16 C
Pontevedra
Martes, 21 de Maio de 2024
Máis
    HomeO CondadoPonteareasO BNG oponse á supresión da quenda de tarde no Centro de...

    O BNG oponse á supresión da quenda de tarde no Centro de Saúde de Ponteareas

    Presenta unha iniciativa para que a Corporación reclame á Xunta máis persoal

    O Centro de Saúde de Ponteareas volverá quedar sen quenda de tarde a partir do vindeiro 1 de maio. Así o denunciou o BNG, que xa presentou unha iniciativa ao Pleno para que a Corporación Municipal inste á Xunta a manter a quenda de tarde no Centro de Saúde de Ponteareas e dotar o cadro de persoal dos profesionais suficientes para unha atención sanitaria digna.

    “Por todas e todos é sabido que miles de ponteareás e ponteareáns están sen persoal médico asignado, ou que hai que agardar ata cinco semanas para unha cita coa médica ou médico de familia”, sinala o Bloque. “Por se fose pouco, vimos de coñecer nas últimas horas a decisión de anular a quenda de tarde a partir do vindeiro mes de maio. Persoas que levaban semanas agardando a súa cita descobren que foron bloqueadas as axendas para as tardes do mes de maio e que as citas asignadas serán canceladas”, engaden.

    O BNG denuncia que “a situación da Atención Primaria no noso país é crítica como consecuencia do deterioro e desmantelamento programado da sanidade pública por parte do Partido Popular na Xunta de Galiza. Pero, entre a situación global, destaca a extrema gravidade que atravesa o Centro de Saúde de Ponteareas, cunha organización caótica e cun persoal a todas luces insuficiente”.

    A formación nacionalista propón tamén na súa iniciativa “dotar do persoal profesional necesario a Unidade de Saúde Mental da localidade, reforzándoa para reducir a lista de agarda”. O Bloque alerta que a Unidade de Saúde Mental de Ponteareas, de referencia para 50.000 persoas da comarca, “vive unha situación similar, con cancelación de citas e agardas inadmisibles. Nas últimas semanas estanse cancelando as citas dunha das dúas profesionais que prestan o servizo de psiquiatría e, ademais, continúa un único psicólogo, o que provoca que as persoas usuarias teñan que agardar ata un ano para seren atendidas”, conclúe o BNG.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.