O Goberno municipal mellora as instalacións do CPI de Mondariz

O alcalde de Mondariz, Xosé Emilio Barros, e a concelleira de Educación e Cultura, Anxos Carballo, visitan o CPI de Mondariz para supervisar as obras de mantemento do Concello de Mondariz nas instalacións do centro educativo.

As semanas previas ao inicio do curso escolar, o Concello de Mondariz concentrou os seus esforzos en mellorar as instalacións do CPI, un centro de educación infantil, primaria e secundaria no que estudian máis de 300 rapaces e rapazas de Mondariz e concellos veciños.

A dirección deste colexio público levaba tempo demandando obras de mantemento que non estaban recollidas no orzamento municipal vixente, conxelado desde 2017 porque nos dous últimos anos foi aprobado mediante o procedemento extraordinado da cuestión de confianza. 

Á vista das deterioradas infraestructuras, o goberno municipal emprendeu traballos de limpeza e desbroce no recinto exterior, así como obras de mantemento na área de fontanaría. Tamén se fixeron reparacións necesarias nos caleiros para garantir unha óptima recollida de auga nos días de choiva. Interiormente, pintáronse as paredes do salón de actos, da sala de profesores e de diversas aulas e creouse unha rampla que facilita o acceso á aula de psicomotricidade.

Esta actuación, que tivo carácter de urxencia por non estar recollida no plan orzamentario, demostra o compromiso do goberno municipal co ensino público e a vontade de traballar por uns servizos públicos de calidade no Concello de Mondariz.

Ao mesmo tempo, continuáronse as obras de instalación dunha pasarela cuberta entre o edificio de educación infantil e a entrada principal ás aulas de primaria e secundaria, financiadas o ano pasado pola Deputación de Pontevedra, dentro do Plan Concellos.