O concello da Guarda recibiu da Deputación unha subvención “Ágora” de recuperación de espazos públicos para a redacción do proxecto “humanización da rúa Malteses, mellora da accesibilidade e da seguridade viaria”.
A redacción do proxecto de Malteses orzamentada en 18.113 € está financiada nun 90 % pola Deputación de Pontevedra; que tamén subvenciona, dentro do mesmo programa, o proxecto de “mellora na seguridade infantil no entorno do CEIP As Solanas.
O proxecto de humanización da rúa Malteses abarca unha superficie de 1300 m2, dende o nº 2 no cangrexal, ata o nº 94 no aparcadoiro de Reguiño incluíndo todos os transversais, completos cara ao mar e parciais cara a zona alta.
Esta humanización ten encaixe no plan municipal de renovación e modernización do parque de vivendas, “plan REHABITA”, xa que pretende a mellora e rehabilitación do espazo público en consonancia coa rehabilitación que os particulares están realizando nas súas casas. Así, dende o concello, motivarase aos propietarios para que actúen sobre os seus inmobles e conseguir unha actuación integral sobre o espazo urbano.
Os principais obxectivos da actuación, dende o punto de vista funcional son: eliminar o acceso rodado, agás a residentes e vehículos autorizados; garantir, na medida do posible, as condicións de accesibilidade universal e mellorar cruces, varandas e interseccións. Ademais xéranse espazos de encontro e consolídase unha imaxe de conxunto.
Entre as actuacións que se propoñen contemplase a renovación do pavimento, recollida das augas pluviais, mellora da iluminación, sinalización, mobiliario urbano adaptado e a renovación dos demais servizos.
A intervención manterá o máximo respecto á memoria da rúa. Sobre as pedras levará talladas marcas mariñeiras e indicacións a lugares senlleiros da localidade. O pavimento será coma unha alfombra que relata a historia da vila.
