de Troña e coa contorna social dos veciños e veciñas, apoiándonos espazo propicio e xerando un espazo público aberto a visitantes e veciñanza”.

    O proxecto contempla a creación dunhas instalacións altamente eficientes cun baixo consumo e cunha reducida pegada de carbono tanto na edificación que actualmente é vivenda como na situada na contorna do castro. O obxectivo “é potenciar a actividade cultural, social e turística da parroquia, devolvendo ao mesmo tempo o prestixio ao Castro de Troña, garantindo a conservación, mantemento e posta en valor do xacemento para conseguir un modelo turístico competitivo e sostible”.

    As instalacións estarán situadas a escasos 200 metros do xacemento arqueolóxico cun aparcamento tanto para vehículos como para autobuses moi próximos. Contarán cun auditorio que acollerá diversas actividades, así como dunha sala para obradoiros e outra de exposicións, que contará cunha innovadora exposición permanente formada por paneis, audiovisuais e pezas documentadas a través das que se contará a historia do Castro de Troña. Por outro lado, a pequena edificación situada na cima do xacemento empregarase como espazo complementario do Centro de Interpretación e albergará unha innovadora exposición sobre os aspectos máis relevantes e enigmáticos da cultura castrexa.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.