O Concello de Redondela vén de adquirir un piano de cola, para o que destinou un investimento de 38.000 euros, motivo polo vén de poñer en marcha a iniciativa nomeada ‘Semana do Piano’. O instrumento musical é o primeiro destas características no Concello, e que desde o goberno local consideran “imprescindible” para a celebración de moitos actos culturais e educativos. A organización corre a cargo do Conservatorio Municipal en colaboración co Concello.
A Semana do Piano arrancaba o luns coa presentación no Conservatorio de Música, ‘Víctor Ureña’, onde se celebrou un concerto dos profesores acompañando aos seus alumnos. Xa na tarde de hoxe, o piano ‘trasladábase á rúa’ para achegar este instrumento a todos os veciños e veciñas. Así na Praza da Constitución de Redondela, tiña lugar ás 18 horas, unha sesión de ‘piano bar’ de balde. Posteriormente, ás 19:15 horas a sesión de piano dirixíase ao público para, segundo o Concello “facilitar que a veciñanza entre en contacto co instrumento, podendo incluso aprender a tocar unhas notas musicais”.
O mércores día 27 de marzo a celebración trasládase ao Conservatorio Municipal, onde a artista redondelana Noemí Salomón ofrecerá unha conferencia aberta a todo o público, na que falará da súa experiencia como artista e tamén como docente de música.
Na xornada do día 28 farase unha doble sesión de piano na rúa. Primeiro será o turno dos máis cativos, xa que ás 10:30 horas está previsto un concerto de cancións infantís no que participarán os escolares da vila.
Na quenda das 12:00 horas, tocaranse as ‘cancións de sempre’, adicadas aos nosos maiores. Participarán nesta actividade as persoas da terceira idade dos centros de día de Redondela.
Para cerrar a semana grande da música en Redondela, haberá un concerto de gala para o que será necesario dispoñer de invitación previa. Neste acto actuarán tamén os artistas redondelanos Noemí Salomón e Alberto Vilas.
O alcalde da vila, Javier Bas, sinalou que é moi importante a celebración desta semana “para poder achegarlle á xente a calidade educativa que hai en torno á materia musical en Redondela”.
