A portavoz do PP de Mondariz, Ana Corredoira, considera “inadmisibles” as declaracións realizadas polo alcalde do municipio, Xosé Emilio Barros, sobre o Centro de Día e esixe do rexedor local “un comunicado desmentindo a súa idea de pechar ese servizo”. Segundo Corredoira, Barros “amosou nunha reunión na parroquia de Riofrío a súa ala máis radical” ao botarlle á culpa de “ser a promotora” da débeda que o Concello polo Centro de Día “por ter un sistema perverso e malévolo”
A voceira popular achaca a débeda de 157.000 euros “ás malas prácticas do anterior Goberno” e asegura que é o momento en que o Goberno local busque solucións que vaian máis aló de culpar á Xunta de Galicia.
Segundo Ana Corredoira o alcade de Mondariz, na reunión de Riofrío, asegurou textualmente que “o convenio coa Xunta de Galicia polo Centro de Día é perverso e malévolo que nos manexa como marionestas con un sistema de fraude vendo como nos quitan os cargos mentres nos vemos o fútbol”.
O Grupo Popular pide ao alcalde “que rectifique as súas verbas e que pague as débedas xeradas polo seu previsible socio de goberno nun futuro inmediato e anterior compañeiro de partido” ao mesmo tempo que sinalan se “será quen de resolver o problema ou ser recordado como o alcalde que pechou o Centro de Día”.
Aseguran os populares que “non consentirán que se mesture o benestar e o diñeiro” xa que non se pode escatimar ningún medio “para garantir o benestar dos nosos maiores e dos nosos veciños”.
Un convenio do PP
Pola súa banda o portavoz de AporM, Xoán Carlos Montes Bugarín, lembra que o convenio co Consorcio Galego de Servizos de Igualdade e Benestar “foi asinado polo goberno popular de Julio Alén”. Non obstante, engade, “a Xunta non reclamou ata o 2017 o pago da débeda”. Dende ese momento, Alternativa por Mondariz “tentou negociar coa Xunta as formas de pago e unha solución para o problema”.
En todo caso, o voceiro de AporM é rotundo ao asegurar que a súa formación “baixo ningun concepto vai permitir que se peche o Centro de Día” e o que ten que facer o actual goberno “é negociar e sacar unha solución beneficiosa para o concello e a súa cidadanía”.
“No 2020 que acaba o convenio, é unha grande oportunidade para facer esas negociacións”, conclúe Xoán Carlos Montes.
