Centos de veciños das Neves, representantes das comunidades de montes de Santiago de Ribarteme, Rubiós, Taboexa, San Xosé de Ribarteme e San Pedro de Batalláns e o Goberno local ao completo, achegáronse este sábado ata o miradoiro de San Nomedio para amosar o rexeitamento ao proxecto do parque eólico que, baixo o nome de ‘Coto de Lobos’, pretende instalarse neste enclave único da vila.
O segundo tenente de alcalde e concelleiro de Medio Ambiente, Óscar González, comentou que os promotores do mesmo xa pediron á Xunta a declaración de impacto ambiental e que o Concello das Neves, logo de reunirse cos responsables das comunidades, presentará alegacións a este proxecto e apoiará e promoverá cantas mobilizacións sexan necesarias.
González apuntou que os sete aeroxeradores que se pretende instalar, terán uns fustes de 135 metros de alto e unhas aspas de 170 metros de diámetro, o que supón unha altura, en conxunto, “de 220 metros, cinco veces máis que as antenas de comunicación que hai neste lugar, que teñen unha altura duns 40 metros”.
O concelleiro de Medio Ambiente subliñou os “gravísimos prexuízos” que ocasionarían, “dende o punto de vista paisaxístico e medio ambiental, no que atangue ás augas ou ás escorrentías causadas polas choivas que serán completamente distintas ás de agora”.
Á vista de todo elo, tanto o Goberno municipal das Neves como as comunidades de montes, apuntaron que non consentirán que haxa un parque eólico neste miradoiro que está incluído na Rede de Espazos Paisaxísticos de Galicia, con elementos patrimoniais a conservar, coma a ‘Capela de San Nomedio’, que está no centro orográfico das Neves e que dende hai anos é un centro de observación astronómica”.
