7.7 C
Pontevedra
Martes, 31 de Xaneiro de 2023
Máis
    HomeÉ Noticia"Grazas xoguetes" a nova campaña da Deputación

    “Grazas xoguetes” a nova campaña da Deputación

    Os xoguetes axúdannos a cumprir os nosos soños, libres de prexuízos e estereotipos sexistas. Esta é a principal mensaxe que lanza a potente campaña da Deputación deste ano para a adquisición e uso de xogos e xoguetes igualitarios nas vindeiras festas, cuxo lema é “Grazas xoguetes”. Está  protagonizada por cinco profesionais da provincia que agradecen aos seus divertimentos infantís terlles inspirado para elixir a súa ocupación laboral, todas en ámbitos no que o seu sexo aínda está infrarrepresentado. Son a inmunóloga África González, a cineasta Emma Lustres, o bailarín Diego Landín, a futbolista Paula Dapena e o cociñeiro Pepe Solla. Estes tres últimos participaron hoxe na presentación xunto a Laura Seara, de Red Talento Consultoras, creadora da iniciativa, que, como destacou a presidenta provincial Carmela Silva, “é unha campaña única e moi relevante, que vai ter moito impacto. Levamos oito anos facéndoa e todas foron un éxito pero a deste Nadal é potentísima e moi impactante”. Amais, a campaña volve incluír un concurso escolar para elixir “O mellor xoguete do mundo” polo alumnado de 3º e 4º de Primaria.

    “Grazas xoguetes por axudarnos a soñar sen estereotipos” reivindica a importancia e o decisivo papel dos xogos xoguetes na educación, no desenvolvemento da personalidade e na elección de futuras profesións. As distintas pezas da campaña amosan aos e ás citadas profesionais cos xoguetes que lles inspiraron e aos que dan as grazas por axudarlles a soñar  e ensinarlles que podían ser o que quixeran. Pepe Solla xogou de neno cunha cociniña vendo a súa avoa; África González lembra o estetoscopio que tivo de regalo; Paula Dapena o balón co que xogaba de nena; Emma Lustres a súa primeira cámara de cine de xoguete e Diego Landín os peluches de animais bailaríns. Xunto ás frases de cada un,  un lema común:  Este Nadal aposta polo talento das túas fillas e fillos, aposta por xoguetes libres de estereotipos.

    Carmela Silva agradeceu a participación de profesionais “tan relevantes, referentes a nivel nacional e internacional que van permitir co seu compromiso que xuntos e xuntas reflexionemos cando vaiamos mercar un xoguete”, e louvou o relato desta campaña:  “Xogar marca a vida e o obxectivo é  que nenas e nenos experimenten co xogo e poidan acabar sendo o que desexen libremente e que se abra un gran abano. Non só as nenas teñen pechadas moitas cousas que poderían ser e facer, senón tamén os nenos. Que todos e todas teñamos calquera decisión nas nosas mans, para poder construír unha vida de seres felices que fan o que lles gusta, o que soñaron cando xogaban”.   

    Neste senso, citou a Heidi Britz-Crecelius para afirmar que “non hai nada que os seres humanos fagan, saiban, pensen, esperen ou teman que non teña sido experimento, practicado ou ao menos anticipado durante a etapa do xogo na infancia”. Carmela Silva puxo tamén en valor a entrada en vigor do Código Deontolóxico sobre Publicidade non Sexista acordado entre o Goberno e o sector da publicidade e fabricantes, que busca evitar nesgos e roles de xénero nos anuncios, como a Deputación ven facendo desde hai 8 anos. “Creo que o xoguete é unha actividade humana fundamental que marca os nosos soños, os nosos desexos, o que queremos ser, pero tamén marca como somos como seres humanos. Se se nos educa en igualdade, se se permite que nenos e nenas teñan a capacidade de elixir libremente con que xogar, como vivir e imaxinar, porque iso é o xoguete, construiremos unha sociedade na que poderán ser o que queiran cando teñan que decidir”.

    Laura Seara, de Red Talento Consultoras, destacou o papel da Deputación nestas iniciativas “porque non hai unha institución que sexa máis referente no Estado neste traballo a prol do xoguete igualitario e non sexista”. Agradeceu o traballo do publicista Pablo Ojea e a ilustradora Iria Prol e subliñou que na campaña están presentes os tres principais axentes da socialización: “a familia, porque está dirixida a pais e nais para que lle dean unha pensada aos xoguetes que van poñer nas mans dos seus fillos e fillas; o profesorado, e un terceiro que ten que ver co que se aprende a través das amizades e nas redes sociais”. Neste senso, destacou que os e as protagonistas da campaña son “influencers moi importantes”.

    As e os protagonistas uníronse ao chamamento. Pepe Solla subliñou que este tipo de campañas amosan que “aínda hai fisuras na sociedade”. “Vivimos nunha sociedade que cada vez máis se regula por leis e prohibicións, e obviamos que educar é un proceso moito máis importante. É máis lento, pero ten moitísimo mellor resultado. Por iso é un orgullo pensar que teño participado nalgo como isto, que amosa como me gustaría que se regulase a sociedade. E pensar sobre todo que se dirixe aos nenos/as, porque eles/as van construír a sociedade que veña. Temos que deixarlles un legado”.  

    Diego Landín, director do Ballet de Galicia en Marín, lembrou a súa experiencia no ámbito da danza, “onde está moi separado o que teñen que facer o home e a muller ou o que poden facer” e onde a presenza masculina cando comezou e na actualidade segue a ser escasa. “Sempre me sentín protexido na casa –indicou- onde me permitiron soñar co que quería ser. Pero creo que é inxusto que moitas e moitos rapaces se sintan desprotexidos por xogar cos xoguetes que queren xogar. Estou moi agradecido de facer equipo con estes profesionais”. 

    Pola súa banda, a futbolista Paula Dapena, lamentou que o fútbol segue a ser “un dos ámbitos máis machistas en todo o mundo” e lembrou que a campaña “é moi importante para que nenos e nenas aprendan que o fútbol, o baile, a cociña, a investigación e o cine son cousa de todos e que non hai xogos de nenos ou nenas”. “Quixera pedir a pais nais, avós e avoas, que teñan en conta que o desenvolvemento dos nenos e nenas depende dos xoguetes que lles regalemos. A campaña é imprescindible para que a sociedade teña en conta que hai que vivir libre  de estereotipos e soñar que todos e todas podemos ser todo”.

    “Faremos unha campaña moi viral”

    Desde o vindeiro 7 de decembro ata o 6 de xaneiro a campaña terá soportes físicos e virtuais, que inclúen un vídeo colectivo e os individuais de cada protagonista, carteis, publicidade en medios e tamén nos autobuses urbanos de Vigo. Está dirixida á infancia, ás persoas encargadas de tomar a decisión de comprar un xoguete, como as familias, e tamén ao profesorado, Anpas, clubs deportivos e axentes culturais.

    Concurso escolar

    A campaña incluirá un concurso creativo dirixido á nenas e nenos de 3º e 4º de Primaria da provincia. Baixo o lema “O mellor xoguete do mundo”, animará ao alumnado a deseñar un xoguete orixinal, creativo, igualitario e non violento. Será un concurso por equipos (aulas) no que os e as participantes poderán deseñar o seu xoguete sen límites de tamaño ou peso, aínda que se valorará o emprego de material reciclable. Unha vez deseñado, deberán enviar foto da súa creación, con prazo ata o 30 de xaneiro, ao enderezo participa.igualdade@depo.es. O certame, do que se remitirá información aos centros, tamén estará dispoñible na web da Deputación. Está dotado cun primeiro premio para o centro gañador consistente nunha actividade didáctica e material educativo igualitario, e dous accésit, cos que os centros recibirán material educativo igualitario.

    COLABORACIÓNS

    Ponteareas e a filla pródiga: o novo espectáculo do Circo da Dereita

    Aínda que o pareza, non é un déjà vu, non. É real como a vida mesma. A dereita en Ponteareas regresa ao seu pasado, non sabemos se por convicción nostálxica ou, como parece máis evidente, por non atopar nada mellor que ofrecer. Se cadra, en realidade non hai tal regreso a un pasado que esa dereita nunca abandonou, por máis que durante os últimos anos algúns quixeran convencer a Ponteareas, pleno tras pleno e eleccións tras eleccións, de que aquel negro pasado nada tiña que ver con eles nin cun Partido Popular que, reescribindo a nosa historia política, tería nacido en 1998 coa chegada a Ponteareas dun Salvador chamado para redimir, como novo candidato popular, os imperdonabeis pecados orixinais da dereita ponteareán encarnada até ese momento por un alcalde orgulloso do seu pasado franquista.

    María Solar, «A culpa»

    A metade de camiño entre a novela negra e o thriller, María Solar vén de presentar un novo traballo para adultos no que pescuda nas interioridades da parte máis escura da alma humana a través dun trío de mulleres, protagonistas do relato.

    Antón Riveiro Coello, «Días de intemperie»

    A nova achega de Antón Riveiro Coello, «Días de imtemperie», é unha proposta que contén nove relatos de temática e transfondo diferentes, mais que teñen un elemento en común, como é a guerra no sentido máis amplo da palabra.

    Árbol de Navidad relleno de chocolate

    Aunque estas fechas tienen sus dulces típicos, no a todo el mundo le gustan los turrones, polvorones y demás. Lo que casi con seguridad gusta a todo el mundo (y sobre todo a los peques) es el chocolate y este postre une la Navidad y el chocolate de una forma muy muy sencilla.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    77 POSTS0 COMMENTS
    Paz de la Peña
    41 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    6 POSTS0 COMMENTS
    Avatar
    1 POSTS0 COMMENTS