O alcalde de Covelo, Pablo Castillo, vén de dar conta do inicio das obras de mellora da contorna da igrexa de Santiago en Prado da Canda. Na súa aposta por unha vila máis amable o Concello avanza na remodelación de espazos públicos que son punto de encontro da veciñanza. Esta intervención ten un custo de 197 302 € que serán financiados con fondos propios a través do antigo Plan Concellos 22/23, na actualidade +Provincia da Deputación de Pontevedra.
O Concello realizará unha intervención integral con traballos no subsolo e tamén en superficie transformando o espazo público para un maior desfrute da cidadanía. O actual asfalto será substituído por pedra co obxectivo de embelecer a zona e potenciar o seu atractivo. Ademais, as obras abordarán o saneamento en dous ramais da Aldea de Abaixo e a canalización das recollidas de auga pluviais. “Traballamos para que o día a día da nosa veciñanza sexa máis doado e agradable por iso a nosa prioridade é a mellora dos espazos e servizos públicos indispensables para desenvolvernos, para relacionarnos e mesmo para recibir ás persoas que nos visitan”.
Para a execución das mesmas deberán realizarse traballos de demolición; preparación do terreo, colocación de drenaxe, tubaxes e colectores; preparación de cunetas con adoquín en granito silvestre, retiradas previamente as existentes de formigón, e apertura de cunetas onde exista arcén de terra. Ademais, instalaranse canaletas e rellas de fundición e renovarase o pavimento en todo o trazado tanto na Aldea de Abaixo como no ramal con tramos de formigón e espazos e accesos peonís con solados de granito silvestre ao igual que na contorna da igrexa de Santiago.
As obras complétanse coa instalación de novas barandas, pasamáns e rodapés. Tamén se contempla a colocación de bancos de granito silvestre e sinalización de limitación de velocidade a 30km/h.
O Concello de Salvaterra de Miño acaba de iniciar as obras de reparación dos danos ocasionados polas inundacións, traballos nos que investirá preto de 140 000 euros coa colaboración da Deputación de Pontevedra a través das subvencións concedidas para que os concellos da provincia poisan facer fronte á reparación dos danos causados polas inundacións de comezos do 2023.
Despois de obter os permisos de Confederación Hidrográfica Miño Sil, que permitiron a licitación do proxecto, o Concello que preside Marta Valcárcel inicia as obras de reparación de danos no camiño do Xestal en Arantei. Ao que lles seguirán as obras no camiño Espedrigada en Porto, na Fillaboa, camiño no Muíño da Ponte en Corzáns, camiño de Serradela a Casco, Medóns e Sampríns na parroquia de Leirado.
‘A despensa de Galicia’ do Xeodestino Ría de Vigo e Baixo Miño bota a andar. Alcaldesas, alcaldes, concelleiros e concelleiras dos 13 municipios do territorio que forman parte do Plan de Sostibilidade Turística en Destino (A Guarda, Baiona, Fornelos de Montes, Gondomar, Mos, Nigrán, O Porriño, O Rosal, Oia, Pazos de Borbén, Redondela, Tomiño e Tui) mantiveron un encontro este mércores en Tomiño para perfilar as primeiras accións que se porán en marcha ao abeiro deste plan que busca transformar o modelo turístico do territorio en base ao potencial da súa enogastronomía.
A presidenta da Asociación de Desenvolvemento Galicia Suroeste Eurural e alcaldesa de Tomiño, Sandra González, presidiu a reunión, que contou coa participación de Paco Ferreira, rexedor de Gondomar; Juan A. González, alcalde de Nigrán; Ánxela Fernández Callís, rexedora do Rosal; Cristina Correa, alcaldesa de Oia; Luciano Otero, alcalde de Pazos de Borbén; e cos concelleiros e concelleiras Fernando Reyes, da Guarda; Sheila González, de Baiona; Rocío Goberna, de Gondomar; Julia Loureiro, de Mos; e Rita Pérez, de Redondela.
Catro proxectos e tres eixos
Durante o encontro, os representantes municipais deron luz verde a catro proxectos encadrados en ‘A despensa de Galicia’ e cos que se levarán distintas accións a diferentes concellos do territorio. Así, encadrado dentro da liña de transición verde e sostible, comezarase a traballar na creación dun plan de xestión de residuos con varias medidas de economía circular nas festas gastronómicas de interese turístico.
Dentro do eixo relacionado coa transición dixital, o Xeodestino Ría de Vigo e Baixo Miño comezará a dar xa os primeiros pasos en dous proxectos distintos: por un lado, a implantación de sinalización intelixente para achegar información ás persoas que visitan o Xeodestino, e, por outro, a creación de contidos dixitais vinculados coa enogastronomía local, ao abeiro do que se poderá incorporar novo material gráfico e audiovisual, actualizar a web ou deseñar un mapa interactivo e visitas virtuais 360º.
Por último, xa dentro do ámbito da competitividade, alcaldes, alcaldesas, concelleiros e concelleiras aprobaron deseñar unha liña de axudas ao tecido empresarial para impulsar a enogastronomía de destino, apoiando a transformación e incorporación de innovación nos procesos e facilitando un salto cualitativo de toda a cadea de valor enogastronómica do Xeodestino.
No marco do Plan de Recuperación, Transformación e Resiliencia financiado por fondos Next GenerationEU da Unión Europea, ‘A despensa de Galicia’ contempla un investimento de 1,5 millóns de euros no Xeodestino Ría de Vigo e Baixo Miño. O plan convértese así nunha oportunidade única para financiar actuacións transformadoras e de calado suficiente como para converter a Ría de Vigo e Baixo Miño nun destino sostible, innovador, competitivo e rendible co que atraer a un turismo de alto valor engadido ao tempo que se apoia á economía local e se aposta polo desenvolvemento do territorio, do patrimonio, da cultura, da profesionalidade do sector, da promoción e da dinamización conxunta.
Presentación do plan antifraude
Durante o encontro, a Asociación de Desenvolvemento Galicia Suroeste Eurural presentou aos concellos o pioneiro plan antifraude posto en marcha, unha iniciativa destinada á prevención de riscos de xestión e medidas para loitar contra a fraude que permitirá establecer un sistema de control interno deseñado para previr, detectar e tomar medidas contra calquera posible actuación fraudulenta. O plan contará cunha Comisión Antifraude presidida pola concelleira de Mos, Julia Loureiro, que se reunirá de forma regular semestralmente ou de forma extraordinaria en caso de precisalo.
Por outra banda, os representantes municipais abordaron o convenio de colaboración entre Eu Rural e os concellos do territorio que permitirá artellar a xestión do Plan de Sostibilidade Turística en Destino do Xeodestino Ría de Vigo e Baixo Miño, fixando as principais liñas de colaboración, así como a coordinación para a xestión das actuacións correspondentes que se financiarán cos fondos europeos Next GenerationEU.
O Ministerio de Transportes y Movilidad Sostenible somete a información pública a modificación do proxecto de trazado para mellorar a seguridade viaria da estrada N-120 en Ponteareas, tras publicar hoxe no Boletín Oficial do Estado (BOE) a aprobación provisional do documento complementario ao devandito proxecto.
Tras os cambios realizados, recollidos no documento complementario, o proxecto inclúe a construción de dúas glorietas máis, a ampliación das sendas peonís previstas ao redor das glorietas e unha nova reordenación dos accesos á vía.
Zona de actuación da mellora da N-120 ao seu paso por Ponteareas
As obras contan cun orzamento de estimado de 3,35 millóns de euros (IVE incluído) e levarán a cabo no tramo da estrada N-120 comprendido entre o núcleo urbano de Ponteareas e a intersección do Confurco (aproximadamente de 5 km de lonxitude). As principais actuacións desenvolvidas no proxecto inicial son as seguintes:
Acondicionamento de interseccións mediante a implantación de seis glorietas.
Reordenación de accesos.
Execución dunha senda peonil anexa á estrada.
Extensión dunha nova capa de rodadura en todo o tramo.
Adecuación da sinalización, o balizamento e as defensas á nova solución.
As modificacións incluídas neste documento complementario, en base ás alegacións admitidas no trámite de información pública, recollen, entre outras cousas:
O deseño de dúas novas glorietas, unha no km 645,060 e outra no km 646,670. Así, en total, construiranse oito glorietas,
Ampliación da senda peonil na contorna da glorieta do km 645,400.
Ampliación da senda peonil na contorna da glorieta do km 648,640.
Unha nova reordenación de accesos á estrada N-120.
Iluminación das novas glorietas con luminarias LED, que se complementará con reforzo lumínico nos pasos de peóns, na contorna das glorietas para dar continuidade ao itinerario peonil.
Esta actuación inclúese no programa de conservación e mantemento da Rede de Estradas do Estado, no que se investiron máis de 65 millóns de euros desde xuño de 2018 na provincia de Pontevedra.
A vicepresidenta primeira da Deputación de Pontevedra, Marta Fernández-Tapias, vén de participar no Castelo de Sobroso no acto de presentación do Campionato Galego de Natación Máster de Inverno 2024 que acollerá Ponteareas o vindeiro fin de semana, acto que a vicepresidenta da Deputación estivo acompañada pola alcaldesa da vila do Corpus e deputada provincial, Nava Castro.
Na presentación deste Campionato Galego de Natación Máster de Inverno, participaron tamén o coordinador do servizo provincial de Deportes da Xunta de Galicia en Pontevedra, José Manuel Freire; o presidente da Federación Galega de Natación, Juan Carlos Brión e o presidente e director técnico do CN Ponteareas, Andrés Carrera.
Tapias, na súa intervención, amosou o orgullo de que “Pontevedra sexa unha vez máis a provincia anfitrioa dunha proba deportiva de primeiro nivel, na que se darán cita os mellores nadadores de Galicia”.
Fernández-Tapias aproveitou a ocasión para poñer en valor o esforzo da Federación Galega de Natación e do Club de Natación de Ponteareas, que leva xa 25 anos “apostando pola natación desde a base”, na organización desta proba na que se darán cita preto de 400 nadadores de 28 clubs. Tamén remarcou o compromiso da Deputación de Pontevedra co deporte, “eixo prioritario deste mandato”, “unha disciplina que contribúe como ningunha outra a estender hábitos saudables na sociedade, a enchela de valores positivos e é xa unha ferramenta de promoción turística fundamental para a nosa provincia”.
O sector do mar sairá á rúa en Compostela este domingo día 21 para denunciar a grave situación que vive o sector pesqueiro e marisqueiro “e que arrastra desde hai máis dunha década” segundo os colectivos convocantes. A manifestación partirá ás doce do mediodía da Alameda e terminará na Praza do Obradoiro. Máis dun cento de colectivos do sector do mar e agrupacións ecoloxistas apoian esta mobilización baixo o lema “Na defensa do noso mar”, entre eles a Confraría de Redondela.
Demandan da Xunta de Galicia medidas encamiñadas a mellorar a situación das rías e pór freo á drástica caída de produtividade. Entre as súas demandas están un estudo integral das causas que provocan a baixada da produtividade, partidas económicas específicas para rexenerar todas as rías galegas, un protocolo de regulación dos encoros, un plan de control de verteduras tanto no mar como nos ríos, o control sanitario do marisco importado e que en caso de crise se dote aos traballadores do mar e ás confrarías de partidas económicas e axudas.
A vertedura masiva de granulado plástico que está a chegar á contribuíu ao desencadeamento da convocatoria desta manifestación do 21, e será outro dos alicerces da protesta. A falta de transparencia e a tardanza á hora de actuar preocupa ao sector.
Todas estas demandas e necesidades son compartidas pola Confraría de Redondela, e contan “co apoio total do Concello de Redondela”, como explica a alcaldesa Digna Rivas “porque o mar é o medio de vida de moitas familias deste municipio, ademais dun patrimonio natural que temos a obriga de protexer”. Por iso desde o Concello de Redondela poñen a disposición da veciñanza autobuses gratuítos para aqueles que queiran desprazarse o domingo á manifestación en Santiago. Sairán ás 10.00 desde a praza de Ribadavia (praza da Farola) con parada ás 10.15 en Cesantes á altura do CEIP Outeiro das Penas. Os interesados en inscribirse poden facelo no teléfono do Concello 986 400 300.
O director xeral de Cultura, Anxo M. Lorenzo, participou hoxe en Padrón na homenaxe impulsada pola Xunta de Galicia polo 22º aniversario do falecemento de Camilo José Cela. Estes actos para divulgar a súa figura e legado comezaron cunha ofrenda floral no cemiterio de Santa María de Adina por parte das autoridades e os escolares da Colexiata de Santa María de Adina.
Tras isto, o representante da Consellería de Cultura, Educación, FP e Universidades trasladouse ao Museo da Fundación Camilo José Cela, onde se representou a obra de teatro O inventor de palabras a cargo de Suso Martínez e Iñaqui Rosado, que conta a historia do encontro entre dúas das personaxes icónicas de Cela no que lembran territorios literarios.
O Concello homenaxea ao artista ponteareán Alfonso Quinteiro no marco da celebración do centenario do seu nacemento. Deste xeito, o próximo 27 de xaneiro presentarase o libro Alfonso Quinteiro, un talento na sombra no que o escritor Manrique Fernández rescata a figura e a obra do escultor e, ademais, a concellería de Ensino celebrará ao longo de todo o ano diferentes actividades que contribuirán ao recoñecemento do ilustre veciño.
Segundo explicou o concelleiro de Ensino, Ricardo González, o primeiro dos actos será o próximo sábado 27 de xaneiro no que “ademais de presentar ao público o libro no que se recupera o legado de Quinteiro, quen desempeñou o seu labor no mundo da escultura durante o século XX, haberá máis sorpresas relacionadas co artista local”.
Pola súa banda, a alcaldesa, Nava Castro, agradeceu o “traballo minucioso de Manrique Fernández á hora de recoller a obra inédita de Alfonso Quinteiro” e lembrou que “era o gran artista da vila, o referente, polo que me gustaría que ese sábado esteamos todos xuntos para demostrar a nosa admiración”.
No acto no que se presentou o evento do día 27, participou tamén a filla do escultor, Pili Quinteiro, quen agradeceu o recoñecemento que o Concello realiza ao seu pai. Ademais, destacou o talento do seu proxenitor “á hora de reproducir a alma das persoas mediante a escultura” e puxo como exemplo “o busto que elaborou a partir dunha fotografía a Reveriano Soutullo, outro dos nosos artistas nacidos no municipio”.
Finalmente, o escritor que rescatou a figura e o legado do ilustre veciño, Manrique Fernández, apuntou que “o obxectivo é difundir a historia deste ponteareán así como afondar no seu legado, vencellado ao mundo da escultura e tamén ao da pintura”. O autor indicou que “precisamente esta última disciplina é unha das máis descoñecidas, pero os seus traballos neste eido son simplemente espectaculares”.
Para continuar potenciando a difusión dos artistas ponteareáns, o Concello organizará para cada día 25 de cada mes, coincidindo co seu día de nacemento, diferentes actividades como concursos, conferencias ou contacontos.
O martes 16 de xaneiro, o salón de actos do CEIP Porto Cabeiro acollerá 17:30 horas a presentación do libro “O alumnado de Porto Cabeiro escribe sobre as súas parroquias”. Un libro editado polo Concello de Redondela e preparado dende o Servizo de Normalización Lingüística municipal coa colaboración do equipo de normalización do colexio.
O libro reproduce traballos que o alumnado fixo ao longo de moitos anos sobre toponimia local, lendas e costumes da zona, patrimonio das parroquias e outras tradicións. O volume, que recolle traballos feitos desde os anos 80, achega unha ampla descrición do patrimonio material e inmaterial das parroquias ás que pertence o alumnado do centro, e que son Negros, Cabeiro e Vilar. A escolma pretendeu ser o máis representativa posible, dando entrada a todo tipo de manifestacións culturais como son o entroido ou os oficios tradicionais.
O acto de presentación está aberto á participación de todo o público pero, en especial, á comunidade educativa e familias das parroquias de Vilar e Cabeiro. O libro pódese levar de agasallo e serve para conmemorar os 50 anos de historia do CEIP Porto Cabeiro.
No acto participarán a directora do centro, Sonia Montenegro; a mestra Susana Crespo; o responsable do Servizo de Normalización Lingüística do Concello, Xurxo Martínez González e a alcaldesa, Digna Rivas.
A deputada e concelleira ponteareá, Cristina Fernández, ocupará o número 6 na candidatura do BNG ás vindeiras eleccións galegas. Así o aprobou nesta fin de semana a formación liderada por Ana Pontón.
Fernández Davila amosou a súa satisfacción por seguir formando parte do equipo de Ana Pontón nun posto de saída. “É unha gran responsabilidade e unha inmensa honra ser a voz das veciñas e veciños de Ponteareas e da nosa comarca, e traballar día a día para mellorar a calidade de vida da nosa veciñanza”, asegurou.
A candidata do BNG declarou que “o 18 de febreiro temos unha oportunidade histórica de abrir un tempo novo en Galiza con Ana Pontón e o BNG. Chegou o momento de gañar un futuro mellor, ofrecendo solucións aos problemas dos galegos e galegas, cun proxecto no que Ponteareas conte, gobernando para a maioría e pondo as persoas no centro da nosa acción política”.
“
Cristina Fernández, “É unha gran responsabilidade e unha inmensa honra ser a voz das veciñas e veciños de Ponteareas e da nosa comarca, e traballar día a día para mellorar a calidade de vida da nosa veciñanza”
O BNG destacou a “experiencia da actual deputada, o coñecemento da realidade local e comarcal e a súa capacidade, honestidade e honradez como garantía de que Ponteareas teña peso político no vindeiro goberno galego”. Ademais, o Bloque pon en valor “o traballo de Cristina Fernández nestes meses no Parlamento Galego, onde defendeu diversas iniciativas entre as que destacan as destinadas a mellorar a situación da sanidade e do ensino público en Ponteareas e na nosa comarca, que se atoparon en múltiples ocasións coa negativa do Partido Popular”.
Cristina Fernández Davila é Técnica Especialista en Informática de Xestión. Dende 1993 é funcionaria do IES Val do Tea. Ten asumido diversas responsabilidades nas asociacións de nais e pais do alumnado e foi presidenta da Federación de Anpas do Condado FANPO. Dende 2012 é concelleira do BNG, asumindo no 2015 a segunda tenencia de alcaldía e a concellaría de Ensino, Participación Cidadá e Réxime Interior. Dende as eleccións de maio de 2019, Fernández Davila asumiu a primeira tenencia de alcaldía, así como as concellarías de Ensino, Eventos, Saúde e Consumo. Entre 2021 e 2023 foi alcaldesa de Ponteareas, e nos últimos 6 meses foi deputada no Parlamento Galego.
O Concello de Nigrán colabora coa iniciativa do Centro de Saúde Val Miñor para ofrecer mañá martes 16 de Xaneiro a charla ‘Alimentación saudable e planificación de menús’ ás 17:30 horas no Auditorio Municipal e a cargo da dietista-nutricionista Marta Losada.
Igualmente, ofrecerán o mércores 31 de Xaneiro outra xornada adicada á alimentación en pacientes diabéticos e sobre a importancia de tela controlada (11:30, Auditorio Municipal). A entrada é de balde e aberta a toda aquela persoa interesada no tema.
O BNG da Cañiza está a impulsar unha iniciativa que permita converter as antigas instalacións do GDR (Grupo de Desenvolvemento Rural) nun lugar no que a xente nova poida dispor dun espazo público onde desenvolver actividades, de xeito tranquilo e en condicións axeitadas, no seu tempo de lecer “sobre todo nos períodos do ano no que as condicións meteorolóxicas son máis adversas con chuvia, frio, vento e días con poucas horas de luz” sinala responsable local Trini Labaca.
Lembra a formación nacionalista que antes da pandemia da Covid19 había un espazo no edificio multiusos que non volveu retomar a actividade.
Trala construcción do parque de pumptrack e a súa boa acollida pola mocidade do propio municipio e, en xeral de toda a Comarca, consideran que o edificio idóneo para este uso é o edificio do Centro Comarcal A Paradanta. Ademais complementaría a actividade xuvenil e cubriría a necesidade demandada de aseos públicos.
Esta proposta sería compatible con outros usos actuais ou futuros de dito espazo, ademáis saben que o GDR mudou a sede a outro edificio de titularidade municipal. Na Asemblea Local do BNG A Caniza, teñen debatido este tema e tamén a mocidade ten trasladado a súa inquedanza ao respecto.
Dotar este espazo dunha actividade destas características, “non suporía un grande gasto para as arcas municipais mais alá do acondicionamento axeitado, e dun empregado municipal que garanta a apertura/peche e o bon uso das instalacións”, conclúe o BNG da Cañiza.
Balneario de Mondariz dá un paso adiante na comunicación de vangarda coa creación dun podcast, inicialmente de cinco capítulos, para dar a coñecer ás novas xeracións a historia de tres séculos termais que o converteron nun referente europeo. Un proxecto das xornalistas Roser Carrera e Ana J. Pastor, creadoras do podcast “Conversas ás toas”, que se basea as vivencias dunha escritora, Otilia Casanova, que, na época dos felices anos 20, trasládase á vila termal onde deixou oculto un misterio.
Se a principios do Século XX, Balneario de Mondariz innovou coa publicación do seu xornal e revista propios e posteriormente, en 2005 baseou todo o seu proxecto de recuperación na comunicación tradicional e dixital, agora aposta por esta nova ferramenta que establece conexións efectivas coa audiencia grazas á hiperpersonalización baseada nas preferencias de contidos e contextos que se converten nunha oportunidade de compromiso e lealdade cos oíntes.
“Conversas e ás toas” creou unha mensaxe moi creativa, personalizado e eficaz neste proxecto ao que denominaron “A flor da auga”.
Este medio, tras tres meses de traballo, permitiu a Balneario de Mondariz contar historias de forma orixinal e atractiva, xerando unha conexión emocional cos oíntes. Para iso, coidouse o formato, o ton, o estilo e a mensaxe, adaptándoo á audiencia máis nova.
Click para ampliar
Cunha periodicidade cada tres semanas, imaxe gráfica de Alfonso Marcet, e unha difusión nas principais plataformas e agregadores (Spotify, Ivoox, Google Pódcast, Amazon Music…), “Conversas e ás toas” conseguiu destacar no panorama dixital a partir dunha campaña de difusión a través de redes sociais e grazas ao interese que a historia de Mondariz esperta en todos os colectivos.
Cada capítulo, duns 30 minutos, achega ao oínte a un momento histórico e á importancia dos personaxes que visitaron a vila termal, poñendo en valor o papel da muller, finalizando cunha entrevista a directivos de Balneario de Mondariz que explican a importancia do aspecto termal ou histórico que se tratou no episodio.
Así, comézase co “A secreto da auga”, para continuar con “Os amores secretos”, “A beleza dunha burbulla” e “Xogo de pelotas”. Catro capítulos gravados nos estudos de “Conversas e ás toas” e un final realizado en directo no Balneario de Mondariz con presenza de público e convidados.
“A Flor da auga” ten como sintonía o tema “Eppur se muove” e refachos extraídos do tema “Planetesimal”, ambos os do álbum “Mãe”, de Quico Comesaña, Premio Martín Codax dá Música 2023. Ademais, incorpora o tema “Ausencia”, de Eugenia Osterberger, interpretado por Ana Pastor e Lucas Villar e transformado en son de caixa de música, que se converten en momentos musicais moi característicos. Ademais, os sons de auga e natureza gravados no Balneario de Mondariz tamén nos trasladan á Galicia de principios do Século XX.
Unha historia máxica Pero que nos descobren Roser Carrera e Ana J. Pastor? Todo comeza cando as xornalistas atopan uns obxectos dunha antiga visitante do Balneario de Mondariz: un chapeu, unha guía de viaxes escrita da súa propia man e unha caixa de música cun caixón secreto pechado con chave. Terán que viaxar á Vila Termal e percorrer o espazo, axudadas pola guía de viaxe, para desentrañar as claves que permitan coñecer o paradoiro da chave e resolver o misterio que encerra a caixa de música.
Unha formulación que trata de servir de guía aos oíntes para que poidan realizar o mesmo percorrido, ao mesmo tempo que se mostran os atractivos actuais do complexo termal, a través dunha historia ficticia e en clave feminista, pero con elementos históricos veraces, que convide a gozar dunha nova experiencia de lecer e cultura no Balneario de Mondariz. Todo en clave de humor e cun contido evergreen, con episodios atemporales onde se identifique os valores de marca de Balneario de Mondariz para apoiar as accións do 150 aniversario do Balneario de Mondariz.
Esta nova formulación de comunicación baséase no informe Dixital News Report España 2023 da Universidade de Navarra, que asegura que o mercado español converteuse no líder de escóitas de podcasts en Europa –cun 45 % dos usuarios que os escoitan polo menos unha vez ao mes e un 28 % que o fan semanalmente–.
O Concello opta a recibir unha subvención europea destinada á instalación de puntos de recarga para vehículos eléctricos no municipio. A administración local xa presentou a documentación necesaria no Instituto Enerxético de Galicia, da Xunta, que concede estas axudas a través dos fondos de recuperación da Unión Europea.
Co obxectivo de incentivar a mobilidade eléctrica na vila, o Concello contempla instalar catro puntos de carga na contorna da casa consistorial. Dous deles na rúa Concha Brey e outros dous na rúa Rogelio Groba. Deste xeito, tanto os veciños e as veciñas como as persoas visitantes dispoñerán de estacións de recarga de iniciativa pública no centro da vila.
“
Francisco Represas: “Como capital de comarca, temos que ser un dos Concellos que lidere esta aposta pola transición en materia de mobilidade”
O concelleiro encargado da área, Francisco Represas, indica que “como capital de comarca, temos que ser un dos Concellos que lidere esta aposta pola transición en materia de mobilidade. Ademais, os cargadores para vehículos eléctricos servirán tamén para sumar atractivos ao municipio posto que serán un reclamo para os usuarios e as usuarias destes servizos”. O edil apuntou que “ao actual equipo de goberno preocúpalle este tipo de cuestións que teñen que ver coa sustentabilidade e é por iso polo que decidimos presentarnos como administración pública a esta liña de axudas”.
Estas subvencións forman parte do Programa MOVES III da Unión Europea e teñen como obxectivo incentivar a mobilidade eléctrica. Trátase dunha liña de axudas de concorrencia non competitiva, que xestiona a Xunta de Galicia, cuxo prazo mantense aberto ata xullo deste ano.
O luns comezarán as tarefas de limpeza na praia de Cesantes, logo de que unha empresa especializada na xestión ambiental fixese unha valoración de todos os danos sufridos no areal e na súa contorna por mor dos temporais deste inverno. Ao tratarse dun espazo de especial protección dentro da Rede Natura 2000, o Concello solicitou en decembro unha autorización á Xunta de Galicia para poder actuar.
O permiso chegou en xaneiro, e as chuvias da pasada semana obrigaron a adiar a limpeza, que comezará o luns. A limpeza incluirá “a recollida de restos de madeira, lixo e plásticos que deixou o mar na praia de Cesantes nos últimos temporais” explica a concelleira de Medio Ambiente, Pilar Martínez. A actuación realizarase en todo o litoral, desde o peirao ata o final da praia “onde se acumulan toneladas de lixo procedentes das fortes marusías”, sinala a edil.
O Concello xa levou a cabo unha limpeza no areal o pasado 2 de decembro para recoller os restos que deixaran os fortes temporais do mes de novembro. Nesa ocasión, e de xeito manual, retiráronse 10 tractores de lixo, especialmente restos de madeira e plásticos arrastrados polo mar. O goberno local sinala que é habitual que os temporais do inverno arrastren a Cesantes moito lixo “xa que nos atopamos no fondo dar ría”. Sinalan que é a primeira vez que en Redondela se fan este tipo de limpezas durante o inverno, e que ata o de agora “estas actuacións comezaban sempre coa chegada do bo tempo na primavera ou no verán” apunta a Pilar Martínez.
A concelleira de Medio Ambiente lembra á veciñanza e aos grupos da oposición que está “á súa disposición todos os días no Concello e teñen o meu teléfono para que lle fagan chegar “calquera dúbida ou suxestión que desexen sobre o estado dos areais ou outros asuntos que lles preocupen”. Por iso lamenta que desde o Partido Popular utilicen as redes sociais para criticar a o estado dos areais en lugar de preguntar directamente aos responsables “porque eu sempre estou disposta a dar explicacións e dialogar, é o meu xeito de traballar en política e eles sábeno”, afirma Pilar Martínez.
A alcaldesa advirte que malia que moitas actuacións son competencia da Xunta de Galicia, “o Concello realiza estas tarefas por responsabilidade ante a inacción do goberno galego e sen axudas a nivel autonómico”, apunta a alcaldesa Digna Rivas.
Reposición dos elementos danados no paseo e eliminación de especies invasoras
A concellería de Medio Ambiente conta cun plan integral para a rexeneración da praia de Cesantes e a súa contorna e que contempla a reposición dos elementos de madeira danados polos temporais deste inverno. Unha empresa con acreditación ambiental traballa na valoración de todos os danos para repoñer as varandas e táboas do paseo que está en mal estado, así como o mobiliario urbano. Outra das preocupacións da concelleira de Medio Ambiente é a situación da zona das dunas, con presenza de especies invasoras. O Concello porá en marcha a rexeneración desta zona, e o compromiso de Pilar Martínez é o de facer o mantemento destes espazos naturais “ao longo de todo o ano para evitar a proliferación das plantas invasoras”.
Os responsables locais do BNG en Mos e no Porriño, Óscar Rodríguez e Marcelo Rodríguez, quixeron contestar á comparecencia da Alcaldesa de Mos xunto co Alcalde do Porriño, o Presidente da Deputación de Pontevedra e outros cargos do PP. Nesta, os dirixentes populares pretenderon responsabilizar o BNG da suba das peaxes. “Escoitándoos parece que o PP non tivese gobernado nunca en Madrid.
“As mentiras do PP sobre as peaxes son inadmisibles”, asegura a formación nacionalista. “Se seguimos pagando é porque o PP prorrogou a concesión a AUDASA ata o ano 2048”. “Vendo o malestar de Nidia Arévalo ou Alejandro Lorenzo pola suba das peaxes, imaxinamos que pedirán a expulsión de Aznar, Rajoy ou Ana Pastor do seu partido, como responsables dos gobernos que prorrogaron a concesión da autoestrada e asinaron o convenio que lles permite unha subida superior ao IPC, unha hipoteca que aínda hoxe estamos a pagar”, ironizaron os responsables do Bloque.
Lembran as e os nacionalistas do Porriño e Mos que o traballo do único deputado do BNG en Madrid, Néstor Rego, “conseguiu rebaixas e bonificacións nas peaxes, algo que nunca antes, con ningún goberno nin de PP nin de PSOE, se dera. Na pasada lexislatura, grazas ao acordo asinado polo BNG co goberno do estado, conseguise que as viaxes de volta na AP-9 sexan gratuítas con telepeaxe. Na lexislatura que vén de comezar, o goberno do estado ten o compromiso de aplicar novos descontos de acordo co pacto de investidura subscrito co BNG”.
“Se o PSOE cumpre a súa parte do trato, estes descontos chegarán cos próximos orzamentos. Se os galegos e galegas pagamos peaxes é por culpa do PP e se pagamos menos é grazas ao BNG. O PP está nervioso e pretende confundir a opinión pública. Quen con razón se queixe da suba que pense o distintas que poderían ser as cousas de contar cun BNG máis forte en Madrid. Desde o Bloque seguiremos a traballar por unha autoestrada galega e libre de peaxes”, sinalaron Pedro Pereira e Gustavo Barcia, portavoces municipais do Porriño e Mos.
Para o BNG “o nerviosismo co que o PP afronta as eleccións galegas quedou reflectido tamén no oficio remitido ao BNG desde o goberno local de Mos, ordenando a retirada das pancartas nas que se reivindica a rebaixa das peaxes acordada co goberno do estado. As mesmas que están colocadas en espazos públicos de toda Galiza son inaceptables para o goberno de Nidia Arévalo”. En opinión do portavoz municipal nacionalista, “esta é unha mostra máis do autoritarismo do PP, que utiliza as institucións para tratar de amordazar o BNG”.
O presidente da Deputación de Pontevedra, Luis López, anunciou en rolda de prensa que a Xunta de Goberno da institución provincial acaba de aprobar as bases do Plan de Cofinanciamento dos Servizos Sociais Comunitarios Municipais e das Axudas Básicas de Emerxencia para 2024. Ambas liñas de subvencións están destinadas aos 51 concellos de menos de 20 000 habitantes da provincia, que contan cun investimento total de 3,7 millóns de euros.
En concreto, no relativo á primeira delas, centrada nos Servizos Sociais Comunitarios, a Deputación pon a disposición dos concellos preto de 3,1 millóns de euros. Destes recursos, 1,2 millóns estarán destinados a sufragar a prestación directa do Servizo de Axuda no Fogar (SAF), un servizo que atende a persoas maiores e con discapacidade, especialmente cando carezan de apoio persoal no seu medio inmediato, e 1,9 millóns estarán destinados a cubrir os custos do persoal dos servizos sociais comunitarios municipais. Cada un dos 51 concellos da provincia de menos de 20 000 habitantes terá á súa disposición unha achega máxima que vai desde os 24 000 aos 120 000 euros.
A través deste plan, a institución provincial pretende mellorar a calidade de vida das persoas; posibilitar a súa permanencia no seu contorno de convivencia habitual; favorecer e potenciar a autonomía persoal no propio domicilio; manter, mellorar e recuperar as redes de relación familiar e social; previr situacións de dependencia ou exclusión social; retardar ou evitar a institucionalización, e reforzar a solidariedade e potenciar o voluntariado social.
No que respecta ás Axudas Básicas de Emerxencia (ABE), o goberno provincial mobiliza 600.000 euros para que os concellos poidan atender as demandas da cidadanía que se atope en situación ou risco de exclusión social, con especial atención a quen teña menores ao seu cargo. Destes recursos, 393 000 euros van destinados a gasto corrente e os 207 000 restantes serán para investimentos.
A través desta liña de axudas a Deputación contribúe a sufragar gastos de alimentación, vivenda, subministros básicos, produtos e servizos de hixiene e limpeza, produtos farmacéuticos, a adquisición de electrodomésticos básicos, o pagamento de desprazamentos ou de reparación e mantemento de vehículos, así como de lentes, lentes de contacto e audiófonos, gastos derivados de tratamentos de odontoloxía, produtos de apoio, atencións de carácter complementario, roupa, calzado, ou gastos relacionados co estudo e apoio á infancia. Neste caso, a contía máxima para cada concello vai desde os 7800 aos 14 050 euros, en función da súa poboación, índice de dependencia global, taxa de desemprego e renda dispoñible bruta.
Tomiño volverá converterse na capital galega da educación durante unha semana o vindeiro mes de febreiro. Será coa celebración da novena edición da Semana da Educación, que cada ano converte a Tomiño nun referente no eido educativo coa participación de catro recoñecidos expertos e expertas que abordarán co público cuestións relevantes como a educación afectivo-sexual, a importancia do pensamento crítico na infancia, a humanización da educación ou a relevancia da música no ensino.
Nesta nova edición, o Auditorio de Goián acollerá do 5 ao 8 de febreiro ás 19.00 horas unhas xornadas que baixo o lema ‘Educación ON’ están dirixidas tanto a persoal docente e educador como a pais e nais que busquen informarse ou formarse en aspectos relacionados co mundo educativo a diferentes niveis.
“Cada ano poñemos o corazón e a alma na organización destas xornadas porque cremos que a educación é a chave para transformar a nosa sociedade e abrir portas a un futuro máis prometedor para todas e todos. A Semana da Educación é xa un referente por un coidado programa que non só fomenta a aprendizaxe, senón que tamén promove a participación activa de toda a comunidade”, salienta a alcaldesa, Sandra González.
O encargado de inaugurar a IX Semana da Educación de Tomiño será o mestre e escritor César Bona, que formou parte do xurado dos Premios Princesa de Asturias e recibou os premios Magister de Honra pola Plataforma da Escola Pública, o Crearte do Ministerio de Cultura e a Cruz José de Calasanz, máxima distinción na educación en Aragón. O luns 5 de febreiro Bona falará sobre ‘Humanizar a Educación’, na que proporá facer as preguntas correctas para avanzar no ensino e na que transmitirá o compromiso social e coa natureza que defende como parte da educación integral do ser humano.
Click para ampliar
O martes 6 de febreiro tomará o relevo Javier Jurado, docente e investigador, catedrático da Historia da Música no Conservatorio Superior de Música de Vigo e director do Mestrado en Creación, Interpretación e Investigación Musical. O musicólogo abordará na súa charla a importancia de ‘Educar na globalidade: contribución da música á formación integral do alumnado’, na que defenderá esta materia como ferramenta de fomento da aprendizaxe e o rendemento, desenvolvendo o pensamento transversal e construíndo persoas máis afectivas, ledas e prudentes.
Click para ampliar
O mércores 7 de febreiro subirase ao escenario Rocío Vidal, La Gata de Schrödinger, xornalista, publicista e divulgadora científica a través da súa canle de Youtube, na que conta con case 700.000 persoas subscritas. A súa charla versará sobre ‘A importancia de educar no pensamento crítico dende a infancia’, seguindo a liña do seu traballo de divulgación do pensamento analítico, no que tamén desmonta crenzas con vídeos entretidos, educativos e cun toque de humor. Presentadora de programas de temática científica e colaboradora de diferentes medios de comunicación, Rocío Vidal é autora tamén dos libros ‘Que lle dean á ciencia’ e ‘Eureka’.
Click para ampliar
A novena edición da Semana da Educación 2024 baixará o pano o xoves 8 de febreiro da man de Mamen Jiménez, La Psicomami, e a súa charla ‘E de onde veñen os bebés? A educación afectivo-sexual na casa, sen medos… e ata con risas’. Psicóloga, sexóloga, terapeuta de parella, ilustradora e divulgadora, no 2015 decidiu unir a súa experiencia profesional e maternal nun blog no que con ilustracións cargadas de humor e cotidianeidade fala de esas cousas que lles suceden aos pais e nais. Foi galardoada co Premio Madresfera ao Mellor Blog de Humor 2015 e as súas ilustracións e textos teñen miles de seguidores e seguidoras nas redes sociais.
O Concello autoriza o inicio das obras que permitirán que os veciños e as veciñas dispoñan dunha nova área comercial no municipio, localizada no parque da Curuxeira. Para a construción do edificio que albergará un supermercado da firma Mercadona, a empresa solicitou á administración local os permisos necesarios para instalar varias casetas na contorna. Trátase de infraestruturas indispensables para que, por unha banda, os traballadores e as traballadoras poidan desempeñar o seu labor e, por outra banda, para garantir o correcto desenvolvemento das actuacións.
O espazo que na actualidade ocupan estas casetas será restituído ao seu estado inicial toda vez que a construtora finalice as obras. Deste xeito, o parque da Curuxeira recuperará a parte do terreo no que agora se atopan estas infraestruturas antes de que teña lugar a inauguración da nova superficie comercial. Segundo as previsións, os traballos remataranse durante os últimos meses do ano.
A súa historia remóntase a principios do século XX cando no ano 1933 naceu María Guimaré Diz ninguén lle ía dicir que compartiría practicamente unha vida enteira ao carón de seu primo David López Diz, fillo de Preciosa e cinco anos maior ca ela. Todo comezou cando con nove anos María deixou a casa da súa avoa e marchou a Vigo a vivir coa súa nai, Palmira.
A familia Carballeira, da parroquia covelense de Maceira, está esta fin de semana de celebración. Onte sábado día 13 foi o aniversario de voda de María e David. Sopraron unhas candeas especiais, as dos seus 75 anos xuntos. A súa foi unha carreira de fondo e de superación, sendo aínda adolescentes tiveron ao seu primeiro fillo, Ignacio, e xa anos despois a María del Pilar. A voda destes dous inseparables chegou seis meses despois do seu casamento xa que tiveron que pedir permiso ao bispado adiantándose aos trámites un pequeno e primando a bioloxía sobre a burocracia.
Na cidade iniciaron unha vida de parella que chega aos nosos días. Dous fillos; tres netos, Fátima, David en Roberto e 6 bisnetos, Eva, Carlos, Noa, Iria e Marta. Viven sós e ata hai apenas uns anos David conducía moi a cotío para pasar uns días na súa parroquia natal en Covelo. Aínda que teñen boa saúde para a súa idade a súa filla visítaos a diario e o resto da familia con moita frecuencia cada semana. Agora agardan a chegada da axuda domiciliaria para dar apoio nas tarefas dos coidados e do fogar das que María sabe moito ao coidar dende nena dos seus maiores e logo ben pronto de seus fillos. Xuntos viviron a dureza das aldeas de principos do século pasado, o traballo no campo e o coidado do gando e non tiveron medo en cambiar a súa terra para ir á cidade traballar e emprender, moito antes do que agardaban, a aventura de sacar adiante a súa propia familia.
O alcalde de Covelo, Pablo Castillo, quere achegarlle os seus parabéns e deséxalle un día a día no que non falten os bos recordos e o cariño dos seus.
O Partido Popular ten un problema de violencia no mundo local. Así o afirma o secretario xeral do PSdeG-PSOE da provincia de Pontevedra, David Regades, despois de coñecer a sentencia pola que se condena ao representante do PP na Entidade Local Menor de Morgadáns por agredir a un funcionario do Concello de Gondomar durante a precampaña das últimas Eleccións Xerais.
Regades reclama ao presidente do PP de Galicia, Alfonso Rueda, o cese fulminante do agresor, Juan Carlos Alonso Esmerode, pois “a violencia, en calquera das súas expresións, e a política son absolutamente incompatibles”. Máis aínda neste caso no que falamos de violencia física do membro do PP a un funcionario do Concello de Gondomar.
O secretario xeral socialista recorda que aínda está fresca a agresión no propio pleno de Cangas do concelleiro Gestido á voceira socialista Iria Malvido, “un asunto vergoñento e sobre o que o PP segue tratando de botar terra” cando chega esta sentencia firme do Xulgado de Instrución número 1 de Vigo. “Son feitos intolerables, inxustificables e que acaban manchando a quen os tolera, os ampara e os desculpa, polo que Rueda non pode seguir de perfil”, recalca Regades.
O fallo condena a Juan Carlos Alonso Esmerode como autor responsable dun delito leve de lesións á pena de multa dun mes, a razón de 5 euros ao día, o que fai un total de 150 euros. En caso de impago, Alonso deberá cumprir pena de privación de liberdade dun día por cada dúas cotas non satisfeitas.
A sentenza declara como feitos probados que o 24 de xuño de 2023 Alonso Esmerode propinou un golpe no costado dereito ao denunciante na rúa Manuel Losada de Gondomar, cando este estaba a punto de subirse á súa motocicleta. O agredido sufriu unha contusión costal para o que necesitou unha primeira asistencia médica.
A sentencia explica, ademais, que o agresor insultou previamente ao agredido “nunha situación de tensión que pode encontrarse en razóns políticas”. Ademais, a xuíza puxo en valor que o agredido renunciou a calquera indemnización que puidera corresponderlle e tan só reclamou que se xulgaran os feitos aos efectos da posible responsabilidade penal do vocal do PP na Entidade Local Menor.
O colexio público Nosa Señora dos Remedios de Ponteareas leva meses denunciando o mal estado no que se atopan os muros que separan o centro das antigas casas dos mestres, muros que ameaza con derrubarse sobre o patio de recreo. Trátase dunha situación de grave risco para a seguridade dos alumnos e as alumnas, que poderían sufrir un accidente en calquera momento.
A concelleira Vanesa Fernández, o concelleiro Rubén Pérez e o secretario xeral dos socialistas ponteareáns, Delfín Domínguez Cerdeira, que visitaron o centro para coñecer in situ o problema, lamentan que a pesar das reiteradas peticións da dirección do centro e das familias “o Concello non fixo nada máis para solucionar o problema que colocar unhas ridiculas e ineficaces vallas de obra e cintas plásticas, .
Esta falta de acción do Concello demostra, ao entender do PSOE de Ponteareas “o seu desinterese pola educación pública e polo benestar dos nenos e as nenas. É inadmisible que se poña en perigo a vida das persoas por unha cuestión de diñeiro ou de prioridades políticas”.
“O concello ten a obrigación de garantir unhas condicións dignas e seguras para o desenvolvemento da actividade educativa, e non pode mirar cara a outro lado ante unha situación tan grave como esta”, engaden as e os socialistas.
O PSOE xa rexistrou para o seguinte pleno unha serie de preguntas “para que o goberno saia da inacción e se poña de inmediato a resolver o problema de seguridade que existe para as nenas e nenos do colexio antes de que teñamos que lamentar unha desgraza”, conclúen.
O voceiro do PP rectificou as súas acusacións contra Digna Rivas sobre a solicitude dunha subvención logo da denuncia presentada pola alcaldesa por un presunto delito de calumnias. Bas Corugeira, que acusara á alcaldesa de “firmar e enviar documentación falsa para obter unha subvención”, declarou ante a xuíza que a súa intención “non era dicir que Rivas elaborase ningún documento falso”.
A alcaldesa redondelá dáse por satisfeita con esta rectificación en sede xudicial, pero lamenta que o voceiro do PP siga mentindo ante os medios de comunicación “vertendo sospeitas infundadas sobre un expediente dos técnicos do Concello que é a miña obriga tramitar, porque de non facelo estaría prevaricando, e o señor Bas debería sabelo”.
Rivas lembra que desde o Concello abriuse unha investigación interna sobre este expediente da que o grupo popular é coñecedor. As conclusión preliminares desta investigación exclúen totalmente de calquera responsabilidade nesa presunta falsificación tanto a Digna Rivas como ao resto dos integrantes do actual Goberno. O propio técnico, autor do documento presuntamente alterado, negou ante os responsables da investigación interna que existise falsificación algunha.
En calquera caso, se desde o PP de Redondela seguen a considerar que na tramitación dese expediente houbo algunha ilegalidade, a rexedora local convídaos “a denuncialo no lugar que corresponde, que é o xulgado, e non seguir difamando a este Concello e aos seus traballadores nos medios de comunicación, porque non o merecen”. A alcaldesa lamenta que única preocupación do grupo municipal popular sexa “prexudicar e entorpecer o traballo deste goberno”.
O auto do Xulgado de Redondela do pasado 15 de decembro, no que se arquiva a denuncia de Digna Rivas contra Javier Bas por calumnias, non entra a valorar en ningún momento a tramitación da subvención por parte do Concello de Redondela, tan só determina que prevalece o dereito á liberdade de expresión do líder da oposición sobre o dereito á honra da alcaldesa. Ante esta decisión xudicial a alcaldesa lamenta que “os políticos teñan maior liberdade de expresión que os cantantes ou outros artistas aos que se lles coarta ese dereito”.
As obras de posta en valor do Carreiro do Rollo, en Salceda de Caselas, enfrontan xa a súa última fase, aproveitando o bo tempo para a colocación do adoquín que cubrirá todo o espazo. O Concello quere deste xeito poñer en valor un espazo que alberga unha parte da historia de Salceda, pois con toda probabilidade o nome do “Rollo” proveña da existencia nesa zona dun “rolo xurisdicional”.
O “rolo” era unha columna de pedra rematada por unha bola ou unha cruz, e que só se instalaba nos señoríos con plena xurisdicción. Servía de ameaza coercitiva aos vasalos ou forasteiros, e nalgúns lugares tamén cumpría as funcións de axustizamentos para ser expostos os “delincuentes” a pública vergoña. O Decreto das Cortes de Cádiz de 26 de maio de 1813 mandou destruír todos eses rolos por consideralos signos de vasalaxe e “un recordo contínuo de humillación”. Sen embargo en Salceda houbo outro rolo que non foi derruído incumprindo ese decreto, e que aínda hoxe en día se conserva no alto da Casa Grande da Picoña.
O proxecto de urbanización do Camiño do Rollo permitirá, segundo a alcaldesa de Salceda, Loli Castiñeira “pasar dun espazo gris a un espazo de luz para o orgullo e desfrute da nosa veciñanza, e facémolo ademais poñendo en valor a nosa historia coa instalación de paneis explicativos na zona”.
Os traballos permitirán recuperar para as persoas un espazo ata o de agora degradado, en pleno casco urbano de Salceda, e que aínda no seu estado era empregado por multitude de veciñanza como sendeiro peonil para acceder dende a rúa do Rollo ata Victoriano Pérez Vidal. O espazo seguirá a ser de uso peonil, e incluirá a creación dunha pequena praza central para uso e desfrute da veciñanza. O proxecto suporá ademais acabar con posibles problemas de salubridade na contorna, ademais de incluír a recollida de pluviais que tamén xeraba inconvintes na zona. A financiación está incluída dentro do Plan Concellos 2023 da Deputación de Pontevedra con 121 115,19 €.
“A recuperación deste espazo –explica o concelleiro de Mobilidade, Marcos Alonso–, ademais de incorporar unha nova área de lecer e esparcemento na vila, servirá para dar solución aos problemas se saneamento e abastecemento na zona, ao mesmo tempo que se reforza a iluminación no carreiro coa colocación de balizas e farolas led orientables”.
A Rede Galega de Teatros e Auditorios comezou hoxe en Lugo á súa nova programación semestral, no marco da que, ata o vindeiro mes de xuño, terán lugar 351 funcións escénicas e musicais en 41 concellos de toda Galicia. A Xunta e as entidades locais asociadas cofinancian este circuíto, que para todo o ano 2024 conta cun orzamento de arredor de dous millóns de euros, destinado integramente á contratación de formacións artísticas profesionais de teatro, música, danza, circo e maxia, galegas na súa meirande parte.
En concreto, durante estes seis primeiros meses do ano serán máis de 130 as compañías escénicas e grupos musicais que actuarán na rede autonómica, xestionada pola Consellería de Cultura, Educación, FP e Universidades. Os espectáculos teatrais conforman unha gran parte desta programación, con máis de 270 funcións en cartel e unha ampla oferta para o público familiar, que concentra 92 destas actuacións.
Pola súa banda, a danza e o novo circo confirman o progresivo aumento da súa presenza nesta carteleira, con 34 e 14 funcións respectivamente, mentres que a maxia suma 8 actuacións. No relativo á música, a Rede Galega de Teatros e Auditorios ten programados 23 concertos ata o vindeiro xuño.
Sete estreas galegas
Ademais, o circuíto da Xunta acollerá este semestre algunhas das agardadas novidades da temporada escénica galega, con sete estreas, dúas delas esta mesma semana: a proposta multidisciplinar Eu, fraude!, primeiro espectáculo de creación propia de Paula Pier, este venres 12 no Teatro Rosalía Castro da Coruña, e Donas, de Cali Danza, o domingo 14 no Auditorio Municipal Gustavo Freire de Lugo.
Seguiranlles, xa a partir de febreiro, as estreas doutras cinco novas montaxes, todas elas producidas co apoio da Consellería de Cultura, Educación, FP e Universidades a través das convocatorias de subvencións á creación escénica e á coprodución de espectáculos de danza. Así, o mes que vén Manekineko presentará Cancións amarelas, flores tristes o día 15 no Auditorio Municipal de Vigo; Sarabela Teatro, O dragón de ouro o día 23 no Teatro Principal de Ourense, e Producións Teatrais Excéntricas, Monstros o día 24 no Fórum Metropolitano da Coruña.
Tamén na Coruña terá lugar a primeira función pública de Anoa, de Elvi Balboa, o 19 de abril no Teatro Rosalía Castro como arranque das celebracións do Día Mundial da Danza, mentres que Boiro acollerá a estrea de Desexo, o novo de Talía Teatro, o 3 de maio na Casa da Cultura Ramón Martínez López.
Carteleira da semana
A programación semestral do circuíto autonómico arranca mañá mesmo cunha función de Hasta que la muerte nos separe, da compañía madrileña Inconstantes Teatro, no Auditorio Municipal Gustavo Freire de Lugo. Ademais das devanditas estreas de Paula Pier e Cali Danza, a carteleira desta semana inclúe a representación de Crisálida, de Caramuxo Teatro, o venres 12 no Auditorio do Centro Cívico Cultural de Arteixo.
O sábado 13 Contraproducións representará Apaga o candil en Muros, De Vacas levará ao Teatro Rosalía coruñés o seu Rebovina Divas Live, que repasa as mellores voces femininas do pop dos últimos tempos desde a súa ollada humorística e irreverente, e Unahoramenos Producciones chegará ao Pazo da Cultura de Narón co espectáculo Protocolo del Quebranto, que tamén poderá verse no Principal de Ourense o domingo 14.
Tamén o domingo terán lugar as primeiras funcións para público familiar do semestre na Rede Galega de Teatros e Auditorios con dous pases matinais de Que animaliño é?, de Trémola Teatro, na Sala Bahía de Foz.
O Concello de Salvaterra de Miño vén de dar a coñecer ás interesadas e interesados que, dende este luns 15 de xaneiro e ata o 31 de xaneiro, ábre o prazo para todos aqueles que queiran participar como comparsa ou carroza no Enterro da Lamprea 2024 que se celebrará o 17 de febreiro. As inscricións deberán realizarse no Concello de Salvaterra de Miño a través de Sede Electrónica –as Asociacións– ou do Rexistro ou sede electrónica –as agrupacións–.
Neste desfile poderán inscribirse todas aquelas Comparsas e Carrozas, que cumpran os requisitos. Só se poderá inscribir unha comparsa ou carroza por asociación ou persoa. As modalidades son categoría de Carroza aquelas carrozas que teñan como mínimo 25 participantes e unhas dimensións mínimas de 5 m de largo e categoría de Comparsa as que teñan un mínimo de 20 membros.
As comparsas ou carrozas deberán gardar unha unidade temática tanto no seu vestiario coma na súa actuación. Non se considerarán como comparsas ou carrozas con dereito a inscrición e participación aquelas que en anos anteriores repetiran, no sustancial, o seu disfrace.
Os premios a participación oscilarán entre os 100 euros e os 600 euros, dependendo da categoría e da cantidade de participantes.
Dende o Concello queren recordar que todas aquelas persoas que queiran participar no enterro de forma persoal e non a través dunha carroza ou comparsa poden facelo dentro da propia comitiva da defunta lamprea, formando parte do grupo de Choronas que acompañan a lamprea; eso si, de loito riguroso.
Un ano máis, o desfile que percorrerá as principais rúas de Salvaterra de Miño sairá ás 17:00 horas dende a rúa Rosalía de Castro para rematar na Praza do Concello.
As bases e información relacionada pode consultarse xa na web do Concello.
A usuaria das Bibliotecas de Redondela, Argentina Rodríguez, resultou gañadora do sorteo do ‘Reto lector 2023’, unha iniciativa de fomento da lectura para o público adulto posta en marcha polas Bibliotecas Municipais de Redondela a proposta da Asociación de Amigos das Bibliotecas de Redondela.
‘Reto lector 2023’ Consistía na lectura de 12 libros ao longo de 2023, que debían axustarse a unha serie de características indicadas previamente nun calendario de lectura. Un desafío a modo de xogo no que o aliciente era enfrontarse a lecturas en diferentes xéneros, formatos e estilos.
O sorteo realizouse entre aqueles participantes do Reto que foron quen de completar as 12 lecturas dese calendario: un total de 17 persoas de entre as 37 que participaron. O premio, como non podía ser doutro xeito, foi un grande e variado lote de libros. Ademáis, todos/as os/as que remataron o reto recibirán un agasallo.
Co sorteo e a entrega do premio as Bibliotecas Municipais de Redondela únense á conmemoración do Día do Usuario/a das Bibliotecas, data destacada no Calendario do Libro e a Lectura de Galicia como o 11 de xaneiro. As bibliotecas renden así homenaxe aos usuarios e usuarias “por seren eles unha parte fundamental e imprescindible do seu servizo”.
O Concello lembra aos veciños e as veciñas da primeira fase da Área de Rehabilitación Integral (ARI) do municipio que xa poden solicitar as axudas de ata 30.000 euros para levar a cabo as obras de mellora de eficiencia enerxética e de renovación de edificacións. O Boletín Oficial da Provincia vén de publicar as bases reguladoras.
Deste xeito, os propietarios e as propietarias das rúas Real e dos Ferreiros así como da Baixada de San Gregorio teñen de prazo ata o mes de xuño para acollerse a estas axudas que ofrece a Xunta de Galicia a través dos fondos de recuperación da Unión Europea. As accións subvencionables están relacionadas coa mellora da eficiencia enerxética e coa renovación de edificios residenciais e vivendas unifamiliares. Contemplan tamén as destinadas á instalación de ascensores.
Para facilitar os trámites á veciñanza que desexe acollerse a estas axudas, o Concello puxo a súa disposición unha oficina permanente no segundo andar da casa consistorial cun traballador técnico especializado. Ademais, a alcaldesa, Nava Castro, e a concelleira da área, Silvia Fernández, resolveron as dúbidas sobre a Área de Rehabilitación Integral nunha xuntanza que congregou a un cento de propietarios e de propietarias.
Neste sentido, a edil Fernández indica que “a gran acollida que tivo a reunión informativa demostra que é necesaria esta ARI polo que animamos a veciñanza a que soliciten estas axudas. Con estas actuacións contribúese, por unha banda, á renovación da zona vella da nosa vila e, por outra, a reverter a situación de estado de deterioro que presentan certas edificacións”.
Tras finalizar co período de solicitudes desta primeira fase da Área de Rehabilitación Integral, será a queda dos veciños e das veciñas da contorna da Praza Maior e das rúas Esperanza e Oriente. Continuarase, despois, coa avenida Constitución, a rúa Rogelio Groba e a Praza Bugallal.
Un total de 41 nenos e nenas de Redondela dos cursos de Infantil e Primaria contan con bolsa de comedor municipal neste curso 2023/24. Estas axudas da concellería de Servizos Sociais están destinadas a familias con problemática socio-económica, e cobren a totalidade dos gastos do comedor escolar.
A concelleira Iria Vilaboa explica que esta bolsa está dirixida ao alumnado con praza no comedor escolar dalgún dos centros de ensino público que contan con este servizo, e que faga uso do comedor de maneira continuada un mínimo de 3 veces por semana. Nas bases desta axuda establécense criterios económicos (máximo 10 puntos) e de situación socio-familiar cos informes do departamento de Servizos Sociais do Concello (máximo 20 puntos).
Para o presente curso houbo un total de 95 solicitudes, dos que 38 xa foron excluídas da convocatoria por non cumprir cos requisitos, por renuncia das familias , por traslado de domicilio… Finalmente son 41 os nenos e nenas que contan coa bolsa, e Vilaboa sinala que “todo o alumnado usuario do departamento de Servizos Sociais conta coa axuda de comedor, e os que quedaron fóra tras esgotarse o crédito tiñan unha puntuación que oscilaba entre os 11 e os 4 puntos , e non tiñan informe dos Servizos Sociais municipais”.
Vilaboa engade que, malia o encarecemento do prezo do comedor, que pasou dunha media mensual de 100 euros do ano pasado aos 140 euros deste curso “o Concello segue a axudar a un gran número de familias que o necesitan”. A partida para esta subvención é de 40.000 euros, logo de incrementarse o orzamento para o presente curso con 10.000 euros máis. O compromiso da concellería de Servizos Sociais e da alcaldesa, Digna Rivas, é “volver incrementar esta partida de cara ao vindeiro curso escolar para atender ao maior número de familias posible”.
O Concello de Nigrán ven de editar 1000 almanaques de mesa cunha ducia de mulleres do municipio como as grandes protagonistas de cada mes no 2024. O obxectivo desta iniciativa que naceu xa no ano 2023 con moito éxito, é visibilizar entre toda a veciñanza o papel da muller no desenvolvemento económico, cultural e social da localidade e contribuír desde a administración local a rachar coa fenda de xénero e os seus estereotipos. Estes almanaques serán entregados gratuítamente á veciñanza a través da Oficina de Información Cidadá (planta baixa da Casa Consistorial) de luns a venres de 9:00 h a 14:00 horas ata esgotarse os exemplares.
As doce mulleres posaron ante a cámara da recoñecida fotógrafa nigranesa Ani Pérez para ilustrar cada mes facendo referencia ao seu oficio e o resultado xa está a vista. Así, xaneiro abre con Esther Nande, única campaneira de todo o Val Miñor na igrexa de Santiago de Parada; febreiro con María Fernández, presidenta do Club de Fútbol Racing de Vilariño; marzo con María del Pilar Rouco, primeira muller taxista na provincia de Pontevedra; abril con Marta Anta, Premio Mestre Mateo 2003 e 2015 por mellor deseño de vestiario e xerente dunha mercería; maio coas irmás Beatriz e Mayte Gil, da librería Paraísos de Papel; xuño coa gaiteira Emma Santos; xullo coa catedrática de Inmunoloxía África González; agosto coa directora deportiva e presidenta do Club Baloncesto Nigrán, Nuria Gómez; setembro coa xerente do club hípico ‘Llamas de Cea’ Judith García; outubro coas catro creadoras do chorizo de cabaza ‘calabizo’, Keila, Edurne, Carmen e María; novembro coa condutora de autobús Julia Iglesias; e para pechar o ano a mariscadora Celeste González. “O conxunto desta ducia de mulleres con dedicacións moi diversas representa a todas as mulleres de Nigrán. Elas, co seu traballo e o seu coñecemento, contribúen a normalizar o que sempre debeu de ser normal, por iso é importante visibilizado e recoñecelo públicamente”, sinala o alcalde, Juan González.
“Os estereotipos de xénero siguen moi vixentes na sociedade e esta ducia de mulleres, co seu papel, contribúe a que tomemos conciencia desta realidade e a que tomemos conciencia do esforzo extra que deben superar cada día ás mulleres para acadar as súas metas”, explica a concelleira de Igualdade, Patricia Diego, quen sitúa nesta liña a exposición e catálogo ‘Mulleres de Nigrán -1970’ elaborado polo Concello e dirixido precisamente a visibilizar o papel da muller na historia do municipio grazas a imaxes nas que elas son as protagonistas.
No día de onte, o Delegado da Xunta Agustín Reguera xunto co xerente do Consorcio, Perfecto Rodríguez, realizaron unha visita ao centro de día de Tomiño, onde estiveron acompañados pola alcaldesa, Sandra González, así como polos concelleiros Cristina Martínez e Rubén García. Durante a visita, a alcaldesa expresou a preocupación do Concello en relación ao pago desproporcionado que Tomiño realiza polos servizos de competencia non municipal xestionados a través do Consorcio Galego. Situación que afecta particularmente ao centro de día e as dúas escolas infantís da localidade.
A obriga que a Xunta de Galicia lle impón ao Concello de Tomiño de asumir o coste destes servizos, resulta nunha carga financeira que ascende a preto de 250.000 euros, segundo os orzamentos para o ano 2024. Sandra González subliñou que, mentres que a Xunta esixe o cofinancimento por parte do concello (2500 €/ano por usuario no centro de día e 900 €/ano máis os gastos de mantemento nas escolas infantís), non se concede ningún tipo de decisión consorciada, limitando a capacidade do Concello para influir na xestión destes recursos tan esenciais.
A situación resulta especialmente gravosa para Tomiño, xa que este vese na obriga de asumir o coste das prazas daqueles usuarios que son veciños da localidade, mentras que, pola contra, os demais concellos da contorna que teñen veciños dos seus municipios como usuarios deste mesmo centro de día, non están obrigados ao cofinanciamento das súas prazas só polo feito de non contar coa devandita infraestructura.
Respecto as escolas infantís, a inxustiza tamén se reflicte no mantemento do copago aos concellos, a pesar da implantación da universalización da educación infantil 0-3 anos desde setembro de 2022, incluindo as escolas privadas, o Concello de Tomiño, que conta con dúas escolas infantís públicas consorciadas, sofre o copago imposto pola Xunta.
A Alcaldesa instou ao Delegado a abordar todas estas cuestións para solucionar a inequidade orixinada e recalcou a importancia de que a Xunta asuma a totalidade dos costes daqueles servizos que son da súa exclusiva competencia.
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.
Carlos Labraña: «Mambrú volveu da guerra»
Carlos Labraña leva tempo sendo un dos grandes referentes do teatro galego e, nomeadamente, do teatro infantil, no que sempre lle gustou xogar coa tradición oral e escrita. Nos últimos anos é doado detectar un pequeno xiro cara a temáticas un pouco máis comprometidas, nas que os enfrontamentos bélicos e as súas devastadoras consecuencias aparecen de maneira reiterada, a cotío na pel de menores. Tal é o caso de «Mambrú volveu da guerra», a obra dramática coa que acadou o premio SGAE de teatro infantil en 2022 e que agora vén de ver a luz.
Esta peza relata a historia de Noa, unha nena pequena que visita un parque infantil ubicado nunha pasaxe solitaria ás aforas da vila. Por azar, Noa descobre un boneco de porcelana enterrado no chan que resulta ser un soldado que, tal e como el lle asegura, viviu na zona moitos anos atrás, pero non garda lembranzas nin do seu nome nin das razóns pola que rematou soterrado no parque. A nena asumirá a tarefa de tratar de axudar ao boneco a recompoñer o seu pasado.
Destaca nesta peza a fluidez dos diálogos así como o aproveitamento do espazo escénico, mesmo a existencia de escenas sen diálogo ou con mínimas aportacións textuais, o que desvela o oficio de quen leva unha amplísima bagaxe de obra publicada e representada. En consecuencia, amais dunha peza divertida e ben escrita, estamos perante unha obra que tamén induce á reflexión, o que sempre é de agradecer.
Carlos Labraña
Mambrú volveu da guerra
Ilustracións: Raquel Lagartos
Xerais
80 páxinas
Paula Señarís: «Hermilindo esbirra poemas»
Segunda proposta literaria de Paula Señarís, dirixida de novo ao público infantil, na que nos traslada a un mundo máxico: o mundo mecánico. Alí vive un reloxo que padece un serio problema: cada vez que esbirra, escápanselle da boca palabras que non pode controlar, palabras fermosas que están prohibidas no seu estrito e ordenado mundo mecánico, no que só se permitan as onomatopeas «tic» e «tac». Cando o seu problema se descontrola e comeza a esbirrar versos, mesmo poemas completos, Hermilindo, o protagonista, é desterrado e expulsado a través dun tobogán a un novo mundo, o mundo ao revés. Nesta andaina atopará unha serie de personaxes ben peculiares que lle axudarán a buscar unha explicación ao seu problema e mesmo a asumilo como algo positivo.
Quizais non fose intención da autora, pero é inevitable que un lector adulto vexa un inequívoco compromiso social neste texto, que se presenta moi en consonancia cos tempos que nos tocou vivir. Deste xeito, o relato vai tomando tal forma que ben poderiamos consideralo unha revisión actualizada do clásico «O parrulo feo». Mais o que resulta innegable é o despregue de imaxinación do que Paula Señarís fai gala nesta proposta, ao imaxinar mundos e personaxes que escapan de calquera convención previa. A historia de Hermilindo é un puro divertimento que fará gozar a pequenos e maiores espelindo a nosa fantasía.
O último pleno ordinario do Concello de Covelo deu luz verde ao orzamento para o ano 2024 que ascende a 2 035 902,71 €, sendo un 5,63 % superior ao do 2023. O orzamento para o presente ano vén marcado polo seu carácter social no que se mantén e, nalgúns casos, aumenta o apoio a colectivos sociais, axudas e coidados das persoas con dependencia.
O Concello incrementa nun 9,12 % a área de protección e promoción social destinada ao servizo de axuda no fogar (SAF) co obxectivo de ofrecer unha mellor atención, chegar a máis persoas dependentes e contribuír na mellora da prestación tanto para as profesionais como para os receptores de axuda. Tamén mantén a dotación de 4 000 € para a subvención de fomento da natalidade. Nesta área o Concello de Covelo da un paso máis e suma aos seus orzamentos o apoio en firme á Asociación Solidariedade Galega co Pobo Saharaui.
O goberno de Covelo volve apostar pola mellora das oportunidades laborais da veciñanza e afianza a partida destinada a formación. Ante o éxito de participación no Plan de Emprego e Formación do Concello de Covelo deseñarase un oitavo plan atendendo á demanda non só do mercado laboral tamén da cidadanía. O Concello destinará 10 000€ a ofertar cursos que melloren o curriculum das persoas empadroadas e contribúan á empregabilidade. Os cursos volverán ser organizados de xeito participativo e consensuado avaliando os criterios das empresas de formación, plataformas de emprego e necesidades recollidas entre as veciñas e veciños.
Outras das partidas que ascende significativamente é a da área de gasto de producción de bens públicos que sube un 53,09 % coa contratación dunha empresa de limpeza externa que atenda ao colexio, centro de saúde e instalacións deportivas, entre outros espazos públicos, ao non ter o Concello persoal suficiente para desenvolver estes traballos.
Co propósito de apoiar a iniciativa das asociacións e clubs, o orzamento contempla unha subida na partida para a Asociación de Nais e Pais (ANPA) do CEIP Antonio Rodríguez Blanco para a realización de actividades socio-educativas; tamén incrementa o apoio ao Ciclo de Música de Barcia de Mera que atrae a milleiros de persoas cada ano dando a coñecer a riqueza cultural e histórica da vila. Neste senso, contémplase un maior apoio económico ao Club Covelo Patinaxe Artística e ao Covelo Club de Fútbol cunha aportación total de 6220 €. As subvencións directas nominativas que respaldan as inquedanzas dos colectivos locais acadan a cifra de 20 200 €
Neste ano manteranse as axudas para adquisición de libros así como a partida para actividades culturais e festexos e increméntanse as cantidades destinadas ao programa de sumidoiros, recollida e tratamento de lixo.
A regulación dos postos de traballo (RPT) supón unha subida do 15 % nos números para o 2024, adaptando os salarios e liquidando os incrementos previstos nos salarios. O orzamento deste ano ten en palabras do alcalde, Pablo Castillo, un carácter “social que quere atender ás necesidades fundamentais como os coidados, a formación axeitada para atopar un emprego, espazos públicos máis agradables nos que socializar e desenvolverse a diario, inquedanzas culturais, fomento da práctica deportiva e apoio aos colectivos que traballan dun xeito desinteresado por un ben común”.
As Súas Maxestades de Oriente non faltarán esta tarde á súa cita coa veciñanza de Redondela. Logo de recibir a ducias de nenos e nenas esta mañá na carpa do campo da feira na súa cabalgata estática, esta tarde sairán á rúa.
A alcaldesa, Digna Rivas, sinala que “a ilusión dos nenos e nenas é o máis importante nestas datas” e ante a previsión de melloría meteorolóxica as carrozas sarián polo centro da vila. O percorrido comezará na Praza de Ponteareas ás 18.00 horas e rematará na rúa Xeneral Rubín, dando volta no campo da feira.
Desde a concellería de Cultura Rita Pérez adianta que será “o mellor desfile de Reis da historia” cun total de seis carrozas ambientadas nos contos clásicos infantís e con moitas sorpresas.
Todo preparado para que as súas Maxestades de Oriente realicen esta tarde un percorrido internacional entre Tui e Valença. Chegarán á Eurocidade en tren, á estación do ferrocarril de Valença ás 16 h da tarde. Unha hora despois, ás 17 h, xunto coa súa comitiva, formada por máis de 200 persoas iniciarán o percorrido que os levará até o centro urbano de Tui.
Os Reis irán en tres magníficas carrozas, e na comitiva participan tamén as carrozas das asociacións culturais Arume de Malvas, Lembranzas da Terra de Guillarei, Aloia de Pazos de Reis e Xuntanza de Randufe. Porán música a este evento a Rondalla O Mosteiro de Pexegueiro e as charangas tudenses Cantos Somos e A Tu Ritmo. No seu percorrido repartirán 1500 quilos de caramelos sen glute.
Dende a Estación do Tren de Valença o percorrido continuará polas avenidas do Colégio Portugués e Miguel Dantas, a rotonda da Trapicheira, a Avenida de Espanha, a vella Ponte Internacional, para entrar a Tui pola Avenida de Portugal, as rúas Martínez Padín e Augusto González Besada, para xirar cara a praza da Galicia, e continuar polas rúas Lugo, Ourense, e Colón.
Xa no interior do Teatro Municipal, os Reis Magos recibirán aos nenos e nenas que desexen saudalos e compartir con eles os seus soños e desexos para esta noite máxica.
Colaboran neste evento a Garda Nacional Republicana, os Bombeiros Voluntarios de Valença, Protección Civil de Valença, Protección Civil de Tui, Policía Local de Tui, o grupo Scouts Aloia, e a Radio Municipal de Tui.Colaboran neste evento a Garda Nacional Republicana, os Bombeiros Voluntarios de Valença, Protección Civil de Valença, Protección Civil de Tui, Policía Local de Tui, o grupo Scouts Aloia, e a Radio Municipal de Tui.
A marcha, que leva o nome do ilustre exciclista ponteareán, mantén todos os obxectivos da pasada edición, o mesmo trazado e os dous percorridos, un curto de 67 quilómetros que contempla a subida a tres portos e un desnivel positivo de 1.000 metros, e un longo de 123 quilómetros que contempla a subida a seis portos e un desnivel positivo de 2.150 metros. A Sestelo Clásica Álvaro Pino converteuse xa nunha marcha consolidada e nun referente no calendario cicloturista nacional á que acoden ciclistas de toda España e mesmo algúns do estranxeiro.
Este ano os portos polos que pasará a marcha serán os mesmos da pasada edición: Fraga do Rei, Muro das Neves, Muro dá Luz, Franqueira por Uma, Moncelo e Carbitallo. A saída e chegada levarán a cabo en Ponteareas, na Praza de Bugallal, e contará cun tramo inicial neutralizado e o resto a velocidade libre, pero tentando reagrupar aos corredores nos avituallamientos de Salvaterra e A Cañiza.
A marcha pasará por nove concellos (Ponteareas, Mondariz Balneario, Mondariz, Covelo, Cañiza, As Neves, Salceda, Tui e Salvaterra), e terá máis de 2.000 metros de desnivel acumulado. A organización establece un tramo cronometrado no alto da Franqueira por Uma, que dará comezo no quilómetro 56 da marcha e finalizará no quilómetro 64, á altura da Franqueira. Ademais, establecerase unha cronometraxe total desde a saída ata a chegada de cada participante.
Unha das novidades deste ano será que a marcha contará cun homenaxeado, que en está edición de 2024 será o ex ciclista pontareano Suso Carballido. Ademais, a Sestelo Clásica Álvaro Pino contará con invitados especiais, como todos os anos, pero que aínda se manteñen en segredo.
Desde a organización sinalan que están moi felices da gran acollida e participación que tiveron nestas últimas edicións, completando as 400 inscricións antes da data de peche, e para este ano preveen un total de 500 rexistrados.
Esta nova edición da Sestelo Clásica Álvaro Pino tamén contará coa participación de Discamino, e os participantes que desexen poderán facer unha doazón coa súa inscrición ao seu proxecto.
Os organizadores queren destacar a continuidade do apoio dos patrocinadores para a celebración deste evento: Grupo Sestelo, Rodosa, Darlim, Lynalfa Grupo Asegurador, BTravel Brand, Ferraxería Barral, Biziebike Concello de Ponteareas, Deputación de Pontevedra, GDR Condado Paradanta e numerosos comercios locais que colaboran neste evento deportivo.
A Clásica Álvaro Pino estrea este ano nova camisola e de momento, como nas dúas edicións pasadas, é un dos segredos mellor gardados pola organización, aínda que si que a organización sinalou que seguirá sendo da marca Gobik.
O día previo á marcha, o sábado 25 de maio, celebrarase a xa clásica Feira do Corredor na que os participantes poderán recoller o seu dorsal, a bolsa do corredor, a charla cos invitados deste ano, e gozar de moitas sospresas que a organización lles ten preparadas do mesmo xeito que en edicións anteriores.
O evento conta cunha páxina web www.clasicaalvaropino.com a través da cal se poden facer as inscricións, e tamén a través das súas redes sociais de Facebook e Instagram @clasicapino. As inscricións xa están abertas nunha fase promocional a un prezo de 35€ e que só durará ata o 15 de xaneiro ás 23:59 horas.
O Museo da Ciencia do Viño do Condado do Tea, situado dentro do Castelo de Dona Urraca, no municipio de Salvaterra de Miño, pecha o ano rexistrando un total de 1508 visitas. Un máximo histórico que sitúa este espazo como un referente cultural sobre a vitivinicultura en España, así o avala o número de visitantes recibidos dende que abrira as súas portas en febreiro do 2019.
Os visitantes que se achegaron neste 2023 ó museo, máis de 1200 procedentes do territorio nacional e case 300 dende fora do país; valoran as instalacións e o trato persoal recibido durante a súa visita. O carácter didáctico e interactivo do Museo da Ciencia do Viño na promoción do “Condado do Tea” baixo a Denominación de Orixe Rías Baixas pon en valor unha marca propia ó mesmo tempo que pon de manifesto a riqueza existente da zona vinícola e como destino turístico co selo distintivo: Salvaterra de Miño.
Os meses con maior número de visitas rexistradas foron os de maio, agosto, setembro e decembro; meses que coinciden co período de vacacións e festas xa de relevancia e de promoción dos viños da zona como son a Festa do Viño do Condado do Tea no mes de agosto ou a Festa do Viño Espumoso en decembro. Só durante o mes de agosto foron preto de 300 as persoas que se achegaron ata o museo.
En Galicia, o turismo enolóxico é un dos principais reclamos turísticos xa que falamos dunha experiencia orixinal que engloba multitude de actividades complementarias arredor do mundo do viño como a gastronomía, a cultura, o patrimonio ou a tradición.
O Concello, a través da concellería de Cultura, ten xa todo preparado para a chegada dos Reis Magos ao casco urbano do municipio logo de que Melchor, Gaspar e Baltasar tiveran recollido os desexos dos nenos e das nenas das parroquias. Así, este venres día 5 as Súas Maxestades de Oriente continuarán o seu itinerario polas rúas do centro de Ponteareas.
A cabalgata dos Reis Magos iniciará o seu percorrido a partir das 18:00 horas na Avenida Rosalía de Castro. Desde alí, circulará pola rúa Oriente ata chegar á Praza Maior. Continuará por Rúa Arxentina cara Doutor Fernández Vega e baixará por Reveriano Soutullo. Pasará de novo pola rúa Oriente e terminará o seu itinerario no Auditorio Municipal.
Toda vez que finalice o desfile, a partir das 20:00 horas, Melchor, Gaspar e Baltasar recibirán aos nenos e as nenas no Auditorio Municipal para seguir recollendo os seus desexos de cara á gran noite. Ademais, entregarán á cativada un pequeno agasallo.
A alcaldesa de Mos, Nidia Arévalo, acompañada polo segundo tenente de alcaldesa e concelleiro de Patrimonio, Leo Costas, asinaron esta semana ante notario a compra por parte do Concello de terreos no Castro de Torroso a dous particulares. Con esta adquisición dáse o paso necesario para poder iniciar a posta en valor do Castro de Torroso, un dos xacementos arqueolóxicos castrexos máis antigos de Galicia.
A administración local mosense inviste na compra destes 2000 metros cadrados preto de 16.500 euros, fixando un prezo de 8,50 euros/metro cadrado.
A superficie total do Castro é moito máis grande pero comezouse a adquisición de terreos nesta zona por ser onde xa se atopaban feitas as catas desde os anos 80 do século pasado. É dicir, trátase da parte na que as construcións castrexas xa se atopan descubertas e á vista. Estas parcelas corresponden á parte alta do Castro que é a máis cha, accesible e visitable.
O edil de Patrimonio, Costas, e Arévalo, rexedora local mosense, declaráronse sobre esta sinatura “satisfeitos de ter podido concluír un procedemento complicado que levou tras de sí dous anos de investigación para poder lograr localizar aos titulares dos terreos adquiridos”. “Pechamos así, polo tanto, un círculo que dá solución a unha cuestión moi importante para posta en valor do patrimonio histórico e cultural mosense”, salientaron os representantes municipais.
Nidia Arévalo e Leo Costas informaron que, unha vez comprados os terreos, xa se está a traballar no proxecto de posta en valor do xacemento de Torroso. Documento que, unha vez rematado, será presentado na Xunta de Galicia para poder iniciar o procedemento de consolidación do Castro. Por último alcaldesa e concelleiro avanzaron que no ano 2025 contémplase continuar coa compra de terreos a particulares no Castro de Torroso.
Sobre o Castro de Torroso
Este Castro é un dos máis senlleiros de Galicia, dos mellor estudados e dos de maior interese científico e cultural.
Na primavera do ano 1983 descubriuse fortuitamente un xacemento en Torroso, moi preto do límite con Petelos, logo de que os temporais do inverno deixasen ao descuberto fragmentos cerámicos. As características morfolóxicas e técnicas destes vestixios motivaron o inicio dunha serie de escavacións, levadas a cabo entre 1984 e 1990 por Antonio de la Peña Santos, nas que se puido comprobar que se trataba dun xacemento castrexo.
O Castro de Torroso é un dos máis senlleiros de Galicia, dos mellor estudados e dos de maior interese científico e cultural. Conta cunha extensión dunhas 2,8 ha e unha altura máxima de 137 metros que lle permiten dominar uns terreos moi aptos para o aproveitamento agrícola e forestal.
Ao nordeste desta aldea fortificada prehistórica corre un regato que lle proporcionaba auga e pesca, ao igual que o río Louro, que flúe a 1,7 km do xacemento polo leste. Este río discorre ao longo dunha parte da Depresión Meridiana, unha grande fractura xeolóxica natural que une Tui con Padrón e que constitúe un lugar de paso natural privilexiado para o tránsito de persoas e mercadorías.
No Castro de Torroso atopáronse gravados rupestres, cerámicas, obxectos líticos e pezas de metal.
Dar a coñecer a riqueza natural, histórica e etnográfica do Concello de Covelo é un dos obxectivos do calendario que nestes días reparte o Concello entre a súa veciñanza. Acompañar ás veciñas e veciños ao longo do ano, salientar as datas das festas locais e, sobre todo, amosar a beleza natural e paisaxística son outros dos obxectivos deste calendario que se repartíu entre a hostalaría local de todas as parroquias para facilitar que as persoas que non viven no centro urbano poidan recollelo.
Ademais, calquera persoa empadroada pode achegarse en horario de mañá de 9 a 14 horas ao Concello e facerse con este primeiro agasallo de nadal que, con cariño e orgullo, distribúe a administración local.
Baixo o título “Covelo é arte” atopamos un total de once fotografías seleccionadas do concurso de fotografía convocado polo Concello que nos levan pola reitoral de Barcia de Mera; polo amencer en Ponte Maceira; polo noso extenso, elegante e sinxelo patrimonio micolóxico; polas rutas máxicas acompañadas por hórreos e variada paleta de cores no horizonte para parar a tomar unha “caña” na praza e falar cos coñecidos e coñecidas da fogueira de San Xoán ou das moitas tradicións que aínda conserva Covelo. Amparándonos nas sombras e luces do luscofusco subiremos ao Faro de Avión ou achegarémonos a contemplar os restos do pasado en San Estevo de Casteláns. Refrescaremos a vista no río de Castro para poder seguir contemplando o amplo patrimonio natural e histórico do Concello de Covelo.
“Todas as persoas veciñas de Covelo formamos parte dunha comunidade que vive nun lugar fermoso que temos a obriga e a responsabilidade de coidar, respectar e mellorar. E podemos facelo a través da nosa participación en colectivos como as comunidades de montes, as asociacións veciñais ou culturais, de mulleres rurais, as comunidades parroquiais, os clubs deportivos, o voluntariado, Protección Civil… ou simplemente cultivando as nosas relacións sociais e culturais e compartindo as celebracións e festas populares coa intención de mellorar o noso sentimento de pertenza a unha colectividade”, sinala o alcalde Pablo Castillo que, no seu nome e no das concelleiras e concelleiros da Corporación do Concello de Covelo, desexa un feliz e venturoso ano.
Utilizamos cookies para mejorar su experiencia y nuestros servicios, analizando la navegación en nuestro sitio web. Si continua navegando, consideramos que acepta su uso. Puede obtener más información pulsando aquí:.Saber MásAceptar
Cookies
Privacy Overview
This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
