18.6 C
Pontevedra
Luns, 24 de Xuño de 2024
Máis
    HomeUltimas NoticiasA Confraría Santa Tecla da Guarda convoca unha concentración contra a eólica...

    A Confraría Santa Tecla da Guarda convoca unha concentración contra a eólica mariña

    A concentración terá lugar o sábado 20 de maio ás 12 h na praza Avelino Vicente, co obxectivo de amosar a súa oposición á instalación dun macropolígono de eólica mariña entre Cabo Silleiro e a desembocadura do Miño.

    Baixo o lema “O vento é gratis, a eólica mariña non” a Confraría Santa Tecla da Guarda convoca esta concentración para esixir a paralización dos proxectos de éolica mariña que pretenden instalar nas costas da Guarda, Oia, O Rosal e mesmo Baiona. A recente aprobación dos POEM prioriza a produción industrial de enerxía fronte á protección da biodiversidade e a actividade pesqueira.

    Tal e como promulga o Manifesto de Burela, que a confraría “subscribe totalmente”, as persoas que viven do mar somos as máis interesadas en defender os ecosistemas mariños, “que contribúen á xeración de emprego e creación de riqueza en vilas costeiras”. Crendo firmemente na necesidade frear os devastadores efectos do cambio climático, desde Santa Tecla apostan “por unha transición enerxética xusta, compatible con actividades sustentables, que garanten a soberanía alimentaria e crean identidade, como é o caso da pesca”.

    Por estas razóns, desde unha comunidade pesqueira tradicional como é A Guarda, queren manifestar o seu firme rexeitamento a este tipo de proxectos e esixen ao MITECO, “a retirada dos POEM e a paralización de calquera proxecto de eólica mariña”. A Confraría Santa Tecla urxe a “acometer estudios científicos independentes e rigorosos sobre a afectación xerada por muíños e liñas de evacuación nas especies mariñas e o conxunto do ecosistema” e lembra que a recente admisión a trámite no Tribunal Supremo do recurso presentado polas Confrarías, “debería facer reflexionar á ministra Ribera para decretar a paralización cautelar de calquera proxecto, pola irreversibilidade dos danos que se poden causar”.

    Doutra banda exisen do Ministerio de Agricultura, Pesca e Alimentación, “unha oposición frontal a plans de saqueo dos nosos recursos pesqueiros”, polo que instan ao ministro Planas “a antepoñer a soberanía alimentaria fronte á especulación enerxética”.

    Da administración autonómica pide a confraría “un posicionamento claro na defensa do sector pesqueiro” e adiantan o rexeitamento aos anuncios “sobre eventuais fondos de compensación para paliar os prexuízos da eólica mariña, que implican per se un perigo real de afectación á pesca”. Reclaman que o presidente da Xunta “exerza como tal” e non de comercial do lobby enerxético.

    Por último a confraría Santa Tecla quere transmitir á cidadanía da franxa costeira do sur de Galicia e Norte de Portugal “que este non é un problema que só afecta ás xentes do mar” xa que a instalación dun macropolígono de enerxía eólica “terá tamén repercusión en terra, afectando principalmente a concellos como A Guarda, Oia ou O Rosal, por onde previsiblemente discorreran as liñas de alta tensión para a evacuación da enerxía eléctrica, creando unha verdadeira “autoestrada” que fragmentará a paisaxe ao longo do seu trazado”.

    Por isto, apelan tamén a colectivos ecoloxistas, ambientalistas e organizacións sociais e veciñais “a unirse ao sector pesqueiro nesta loita, porque o mar e a paisaxe do sur das Cíes ao Trega perténcenos a todas e todos”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.