A concelleira de Festas do Concello do Porriño, Cami Moreira, presidiu na mañá de hoxe lunes, 9 de agosto, unha reunión de traballo de cara a establecer os protocolos de seguridade para o II Festival ‘Sons da Canteira’, evento organizado polo Concello do Porriño, que volverá o próximo 28 de agosto á canteira de Vilafría, en proceso de restauración.
Xunto coa concelleira de Seguridade, Lourdes Moure, asistiron o oficial xefe en funcións da Policía Local, o responsable da agrupación de Protección Civil, mandos da Garda Civil e responsables da empresa promotora do espectáculo.
“Sons da Canteira –sinala o Concello porriñés– establece estritos protocolos de seguridade e distanciamento social para un aforo reducido de persoas ao aire libre”. O festival ten, ademais, persoal dedicado en exclusiva á limpeza e xestión de residuos.
Os protocolos de seguridade, coa experiencia acadada na edición de 2020, son basicamente os mesmos cos engadidos que require o aumento de aforo que haberá este ano que pasará das 500 localidades do 2020 ás 600 deste 2021.
Para facilitar o acceso á Canteira de Vilafría, a organización porá a disposición das e dos espectadores autobuses gratuítos con saída dende O Porriño ás 17 h, 17 h e 18 h). Á hora de facer a compra, cada persoa poderá escoller o horario de autobús que mellor se lle axuste, xa que este será o único xeito de acceder cun vehículo ao recinto do festival. Unha vez no recinto, a pulseira de acceso funcionará tamén como moedeiro para facer todos os pagos pertinentes durante o festival utilizando a tecnoloxía cashless. Do mesmo xeito, o festival implanta nesta edición un servizo de atención en mesa para evitar aglomeracións e desprazamentos durante os concertos.
As entradas para esta edición de Sons da Canteira aínda seguen á venda. Poden mercarse na web sonsdacanteira.gal. O prezo é de 24 €/persoa a entrada individual e en parellas, e de 22 €/persoa para grupos de catro e seis asistentes.
O cartel desta edición estará formado polo trap galego, flow costumista o twerking rural de Boyanka Kostova; o pop, disco e trap de Verto; o folklore africano, a electrónica e o dancehall da lisboeta Pongo que ofrecerá en Sons da Canteira o seu único concerto en España; os sons eclécticos de Mounqup, que estreará no festival o seu novo espectáculo de gran formato, Akelarre AVS Extended Show; polos sets variados e transversais da DJ Teresa Ferreiro; e polo grupo local de danza e música tradicional Os Penediños de Atios.
