14.6 C
Pontevedra
Domingo, 25 de Febreiro de 2024
Máis
    HomeVal MiñorGondomarA Xunta inviste 2,6 millóns de euros para reducir o risco de...

    A Xunta inviste 2,6 millóns de euros para reducir o risco de inundacións nos ríos Zamáns e Miñor en Gondomar

    Trátase dun conxunto de actuacións para mellorar a drenaxe na confluencia destes ríos no municipio, recollidas no convenio remitido a semana pasada ao Concello

    A conselleira de Infraestruturas e Mobilidade, Ethel Vázquez, avanzou un investimento da Xunta de 2,6 millóns de euros para reducir o risco de inundacións nos ríos Zamáns e Miñor, en Gondomar.

    Vázquez Mourelle, xunto coa directora de Augas de Galicia, Teresa Gutiérrez, e a delegada territorial da Xunta en Vigo, Marta Fernández-Tapias, mantivo unha reunión por videoconferencia co alcalde, Francisco Ferreira, para presentar as actuacións previstas para minimizar as posibles consecuencias do desbordamento dos ríos nesta zona cualificada como de risco potencial significativo de inundacións.

    A conselleira salientou que se trata dun conxunto de actuacións, unhas principais e outras complementarias, que a Xunta propón levar a cabo para mellorar a drenaxe na confluencia destes ríos ao seu paso por Gondomar, incluídas na proposta de convenio de colaboración remitido a semana pasada ao Concello.

    Explicou que son intervencións estruturais no treito do río Miñor, entre a ponte situada na avenida do Conde de Gondomar -augas arriba do colexio- e a ponte da avenida Curros Enríquez; e no treito do río Zamáns, desde a ponte que hai na avenida Elduayen ata a súa desembocadura no  río Miñor.

    Ethel Vázquez concretou a proposta de demolición da ponte da avenida Curros Enríquez, coa construción dunha nova estrutura no río Miñor sobre a estrada autonómica PO-340, de case 85 metros de lonxitude e con tres vanos. Está será a principal actuación e tamén a que suporá o maior investimento, case 1,4 millóns de euros.

    Tamén se propón a execución dunha canle de alivio baixo o novo viaduto, conectando os ríos Zamáns e Miñor para que funcione a modo de desaugüe complementario no caso de episodio de inundacións; así como actuacións nos muros do río Zamáns, elevando a altura do valo existente e executando outro muro pantalla que substitúa ao actual, que está danado.

    Ademais, actuarase no rebaixe do río Miñor e adecuarase a zona, eliminando o recheo xunto ao campo de fútbol na marxe esquerda, con actuacións nos paseos, accesos ás pasarelas e outras adaptacións necesarias para mellorar a accesibilidade.

    A conselleira indicou que a estas intervencións principais sumaranse outras actuacións complementarias, como a adecuación e mellora da zona do paseo Carlos Casares,  a limpeza dos leitos de ambos os ríos e a recuperación do bosque de ribeira.

    A Xunta xa lle trasladou ao Concello de Gondomar a proposta de colaboración, que segue o mesmo esquema que se segue en todos os organismos de conca en España para este tipo de actuacións. Segundo a proposta de convenio trasladado, a Administración autonómica asumirá o financiamento íntegro de todas as actuación previstas, correspondéndolle ao Concello de Gondomar someter o proxecto a información pública, a posta á disposición e xestión dos terreos necesarios e conseguir as autorizacións precisas, así como recibir as obras e asumir o seu mantemento e conservación, unha vez executadas.

    Ethel Vázquez puntualizou que para acometer estas actuacións se precisa da colaboración do Concello, polo que a Xunta agarda que este dea axiña o visto e prace ao texto do convenio remitido para poder tramitalo e elevalo ao Consello da Xunta para a súa aprobación, e proceder á súa posterior sinatura entre Xunta e Concello.

    A este respecto, a conselleira puxo o acento na importancia de que o Concello poida axilizar a tramitación municipal correspondente para o desenvolvemento destes traballos, que están cofinaciados con Fondos FEDER 2014-2020 e que deben estar executados na súa totalidade en 2023.

    Apuntou que, tras remitir o proxecto definitivo ao Concello e unha vez este realice a tramitación municipal correspondente, o obxectivo da Xunta é poder licitar as obras a mediados deste 2021. Os traballos contan cun prazo de execución de 12 meses.

    Mellor preparados ante o cambio climático

    Ethel Vázquez lembrou que estas actuacións se enmarcan na liña de traballo que vén desenvolvendo o Goberno galego de cara a estar mellor preparados ante o cambio climático. Incidiu na necesidade destas medidas para reducir o risco de inundacións dos ríos, como o Miñor e Zamáns, que atravesan Gondomar e, tamén para reducir as consecuencias que para a saúde, o medio ambiente ou a economía, poden supoñer as enchentes ocasionais dos leitos fluviais.  No marco desta liña de actuación, desde a Xunta estanse a actualizar os mapas de risco de inundacións da demarcación hidrográfica Galicia-Costa; estanse a desenvolver plans específicos de inundacións en 9 zonas fluviais de Galicia con maior risco de inundacións; e a acometer actuacións concretas nas áreas de risco potencial significativo de inundacións, como as que ten previsto desenvolver en Gondomar.

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.