O delegado territorial da Xunta en Pontevedra, José Manuel Cores Tourís, destacou esta mañá o inicio dos traballos de mellora do firme da PO-254 entre Ponteareas e Mondariz nos que a Consellería de Infraestruturas e Mobilidade está a investir algo máis de 139.000 euros.
O delegado territorial destacou que esta estrada, que enlaza ambos municipios do Condado, verase mellorada en diversos puntos quilométricos onde o firme se atopaba deteriorado polo paso do tempo, estendéndose unha nova capa de rodaxe e executándose reparacións puntuais.
Esta obra, que comezou esta mesma semana dende Ponteareas e que irá avanzando cara a Mondariz nos próximos días, forma parte dun paquete de melloras de firme en diversas estradas desta comarca do sur da provincia e que foi adxudicado por 62.234 euros e que afectará á PO-252, a PO-262, a PO-400, a PO-403, a PO-510, PO-406, e a PO-404. Estes traballos “permitirán mellorar estas estradas e dar unha maior calidade de vida e seguridade viaria a veciños e usuarios”.
Cores Tourís destacou que a Xunta continúa no camiño da mellora de infraestruturas iniciadas fai anos e recordou que o Goberno galego está a apoiar aos concellos para reforzar a seguridade viaria, incrementar a comodidade nos desprazamentos dos seus veciños e mellorar a calidade de vida da cidadanía.
Subraiou a aposta do Goberno galego polo interior de Galicia, polo reequilibrio territorial e polo desenvolvemento económico e social do conxunto do territorio, ofrecendo máis e mellores servizos aos veciños.
