Este pasado sábado 26 de febreiro, a Escola de Música de Xinzo (ESMU) ofreceu a súa audición anual de entroido no auditorio do Centro Cultural de Xinzo. Unha cita que abarrotou o auditorio de música, disfraces e un público entregado.
Os alumnos da ESMU foron os encargados de animar a tarde aos asistentes durante as case dúas horas que durou a audición desde o seu comezo ás 19:00 h. Máis de quince actuacións entre os solistas, os duetos e os grupos de cámara sucedéronse sobre o escenario do auditorio con temas tan divertidos e icónicos como os de Súper Mario Bros ou Os Picapedra interpretados polos músicos disfrazados, tal e como o requiría a ocasión.
Tras esta, a seguinte audición da ESMU non terá lugar ata abril, cando finalice o segundo trimestre do curso. Aínda que, antes desta data, haberá outra oportunidade para volver escoitar a estes músicos. Será o próximo 12 de marzo, cando se reúnan para celebrar o III Festival de Bandas Infantís de Xinzo.
