A Concellería de Turismo do Concello de Redondela, xestionada por María Castro Abad, vén de dar a coñecer o programa das novas rutas guiadas que se desenvolverán dende este mes de xuño e ata o vindeiro mes de outubro. Esta iniciativa realizada en colaboración con Citania Arqueoloxía e encamiñada a dar a coñecer o patrimonio cultural e paisaxístico do municipio, acadou un importante éxito de participación nas rutas desenvolvidas con anterioridade.
“Redondela ten moito que ver”, afirma a alcaldesa Digna Rivas quen destaca que a iniciativa da Concellería de Turismo “permite poñer en valor todo o potencial que temos en cultura, patrimonio e natureza a través de rutas, nas que as e os participantes, reciben detalladas explicacións sobre os lugares polos que pasan”.
O primeiro dos roteiros, que se desenvolverán os últimos domingos de cada mes, terá lugar xa o vindeiro domingo 26 de xuño coa denominada Ruta das Pedras de Ventosela.
A esta primeira saída guiada seguirán a Ruta nocturna polos Petroglifos da Pedreira en Ventosela, na noite do 30 ao 31 de xullo; Ruta diurna a Monte Buxelen Reboreda, o 25 de setembro e pecharase esta nova quenda de roteiros coa Ruta nocturna polos Petroglifos de Penide/Mirallo, na noite do 29 ao 30 de outubro.
Cómpre lembrar que no caso das visitas nocturnas as prazas serán limitadas. As persoas interesadas en participar en calquera dos roteiros, poderán facelo no teléfono 600 381 782 (dende o luns anterior a cada visita) e poden obter máis información na páxina de Facebook https://www.facebook.com/ACitaniaGalicia/.
