A Cañiza xa está preparada para celebrar a súa 57 Feira do Xamón, cunha edición chea de actividades ao redor do seu produto estrela.
A festa comezará o domingo, 13 de agosto. celebrando o «VIII Obradoiro do Bocadillo de Xamón» no que fabricarase un gran bocadillo de 20 metros de longo. Un ano máis, cortarase un xamón da Cañiza e se fabricará unha barra de pan xigante dunha soa peza. E de sobremesa, unha rosca doce xigante.
Para ir preparando o padal antes da Feira do 15 de agosto, o domingo 13 de agosto, na rúa Oriente, o Concello organiza o VIII Obradoiro do Bocadillo de Xamón coa colaboración do xamonero Víctor Burgos.
A partir das 18 horas poñerase en marcha a fabricación do Bocadillo xigante de xamón, onde se tentará superar os 20 metros de barra de pan do pasado ano. Víctor Burgos, profesional do corte de xamón e director do Concurso de Cortadores que se celebrará na Carballeira do Cacharado o propio 15 de agosto, será de novo o responsable de cortar un xamón enteiro nun só lisco, sen desprenderse, superando os 26 metros do ano pasado.
Xamón que irá parar á barra quente que se enfornará en público e darase a degustar a todos os asistentes.
Ao mesmo tempo os máis novos e tamén pequenos da casa, poderán gozar co Obradoiro de pan que tamén se abrirá á mesma hora e no mesmo emprazamento. Aprenderán a elaborar a masa, darlle as formas máis curiosas e enfornar o pan. Unha actividade gratuíta para todos.
