15.8 C
Pontevedra
Xoves, 20 de Xuño de 2024
Máis
    HomeBaixo MiñoTuiLuis López apela aos valores do Camiño de Santiago "para facer que...

    Luis López apela aos valores do Camiño de Santiago “para facer que Galicia sexa cada día máis grande” na inauguración do Monumento da Vieira de Tui

    O delegado territorial da Xunta asiste ao descubrimento desta escultura no punto de partida do Camiño Portugués e agradece á asociación de comerciantes e ao pobo de Tui a súa contribución á ruta de peregrinaxe

    O delegado territorial da Xunta en Pontevedra, Luis López, apelou aos valores propios do Camiño de Santiago e dos peregrinos “para facer que Galicia sexa cada día máis grande e teña máis futuro” durante o acto de inauguración do Monumento da Vieira de Tui, impulsado pola asociación de comerciantes Acitui e que quedou emprazado en plena Praza de Galicia da vila tudense.

    O representante autonómico, que foi o encargado de descubrir esta nova icona do Camiño Portugués na súa localidade de partida, quixo agradecer ao colectivo comercial e ao pobo de Tui a súa contribución a esta ruta de peregrinaxe. “Sodes uns grandes embaixadores das rutas xacobeas e un exemplo de acollemento e hospitalidade aos camiñantes”, indicou.

    Luis López tamén se lembrou das máis de 2.300 persoas que, tristemente, faleceron como consecuencia da covid-19 e convidou a todos os galegos a “seguir aplicando a responsabilidade, a solidariedade, o esforzo, o sacrificio, o compañeirismo, a amizade, a unión e a loita contra a adversidade, valores tan propios do Camiño, para dobregar ao virus e protexer a saúde dos galegos”.

    O delegado territorial cualificou o Monumento da Vieira como “unha perfecta icona que vai visibilizar a centralidade e importancia de Tui” como punto de partida do Camiño Portugués, que percorre 18 concellos galegos ata chegar a Santiago de Compostela e que está considerada como a segunda ruta peregrina en importancia atendendo ao volume de camiñantes. Finalmente, destacou a importancia estratéxica do Camiño de Santiago e do Ano Santo nos eidos turístico, social, económico e relixioso e amosou a súa confianza en que “será un elemento fundamental para a reactivación, tan pronto como se supere a pandemia, xa que ademais contamos coa merecida oportunidade de que sexa dobre e chegue ata o ano 2022”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.