10.1 C
Pontevedra
Luns, 26 de Febreiro de 2024
Máis
    HomeComarcasRedondelaRedondela propón á Xunta melloras no proxecto de humanización da avenida Mendiño

    Redondela propón á Xunta melloras no proxecto de humanización da avenida Mendiño

    O Concello de Redondela remitiulle á Xunta de Galicia unha memoria con varias modificacións para a nova avenida Mendiño. O obxectivo destes cambios é o de “axustar o proxecto ás necesidades reais da poboación de Redondela”, segundo explica a alcaldesa Digna Rivas. Con estas modificacións “o cidadán é o protagonista deste entorno urbano ao entender o espazo público como un lugar de convivencia”.

    O proxecto servirá para reordenar a estrada e mellorar a seguridade viaria da avenida (PO-363), un tramo urbano que pertence á rede secundaria da Xunta de Galicia . A avenida Mendiño ten aproximadamente 1 quilómetro de lonxitude, e conecta o núcleo urbano con zonas de servizo de gran afluencia como o centro de saúde, colexios, institutos, instalacións deportivas e áreas de recreo. Tamém é o principal acceso á praia de Cesantes. A avenida conta cunha elevada intensidade de tráfico e circulación de peóns, especialmente nos horarios de entrada e saída dos centros educativos. Na zona rexístranse importantes retencións has horas punta e inseguridade no paso de peóns.

    O Concello propón diferentes solucións para mellorar a seguridade viaria da zona e reordenar o espazo en superficie. As propostas céntranse en dous aspectos principais: por unha banda , a mellora das interseccións existentes e, por outra, a reordenación dos tramos para mellora a mobilidade e seguridade dos peóns, reordenando zonas de circulación e aparcamento. O concelleiro de Urbanismo, Antonio Cabaleiro, explica que pretenden “acentuar o carácter humanizado da vía, con protagonismo do cidadán sobre o vehículo e con solucións aos problemas de tráfico cunha visión máis humanizada”.

    Entre as melloras que contempla o proxecto están as novas beirarrúas con pavimento de pedra ata o porto de Cesantes. O Concello demanda ademais un novo estudo do tramo viario que permita manter o arborado, así como a incorporación de novas zonas verdes “para crear un ambiente o máis amigable posible con corredores verdes”. O goberno local propón a creación dun  carril bici “para fomentar unha mobilidade sostible”.

    Coa elaboración desta memoria o Concello redondelán cumpre así co compromiso adquirido por Digna Rivas na reunión celebrada o pasado mes de novembro coa conselleira de Infraestruturas, Ethel Vázquez, na que lle trasladaron as demandas da veciñanza e formacións políticas. Rivas lembra que a Xunta anunciou en 2019 a humanización desta avda Mendiño “sen que ata o de agora se puxeran en marcha os traballos”. No Concello son agora “moderadamente optimistas” dado o interese mostrado por parte da conselleira “malia que advertiu que os investimentos estarán condicionados polos fondos europeos NextGeneration”.

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.