15.3 C
Pontevedra
Venres, 14 de Xuño de 2024
Máis
    HomeO CondadoPonteareasO Concello de Ponteareas fai balance despois dun mes de teletraballo

    O Concello de Ponteareas fai balance despois dun mes de teletraballo

    A concellería de Innovación e Desenvolvemento Tecnolóxico implantou softwares libres que permiten as videoconferencias e un sistema de mensaxería inmediata entre departamentos

    O concelleiro de Innovación e Desenvolvemento Tecnolóxico do Concello de Ponteareas, Benito Márquez, fixo un positivo balance deste mes de implantación do teletraballo nos servizos municipais. Márquez trasladou á cidadanía que “a totalidade dos e das traballadoras municipais que desenvolvían traballos con equipamentos informáticos traballan dende hai xa un mes totalmente de xeito telemático”.

    Benito Márquez, que tamén é concelleiro de Persoal, salienta o “excelente traballo” do departamento de informática que foi quen de implantar “en tempo récord” a infraestrutura para o teletraballo permitindo que dende o primeiro momento os e as traballadoras desenvolvan dende os seus fogares o 100 % do traballo a través dun software que lles permite acceder aos seus escritorios virtuais dende fóra da rede corporativa de xeito transparente empregando as mesmas ferramentas e programas informáticos que utilizaban nas oficinas municipais. A través dunha dobre autenticacións garántese a seguridade no acceso.

    “O escenario de teletraballo xa se tiña contemplado dende hai un tempo, –explica Benito Márquez– de aí a decisión de implantar o ano pasado no Concello unha solución de escritorios virtuais baixo terminais lixeiros, o que supón múltiples vantaxes, unha delas a mobilidade do espazo de traballo”.

    O Concello preparou equipo portátiles e manuais como guía para teletraballar e creouse un sistema de VPN (rede privada virtual) para aqueles usuarios/as que, por características do software específico co que traballan, non teñen posibilidade de virtualizar o seu escritorio.

    Benito Márquez, concelleiro de Innovación e Desenvolvemento Tecnolóxico

    O concelleiro de Persoal agradeceu tamén “a todos e todas as traballadoras a súa boa disposición e rápida adaptación a este novo sistema de traballo que atende as necesidades e xestións máis urxentes mentres dure este estado de alarma”.

    Ademais, o Concello implantou un software libre para a comunicación inmediata entre os distintos departamentos, este sistema de mensaxería instantánea permite unha comunicación fluída e áxil entre os traballadores e traballadoras adaptado aos nosos escritorios remotos e traducido ao galego.

    Márquez subliñou que o Concello dispón tamén, dende os primeiros días, dun software libre, gratuíto e seguro “que fai posible a celebracións de reunións como a mantida entre o Goberno e a oposición nos últimos días ou a realización de xestións e tramitacións municipais que requiren o diálogo e toma de decisións entre distintos departamentos. Un dos sistemas de maior seguridade existentes no mercado”.

    “Fomos dos primeiros Concellos da provincia capaces de implantar o teletraballo con sistemas informáticos seguros e eficientes e con programas e ferramentas que ademais de permitir o traballo individual facilitan o encontro virtual entre traballadores e traballadoras”, conclúe o concelleiro de Desenvolvemento Tecnolóxico.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.