A Xunta de Galicia, a través da Consellería do Medio Rural, destina unha achega de 267.352 euros a prol dos cinco concellos da bisbarra do Baixo Miño ao abeiro do Plan de mellora de camiños rurais 2023-2024. O delegado territorial da Xunta en Pontevedra, Luis López, informou onte desta resolución para esta zona nunha visita a Tomiño, onde supervisou as obras realizadas nos viais do Lago, na parroquia de Figueiró, grazas aos fondos concedidos coa anterior convocatoria, na compaña do xefe territorial do Medio Rural, Antonio Crespo, a alcaldesa, Sandra González, e outros representantes municipais, aos que confirmou que a dotación deste programa para o seu concello sitúase este ano en 67.196 euros, o que supón un lixeiro incremento con respecto ao exercicio precedente.
“A Xunta vai colaborar cos concellos do Baixo Miño, como todos os anos, e prevé inxectar uns 270.000 euros nesta bisbarra para a mellora dos seus camiños municipais de uso agrícola, algo que é fundamental para axudarlles a facilitar a súa mobilidade interna e tamén a destinada a estas tarefas do agro. Ademais, a aposta polo apoio aos concellos volve saír reforzada, posto que se consolida o forte incremento de entre o 20% e o 30% aplicado o ano anterior”, sinalou o representante autonómico.
En concreto, a resolución da Consellería do Medio Rural distribuirá, na comarca do Baixo Miño, os citados 67.196 euros a prol do Concello de Tomiño, 57.039 euros para Tui, 52.114 euros para Oia, 47.295 euros para A Guarda e 43.708 euros para O Rosal. As axudas poden solicitarse ata o 3 de abril.
Visita á mellora no Lago
Na súa visita ao municipio de Tomiño, o delegado territorial acudiu a supervisar as obras de pavimentación de camiños na parroquia de Figueiró, que foron executadas coa achega íntegra de 66.747 euros do Plan Marco 2022-2023. Esta actuación consistiu na renovación do firme en diversos tramos, que se atopaban deteriorados pola antigüidade da capa asfáltica, a carga de tráfico e os efectos da meteoroloxía, e outras pequenas melloras.
Ademais, o Concello de Tomiño recibiu nos últimos anos, ao abeiro deste programa de investimentos da Consellería do Medio Rural, unha contía global de 320.000 euros, o que lle permitiu actuar nunha vintena de pistas municipais nos lugares de Forcadela, Piñeiro, Tomiño, Barrantes, Goián, Tebra, Amorín, Vilameán, Lameira, Barro e Porto. “Tomiño é o municipio máis beneficiado do Baixo Miño e un dos que máis recibe da provincia ao abeiro do Plan Marco, xa que Xunta sempre ten ánimo de colaborar cos concellos e iso se traduce neste apoio tan importante, posto que ten en conta que este municipio distribúese en ata quince parroquias e supera os cen quilómetros cadrados de superficie”.
