O Apalpador, ese emblemático personaxe que, segundo a tradición, baixaba das montañas a noite do 24 ou 31 de decembro para tocar o ventre das e dos máis pequenos para comprobar se comeran o suficiente durante o ano e lles deixaba agasallos e castañas, desexándolles un feliz ano novo cheo de felicidade e comida, volverá achegarse este ano para coñecer a todos os nenos de Ponteareas. A cita é este luns 2 de xaneiro ás 11.00 horas. O carboeiro recibirá a todas as persoas que queiran compartir tempo con el na Praza Maior e dende alí percorrerá varias rúas acompañado polo seu burro Río Lor e polo acordeonista Servando Barreiro. Os tres arrincarán sorrisos da cativada ao seu paso con música, baile e algunhas anécdotas, coas que tratarán de promover valores como a dinamización da lingua, o respecto ao medio ambiente ou os hábitos de alimentación saudable.
O Concello anima a veciñanza a acompañar ao Apalpador na súa estancia en Ponteareas, ao tempo que destaca a importancia de pór en valor a nosa tradición entre a nosa infancia.
Esta visita forma parte do programa Nadal en galego da Deputación de Pontevedra. A iniciativa busca que as nenas e nenos coñezan a esta mítica figura que forma parte da tradición galega destas festas.
