O alcalde de Mondariz, Xosé Emilio Barros, e o tenente de alcalde, Leopoldo Tato, Mantiveron unha xuntanza en Santiago co director xeral de Desenvolvemento Rural, Miguel Pérez Dubois. A reunión responde á liña estratéxica do Goberno local “de promover un desenvolvemento rural atractivo para a veciñanza que poña freo á constante despoboación que vén sufrindo o concello nos últimos anos”.
Durante a reunión, Barros e Tato escoitaron con atención as características das denominadas ‘aldeas modelos’ que está a promover a Consellería de Medio Rural e manifestaron que o goberno municipal comparte a idea de que unha explotación sustentábel do territorio forestal con actividades agrogandeiras nas faixas secundarias é a mellor defensa fronte ao lume.
Para determinar as potencialidades de Mondariz en materia de desenvolvemento rural, solicitouse expresamente un estudo orientado á fruticultura e unha charla sobre o programa de ‘aldeas modelos’ en Mondariz.
Dende o goberno municipal intúese que árbores frutais coma maceiras ou amendoeiras poden adaptarse ben ás características xeográficas do Concello de Mondariz e permitir un desenvolvemento rural sustentábel con perspectivas de futuro.
Para dar a coñecer o sector frutícola entre a veciñanza, estase a preparar unha xornada arredor da produción de mazá e sidra para finais deste mes. Previamente, a finais de setembro, xa se fixo unha xornada técnica sobre a crianza de porco celta nas carballeiras e nos soutos galegos.
Con estas actividades formativas e informativas, o Concello de Mondariz pretende revalorizar os tradicionais vencellos coa terra e a natureza de gran parte da veciñanza para buscar alternativas de desenvolvemento rural que impulsen a economía local e a calidade de vida.
“Antes de presentar candidaturas de ‘aldea modelo’ hai que estudar as potencialidades de cada territorio e ter un plan claro de como se van a aproveitar as faixas secundarias”, comenta Xosé Emilo Barros.
Coas ‘aldeas modelos’, a Xunta de Galicia está tratando de vincular a prevención de lumes na contorna dos núcleos de poboación coa explotación agrogandeira das faixas secundarias, tendo en conta que actividades como a plantación de árbores (frutais, castiñeiros, oliveiras,…) con vistas ao aproveitamento comercial ou a crianza de gando autóctono (porco celta, cabra galega,…) conleva a limpeza natural desas faixas. Este modelo ten o seu interés para un concello como o de Mondariz, pero tamén require dunha activa implicación da veciñanza, especialmente das persoas propietarias das terras afectadas. “É por iso que o goberno municipal dá tanta importancia á información pública sobre este e outros programas que poidan beneficiar á localidade”, conclúe o alcalde de Mondariz.