32.5 C
Pontevedra
Luns, 22 de Xullo de 2024
Máis
    HomeO CondadoPonteareasO poeta Alfonso Pexegueiro dará o pistoletazo de saída á Feira do...

    O poeta Alfonso Pexegueiro dará o pistoletazo de saída á Feira do Libro de Ponteareas

    Ponteareas prepárase para acoller a VII Feira do Libro, que do 13 ao 16 de xullo encherá a vila de presentacións, sinaturas, espectáculos e actividades de animación á lectura. Nesta edición, o recoñecido poeta ponteareán Alfonso Pexegueiro será o encargado de ler o pregón e dar o pistoletazo de saída a catro xornadas nas que veciños e veciñas poderán achegarse á literatura ao tempo que se dinamiza o sector e o comercio na vila.

    Organizada entre o Concello de Ponteareas e a Federación de Libreiros e Editores de Galicia, a feira abrirá as súas portas nun novo lugar, os xardíns do Concello, buscando así unha zona con espazos de sombra e creando un ambiente acolledor e confortable para gozar de todas as actividades.

    “A Feira do Libro é un evento emblemático na programación cultural de Ponteareas que vai máis alá da simple exhibición de obras. É unha oportunidade de encontro para todas aquelas persoas que comparten o amor pola lectura, un lugar no que mergullarse en mundos imaxinarios e descubrir novas historias e o mellor escaparate para promover e cultivar o interese pola literatura entre persoas de todas as idades”, resaltou a alcaldesa, Nava Castro.

    A programación comezará o xoves 13 coa apertura das casetas ás 18.00 horas e o espectáculo infantil ‘A Ramona pequena vai á lúa’, de Pakolas. Ás 19.00 h Andreia Costa presentará ‘Magnolia punk e outras arritmias’ para dar paso ás 20.00 h á lectura do pregón a cargo de Alfonso Pexegueiro e a unha actuación musical. Tamén ás 20.00 h Esther Sestelo estará asinando o seu libro ‘Clara y su diario en una experiencia maravillosa’ e ás 21.00 h Fabio Rivas presentará ‘A pintura debida’ e Samuel Merino asinará exemplares na Librería Milfollas.

    A feira continuará o venres 14 pola mañá coa apertura de portas ás 12.00 h e actividades infantís de animación á lectura a cargo da biblioteca municipal. Xa pola tarde, ás 18.00 h Xavier Estévez presentará ‘A memoria dos pingüíns’ e Samuel Ferro firmará exemplares de ‘Leyenda’ e ás 19.00 Almudena Santamarina asinará ‘Puede que algún día’ e Atenea García deleitará ao público co seu espectáculo de narración oral ‘Estrefalaria’. A xornada continuará ás 20.00 h coa presentación de ‘Setestrelo’ de Manuel Esteban e a firma de Ana Melón de ‘1977-2023’ e ás 21.00 h con María Xosé Porteiro presentando a súa novela ‘Tabiba’.

    O sábado 15 o público poderá desfrutar de ata unha ducia de actividades. Ás 11.00 h a biblioteca municipal levará a cabo novas actividades de animación á lectura e ás 12.00 h Ramón Otero estará asinando exemplares do seu libro ‘El Peregrino’. A programación reanudarase xa ás 18.00 horas con tripla proposta: a presentación de ‘Alma cazadora’ de Keyz Noyers e a sinatura de José Malvárez do seu ‘Incoloro’ e de Anémona del Río das súas obras. Ás 20.00 horas haberá de novo tripla sesión coa presentación de Teresa Ríos do seu libro ‘Corpo nómade’ e con Isabel Blanco firmando exemplares das súas obras e de Pablo Prado e David Braña da súa última obra, ‘A batalla de Rande’. Ás 21.00 h a feira botará o pano coa presentación de ‘Con esta hoz’, de Samuel Merino e un recital poético a cargo do propio Merino e Silvia Penas.

    A VII Feira do Libro de Ponteareas rematará o domingo 16 de xullo coa obra de teatro infantil ‘Feo’, de Caramuxo Teatro’, ás 12.30 h e con tres novas presentacións pola tarde: ás 18.00 horas de ‘Os ollos do irmán eterno’, de Borja Diérez; ás 19.00 h de ‘As cunchas baleiras’, de Branca Novoneyra; e ás 20.00 h de ‘Manuel Castro, Handicap, crónica dunha paixón’ de Adrián Estévez. A clausura será ás 21.00 horas cunha actuación da Banda de Música Reveriano Soutullo.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.