A iniciativa ‘As nosas Conquistadoras’ ten por obxecto homenaxear a mulleres de Redondela que exemplifican a importancia da participación da muller na sociedade. Nace dentro do programa do 8M do municipio para estender a loita pola igualdade máis alá da celebración dun só día.
‘As nosas Conquistadoras’ nace como continuación da xa coñecida exposición ‘Conquistadoras’ do Concello de Redondela. A alcaldesa Digna Rivas, explica que “este goberno comprométese coa loita pola igualdade durante todo o ano, por iso a intención desta actividade é alongar a programación do 8M, para que non quede nun só día”.
“Son as propias asociacións de veciños e veciñas dasparroquias as que escollen á muller homenaxeada en cadacaso”, sinala a concelleira de Igualdade, Iria Vilaboa.
Este domingo, día 17, celebrarase dous recoñecementos: ás 12.00 horas na A.D.C. de Rande homenaxe a Carmen Álvarez Álvarez, e ás 18.00 horas na Casa Cultural de Quintela a Carmen Darriba Amoedo. Ademais dos actos organizados en cada caso coas asociacións de veciños, o Concello faralles entrega dun ramo de flores e un retrato orixinal feito en directo pola artista Alba Fernández Troiteiro, que quedará exposto no Centro Cultural de cada parroquia “como homenaxe e recordo do seu traballo e a súa historia de vida” engade Rivas.
A primeira homenaxe no marco deste programa fíxose o ano pasado. En San Estevo de Negros foi recoñecida Mercedes Portela Rodríguez, polo seu traballo como carteira en correos durante moitos anos. En Ventosela homenaxeouse a Celsa Míguez Bouzón, por ser a muller de maior idade, e en Saxamonde a muller elixida foi Sofía Vilaboa, tamén escollida pola súa parroquia por ser a de maior idade. En Cesantes foi recoñecida a mestra Carmen Barreiro Seoane, mentres que en Cabeiro a eluxida foi Balbina Castro Balado.
A intención deste acto é, polo tanto, recoñecer o valor das mulleres redondelás cunha homenaxe na súa propia parroquia, “achegando a loita pola igualdade a todos os lugares sociais e de promoción cultural do municipio”explica a edil de Igualdade.
