16.6 C
Pontevedra
Venres, 14 de Xuño de 2024
Máis
    HomeÉ NoticiaA Xunta contratará coidadores de gando como medida de prevención ante os...

    A Xunta contratará coidadores de gando como medida de prevención ante os ataques do lobo

    O Goberno galego destina 370.000 euros á contratación de persoas coidadoras de gando como medida de prevención ante os ataques do lobo, segundo dixo a directora xeral de Patrimonio Natural, Belén do Campo.

    Durante unha visita á explotación Gandería Os Bravos SC, Do Campo salientou que o Goberno galego incrementa en 216.000 euros a partida inicialmente destinada a esta “iniciativa novidosa” para atender todas as solicitudes presentadas.

    Tal e como detallou a directora xeral, o pasado mes de maio publicáronse as bases reguladoras destas axudas para os anos 2023 e 2024. A resolución desta convocatoria, o pasado mes de xullo, atendeu 9 solicitudes por un importe de 154.000 euros, quedando fóra da concesión outras 12 peticións, que cumprían os requisitos esixibles na convocatoria e que suporían un total de 216.000 euros.

    Polo tanto, ante o interese económico e social á medida subvencionable, o Goberno galego decidiu conceder as axudas solicitadas que, cumprindo os requisitos e superando o procedemento de concorrencia competitiva, non puideron beneficiarse desta liña de financiamento por esgotamento do crédito dispoñible.

    Deste xeito, a Xunta destinará un total de 370.000 euros a esta iniciativa que ten como obxectivo axudar ao sector gandeiro en extensivo na contratación de persoal para desenvolver tarefas de pastoreo e manexo de reses co fin de protexer, na medida do posible, aqueles rabaños máis sensibles e susceptibles de sufrir un maior risco de predación.

    Con esta medida excepcional trátase de cumprir o obxectivo establecido polo Plan de xestión do lobo en Galicia de acadar unha integración entre as indemnizacións por danos e a adopción de medidas preventivas nas explotacións afectadas.

    Cómpre lembrar que durante o ano 2021 levouse a cabo na Comunidade a actualización do estado poboacional de lobo ibérico en Galicia e os resultados obtidos do censo estiman a presenza de 93 mandas reprodutoras, concluíndo que a área de distribución do lobo ocuparía unha superficie de 26.908 km2, o que supón o 91% da superficie total do territorio galego.

    Así mesmo, a evolución dos danos comunicados ao logo do período 2010-2022, amosan un mantemento continuo dos mesmos dada a distribución xeneralizada da especie na comunidade autónoma.

    Ante isto, o Goberno galego mantén o seu compromiso de compatibilizar a actividade gandeira coa presenza e a conservación desta especie de fauna silvestre en Galicia. De feito, a Vicepresidencia Segunda e Consellería de Medio Ambiente, Territorio e Vivenda financia 3 ordes de subvencións para prever e minimizar o impacto do lobo.

    Á liña de incentivos para contratar persoas coidadoras do gando en explotacións en réxime extensivo para desenvolver tarefas de pastoreo e manexo das reses, hai que engadir as axudas destinadas á adquisición e instalación de valados fixos -400.000 euros-, e as que teñen como obxecto a compra e manutención de cans protectores, a adquisición de pastores eléctricos e a colocación de cerrumes con malla -700.000 euros-.

    E, a maiores, a Xunta destina mais de 646.000 euros a compensar aos afectados polas perdas derivadas dos ataques desta especie.

    “Entre os anos 2016 e 2023 o Goberno galego destinou preto de 8 millóns de euros a previr e paliar os danos causados polos ataques do lobo ao sector agrogandeiro”, concluíu a directora xeral.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.