15 C
Pontevedra
Martes, 23 de Abril de 2024
Máis
    HomeUltimas NoticiasAreeiro lembra que non cese a vixilancia do mildio e se retiren...

    Areeiro lembra que non cese a vixilancia do mildio e se retiren os acios afectados

    O persoal da EFA espera que o oídio non prospere nos próximos días e alerta de que apareceron algúns grans afectados pola botrite

    A Estación Fitopatolóxica Areeiro, centro dependente da Deputación de Pontevedra, acaba de lanzar un novo aviso fitosanitario no que destaca que nas viñas de albariño máis adiantadas xa se pode ver o brillo incipiente nos primeiros acios, aínda que non é unha situación xeralizada. En canto ao mildio, o persoal da EFA non detectou cambios nas parcelas da súa rede, que se manteñen limpas deste fungo a nivel dos acios aínda que non das follas. Mais a recomendación que se fai dende a Estación é continuar coa vixilancia e tratar as viñas máis afectadas, nas que aínda reste tempo para entrar no pintado. Do mesmo xeito, nas viñas máis danadas é convinte retirar os acios afectados para evitar que se instalen sobre eles fungos oportunistas de podremia á vez que se reducen os tempos e os gastos na vendima.

    Doutra banda, espérase que o oídio non prospere nos próximos días na provincia e que unicamente poidan aparecer novos danos naqueles predios nos que previamente existen infeccións mal controladas. No que respecta ao black rot non se observaron cambios e lémbrase que é convinte eliminar os acios afectados por este patóxeno co fin de non favorecer ás podres.

    Botrite en gran e pedunculo de albariño

    Nas viñas visitadas polo persoal da EFA apareceron algúns grans afectados pola botrite, aínda que de xeito moi esporádico. Porén, aconsellan que nas variedades máis sensibles e onde se detecten danos por perforacións de Lobesia ou doutra natureza se extreme a vixilancia. Ademais, segundo informan dende a Estación é preciso non perder de vista as avelaíñas do acio máis polos danos indirectos que se poden producir pola aparición de botrite que polos danos directos que poden causar as perforacións desta praga. Nas viñas tamén se observa un incremento nas capturas de cicadelidos mentres que se manteñen en niveis estables a presenza tanto de plantas afectadas por patoloxías da madeira como por erinose.

    O persoal da EFA tamén destaca no seu último aviso de xullo que non se atoparon cambios significativos na afectación do buxo e lembra que a situación pode ser diferente noutras sebes, polo que é necesaria a vixilancia constante e, de notarse maior presenza de danos, a aplicación dun tratamento. Dende a Estación lembran que estamos nunha campaña na que as colonias de pulgón contan cunha presenza moi elevada e na que tamén hai mosca branca, aínda que en menor medida. Aconsellan que se os pés son pequenos se aplique un tratamento contra este estes insectos chupadores, e se son grandes se eliminen os novos gromos como medida de control.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.