O conselleiro de Cultura, Educación, FP e Universidades, Román Rodríguez, comprobou nestes días, acompañado pola alcaldesa, Nidia Arévalo, o resultado das obras de restauración da igrexa de Santa Baia de Mos, que a Xunta apoiou cun investimento de máis de 65.000 €. O obxectivo das actuacións, realizadas na segunda parte do ano 2022, foi restaurar parte do interior do tempo como acometer a limpeza dos paramentos exteriores.
Na primeira das fases executouse a conservación do presbiterio, en concreto das pinturas murais no arco triunfal e bóvedas. Ademais, nesta intervención acometeuse a recuperación das tumbas dos primeiros Marqueses de Mos.
A segunda fase consistiu na rehabilitación das fachadas, evitando posibles filtracións de auga, e volvendo ao aspecto inicial das mesmas. Para isto, procedeuse á súa limpeza xeral e desinsectación. Tamén se procedeu ao rexuntado de muros e á eliminación de antigos morteiros.
O responsable do departamento de Cultura da Xunta de Galicia puxo en valor esta restauración, “tanto polo valor da igrexa desde o punto de vista cultural como pola implicación da veciñanza na súa conservación”. De feito, na visita do conselleiro participou, ademais da rexedora local e membros da Corporación Municipal, o párroco, David López, e numerosos veciños.
